Yohane 14

Yesu ndiyo nthowa ya kuyira kwa ŵadada

1“Mitima yinu yingasuzgikanga chara. Kweni pulikanani na Chiuta, ndipo pulikanani mwa ine. 2Mu nyumba ya Ŵadada muli malo ghanandi ghakukharamo. Nga kuwurenge kuŵa ntheura, mphanyi nkhamuphalirani. Nkhuruta kuya kamunozgerani malo. 3Ndipo para ndaruta ndamkumunozgerani malo ndipo ndamkwizaso kwiza kamutorerani kwa ndamwene, mwakuti uko ndili ine ndiko namweso mukaŵenge. 4Ndipo mukuyimanya nthowa ya uko ine nkhuruta.”

5Tomasi wakati kwa iyo, “Fumu, tikumanya chara uko mukuruta. Kasi nthowa tingayimanya uli?”

6Yesu wakati kwa iyo, “Ine ndine nthowa, unenesko na umoyo. Palije munthu uyo wakwiza ku Ŵadada, kweni mwa ine pera. 7Nga mundimanyenge ine, mphanyi mwaŵamanya na Ŵadada wuwo. Ndipo kuyambira sono mukuŵamanya Ŵadada ndipo mwaŵawona.”

8Filipu wakati kwa iyo, “Fumu, mutirongore Ŵawiskemwe kuti tikhorwe.”

9 Yesu wakati kwa iyo, “Filipu, ndakhara namwe nyengo yitali, kasi ulije kundimanya na sono? Yose uyo wawona ine wawona na Ŵadada. Kasi ungayowoya uli kuti ‘Mutirongore Ŵawiskemwe?’ 10Kasi ulije kupulikana kuti ine ndili mu Ŵadada ndipo Ŵadada ŵali mwa ine? Mazgu agho nkhuyowoya kwa imwe, nkhuyowoya mu mazaza gha ine ndekha chara, kweni Ŵadada awo ŵakukhara mwa ine ŵakuchita milimo yawo. 11Pulikanani nane kuti ine ndili mu Ŵadada ndipo Ŵadada ŵali mwa ine. Para apo yayi, pulikanani nane chifukwa cha milimo yekha. 12Inya, inya nadi nkhumunenerani kuti, yose uyo wakupulikana mwa ine, nayo wati wachitenge milimo iyo nkhuchita ine. Ndipo wati wachitenge milimo yikuru yakuruska iyi, chifukwa ine nkhuruta ku Ŵadada. 13Chose icho mungaromba mu zina lane, ndichitenge, mwakuti Ŵadada ŵachindikike mu Mwana. 14Usange mukuromba kalikose mu zina lane, ndichitenge.

Phangano la Mzimu Mutuŵa

15“Usange mukunditemwa, musungilirenge marango ghane. 16Ine ndirombenge Ŵadada ndipo iwo ŵamupaninge Msanguruski munyakhe kuti wakharenge na imwe kwa muyirayira. 17Ndiyo Mzimu wa unenesko, mweneuyo charu chingamupokerera chara, chifukwa kuti chikumuwona chara nanga nkhumumanya. Kweni imwe mukumumanya, pakuti wakukhara namwe ndipo wati waŵenge mwa imwe.

18“Kuti nditi ndimusidaninge ŵalanda chara. Ndamkwizaso kwa imwe. 19Ndipouli mu kanyengo kachoko waka, charu chilekenge kundiwonaso, kweni imwe mundiwonenge. Pakuti ine ndili wamoyo, namweso muŵenge ŵamoyo. 20Mu zuŵa leneilo muti mumanyenge kuti ine ndili mu Ŵadada, ndipo imwe mwa ine, ndipo ine mwa imwe.

21“Yose uyo wali na marango ghane ndipo wakughasungilira ndiyo wakunditemwa ine. Ndipo uyo wakunditemwa ine, watemwekenge na Ŵadada. Ine nane ndimutemwenge na kujivumbula kwa iyo.”

22Yudasi (Isikariyoti chara) wakati kwa iyo, “Fumu, kasi kwaŵirachi ntheura kuti mujivumbule kwa ise pera, kweni ku charu chara?”

23 Yesu wakamuzgora wakati, Usange munthu wakunditemwa, wati wasungilirenge mazgu ghane, Ŵadada ŵati ŵamutemwenge, ndipo Ŵadada na ine tizenge kwa iyo na kukhara nayo. 24Yose uyo wakuwura kunditemwa ine, kuti wakurondezga mazgu ghane chara. Mazgu agho mwapulika kuti ngane chara, kweni nga Ŵadada awo ŵakandituma.

25“Ndamuyowoyerani vinthu ivi apo ndichali namwe. 26Kweni Msanguruski, Mzimu Mutuŵa, mweneuyo Ŵadada ŵamkumutuma mu zina lane, ndiyo wizamkumusambizgani vinthu vyose, na kumukumbuskani vinthu vyose ivyo ndamuyowoyerani.

27“Nkhumusidirani mutende. Mutende wane nkhumupani imwe. Kuti nkhumupani nga umo charu chikupira chara. Mungasuzgikanga mu mitima yinu, nanga nkhopa. 28Mukandipulika apo nkhayowoyanga kwa imwe kuti, ‘Nkhuruta ndipo ndamkwizaso kwa imwe.’ Munditemwenge, mphanyi mwangusekerera pakuti ine nkhuruta kwa Ŵadada, chifukwa Ŵadada mbakuru kuruska ine. 29Ndipo sono ndamuphalirani pambere chindachitike, mwakuti para chachitika mwiza kapulikane. 30Kuti nditi ndiyowoyengeso namwe vinandi chara, chifukwa uyo wakuwusa charu ichi wakwiza. Iyo kuti wali na mazaza pa ine chara. 31Kweni nkhuchita umo Ŵadada ŵandilangulira, mwakuti charu chimanye kuti nkhutemwa Ŵadada.

“Wukani, tifumepo pano.

Currently Selected:

Yohane 14: Tumbuka

Highlight

Copy