Yesaya 9
9
1Kweni ŵanthu awo ŵakaŵa mu urwirwi, kuti ŵamkuŵaso na suzgo chara.
Kubabika na kuwusa kwa karonga uyo wakwiza
Mu nyengo ya kale, Chiuta wakayuyura charu cha Zebuloni na cha Nafutali, kweni mu nyengo iyo yikwiza, wizamkuchindika Galileya, charu cha ŵamitundu icho chili mu nthowa ya mu nyanja, ku sirya linyakhe la mronga wa Yorodani.#Mat 4.15
2Ŵanthu awo ŵakendanga mu mdima,
ŵawona ungweru ukuru.
Awo ŵakakharanga mu charu cha mufwiri wa nyifwa,
ungweru waŵaŵalira.#Mat 4.16; Luk 1.79
3Mwe Fumu, mwandaniska fuko linu,
ndipo mwasazgirako chimwemwe chawo.
Ntheura ŵakukondwa panthazi pinu,
nga ndi umo ŵanthu ŵakukondwera pa nyengo ya kuvuna,
umoso ŵanthu ŵakukondwera pakugaŵana vya kuskogha.
4Pakuti imwe mwaphyora goliwoli ilo likaŵanyekezganga,
na ndodo iyo ŵakatimbiranga pa viŵegha vyawo,
ndiposo na muchiza wa awo ŵakaŵatindiŵizganga,
nga ndi pa zuŵa ilo mukathereskera Midiyani.
5Nadi viryato vyose vya musilikari,
na chakuvwara chilichose icho chili na ndopa,
vizamkocheka pa moto nga ndi nkhuni.
6Pakuti mwana wababika kwa ise,
mwana mwanarume waperekeka kwa ise.
Iyo ndiyo wati wawusenge.
Wati wachemekenge zina lakuti,
“Movwiri Wakuzizwiska, Chiuta Mwenenkhongono zose,
Dada wa Muyirayira, Karonga wa Mutende.”
7Muwuso na mutende wakhe vikulirengekulirenge,
kuti vizamkumara chara.
Iyo wizamkuwusira pa chizumbe cha Karonga Davide.
Wizamkumwimika na kuwukhozga,
na weruzgi wakunyoroka ndiposo na urunji,
kwamba sono na kwa muyirayira.
Fumu Mwenenkhongono zose, yapanikizga kuti
yiti yichitenge nadi ichi.#Luk 1.32-33
Fumu yiti yilange ŵaIsraele
8Fumu yatuma mazgu ghakususka Yakhobe,
ndipo ghawa pa ŵaIsraele.
9Ŵanthu wose ŵati ŵamanyenge ichi,
ndiwo ŵaEfurayimu na awo ŵakukhara mu Samariya,
ŵeneawo ŵakuyowoya mwakujikuzga,
na mitima yakujitukumura kuti,
10“Nangauli nyumba za njerwa zagumuka,
ise tizengengeso na mawe ghakuŵaja.
Nangauli migororo ya vikuyu yawiskikira pasi,
ise tiŵikenge migororo ya milanje mu malo mwakhe.”
11Ntheura Fumu yaŵawuskira ŵavimphindikwa kulimbana nawo,
yakhuŵirizga ŵarwani ŵawo kurwa nawo.
12ŴaSiriya ku mafumiro gha dazi na ŵaFilisiti ku zambwe,
ŵayasama ku mlomo kumirimitizga ŵaIsraele.
Ndipouli ukari wa Fumu ulije kugowoka,
woko lakhe ndakunyoroka ndipera kuŵalanga.
13Ŵanthu ŵara ŵalije kuwerera kwa Chiuta
mweneuyo wakaŵalanga,
nesi kupenja Fumu Mwenenkhongono zose.
14Ntheura mu zuŵa limoza Fumu yadumula
mutu wa Israele pamoza na muchira wakhe,
munthavi wa mukama na thete.
15Mutu ndi ŵararaŵarara na ŵanthu ŵakuzirwa,
muchira ndi nchimi izo zikusambizga vya utesi.
16Pakuti awo ŵakurongozga ŵanthu aŵa ŵakuŵapuruska,
ndipo awo ŵakurongozgeka ŵakutayika.
17Pa chifukwa ichi,
Fumu kuti yikakondwa na ŵanyamata ŵawo chara,
nesi kuŵa na chiwuravi na ŵalanda na vyokoro.
Pakuti waliyose ngwambula kopa Chiuta na wakuchita uheni,
ndiposo wakuyowoya vya uchindere pera.
Ndipouli ukari wa Fumu kuti ukagowoka chara,
woko lakhe likaŵa lakunyoroka ndipera kuŵalanga.
18Nadi, uheni ukugolera nga ndi moto,
ukumyangura mkolankhanga na minga.
Ukubuska matundu gha mu thengere,
mwakuti ukuthuvukira muchanya mu josi la kusunkha.
19Kwizira mu ukari wa Fumu Mwenenkhongono zose,
charu chizamkuphya.
Ŵanthu ŵati ŵaŵe nga ndi khuni zakupembere moto,
ndipo palije na yumoza wamkuthaska mwana munyakhe.
20Iwo ŵakukwapura chakurya na woko la maryero,
kweni wati wakhutenge chara.
Ŵati ŵakwapure chakurya na woko la mazere,
napo kuti ŵati ŵakhutenge chara.
Waliyose wakurya na ŵana ŵakhe wuwo.
21Fuko la Manase lamkurwa na fuko la Efurayimu,
ndipo la Efurayimu na fuko la Manase,
ghose pamoza ghamkurwa na charu cha Yuda.
Ndipouli nanga vikaŵa ntheura,
ukari wa Fumu kuti ukagowoka chara,
woko lakhe likaŵa lakunyoroka ndipera kuŵalanga.
Currently Selected:
Yesaya 9: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
