Yesaya 8

Mwana wa Yesaya nga nchimanyikwiro ku ŵanthu

1 Fumu yikayowoya kwa ine yikati, “Tora chakulembapo chisani ndipo ulembepo malembo ghakuŵazgika makora kuti, ‘Kuparanya Kwa Luŵiro, Kuskogha Kwambula Kuchedwa’. 2Ntheura nkhajitorera ŵakaboni ŵamagomezgeko, musofi Uriya na Zakariya mwana wa Yeberekiya, kuti ŵandisimikizgire.”

3Pamanyuma nkhanjira mu muwoli wane nchimi yanakazi ndipo wakaŵa na nthumbo na kubaba mwana mwanarume. Sono Fumu yikati kwa ine, “Mwana uyo umuthye zina lakuti, ‘Kuparanya Kwa Luŵiro, Kuskogha Kwambula Kuchedwa’. 4Pambere mwana uyo wandambe kuchema kuti, ‘Adada’ panji ‘Amama’, usambazi wa mu Damaseko na vyakuskogha vya mu Samariya vizamkutoreka na karonga wa charu cha Asiriya.”

Kwiza kwa karonga mukuru wa charu cha Asiriya

5 Fumu yikayowoyaso kwa ine yikati, 6“Pakuti ŵanthu aŵa ŵakana maji gha Shilowa agho ghakwenda makoramakora, ndipo ŵakusekerera mwa Rezini na Peka mwana wa Remaliya, 7ntheura Fumu yiti yitume karonga wa charu cha Asiriya kuti wize na nkhondo pa charu cha Yuda. Iyo wati wizenge pa iwo nga ndi maji ghanandi gha mronga wa Yufurate agho ghakwiza na nkhongono, ndipo ghati ghafurukire mu tumifwerenje tose mpaka mu vibumira vya mronga. 8Ŵasilikari aŵa ŵati ŵatandazgike mu charu chose cha Yuda nga ndi chigumura cha maji icho chikufurukira posepose mpaka mu singo. Ŵati ŵaŵe nga ndi mapapindo agho ghatandaukira na kubenekerera charu chako chose, iwe Imanuwele.”

9Imwe ŵamitundu, wunganani kunozgekera nkhondo,

ndipouli muti musakazikekenge.

Pulikani ichi,

imwe vyaru vyose vya kutali.

Nozgekerani nkhondo,

kweni muti musakazikenge.

Nadi, nozgekerani nkhondo,

kweni muti musakazikenge.

10Wunganani pamoza,

kweni wupu winu uti uparanyike waka.

Panganani ivyo muti muchite,

kweni viti vitondekenge, pakuti Chiuta wali nase.

Fumu yikuchenjezga nchimi

11 Fumu yikayowoya kwa ine mwa nkhongono ndipo yikandisoka kuti ndireke kwenda mu nthowa ya ŵanthu aŵa, yikati, 12“Ureke kuyowoya kuti nchiŵembu chose icho ŵanthu aŵa ŵakuti nchiŵembu ndipo ureke kopa ivyo iwo ŵakopa, nanga nkhutenthema navyo. #1 Pet 3.14-15 13Fumu Mwenenkhongono zose ndiyo yekha uyipimenge kuŵa yakupatulika, ndiyo yekha ukwenera kuyiwopa, ndipo ndiyo yekha ukwenera kutenthema nayo. 14Iyo ndiyo yiti yiŵenge malo ghakupatulika. Kweni yiŵenge libwe lakutinkhika, jarawe lakukhuŵarapo nyumba ziŵiri za Israele, diŵa na chipingo ku awo ŵakukhara mu Yerusalemu.#1 Pet 2.8 15Ŵanthu ŵanandi ŵizamkukhuŵarapo. Ŵizamkuwa na kuphyoka. Ŵizamkuwira mu chipingo na kukoreka.”

Nchenjezgo ku awo ŵakusopa mizimu ya ŵakufwa

16Sungani chilayizgo, didimizgani chisambizgo mukati mu ŵasambiri ŵane. 17Nditi ndilindilire Fumu, iyo yikubisa chisko chakhe ku ŵa fuko la Yakhobe, ndipo nditi ndigomezge mwa iyo pera.#Heb 2.13

18Wonani, ine pamoza na ŵana awo Fumu yili kundipa, ndise chimanyikwiro na chirongorero ku ŵaIsraele kufuma kwa Fumu Mwenenkhongono zose, iyo yikukhara pa Phiri la Ziyoni.#Heb 2.13

19Para ŵanthu ŵakumuphalirani kuti, “Penjani ku ŵawukwi na ku ŵamayere, ŵeneawo ŵakuyowoya mazgu gha pasipasi na kuphwepwerezga, asi ŵanthu ŵakwenera kufumba ŵachiuta ŵawo? Kasi ŵafumbenge ku ŵakufwa mu malo mwa awo mbamoyo, 20kuti ŵapokere visambizgo na visimikizgo?” Nadi, awo ŵakuyowoya ntheura ŵati ŵawone nanga nkhaungweru chara.

Nyengo ya visuzgo

21Ŵanthu ŵamkuyingayinga waka mu charu uku ŵakusuzgika chomene na kupulika njara. Chifukwa cha kupulika njara, ŵizamkukaripa ndipo ŵizamkulaŵiska kuchanya na kwamba kutemba karonga wawo na Chiuta wawo. 22Ŵizamkulaŵiska pasi ndipo ŵizamkuwona visuzgo pera na mdima wakofya chomene wa bii. Ntheura ŵizamkuponyeka mu mdima weneuwo.

Currently Selected:

Yesaya 8: Tumbuka

Highlight

Copy