Hoseya 7
7
1“Para nkhukhumba kuchizga ŵaIsraele,
kwananga kwa Efurayimu kukuŵa pakweru,
milimo yiheni ya ŵaSamariya yikuvumbukwa.
Iwo ŵakuchitira vinthu mu upusikizgi,
ŵakuphyora nyumba na kwiba,
ndi vigeŵenga, vikupoka vinthu mu misewu.
2Kweni iwo ŵakughanaghanapo chara,
kuti nkhuyikumbukira milimo yawo yiheni yose.
Zakwananga zawo zaŵazingirizga,
ndipo zili panthazi pane.”
Chiŵembu mu nyumba ya ufumu
3 Fumu yikuti,
“Ŵanthu ŵakukondweska karonga na uheni wawo,
ŵakukondweska nduna na uryarya wawo.
4Wose mbambula kugomezgeka.
Ŵali nga ndi uvuni wa moto,
uwo uyo wakuphika
kuti wakusonkhezga chara,
kufuma pa nyengo ya kukonkhera nthimphwa,
mpaka yitukumuke.
5Pa zuŵa la chiphikiro cha karonga,
nduna zakhe zikaloŵera na vinyo.
Karonga nayo wakunjirapo
pa machitiro gha ŵanthu ŵawakawaka.
6Mitima yawo yikocha nga ndi uvuni
na uchigaruka wawo.
Ukari wawo ukunyeka usiku wose,
ukubuka nga ndi dimi la moto na mulenje.
7Wose ŵakuŵa ŵakocha nga ndi uvuni,
ŵakukoma awo ŵakuŵawusa.
Ŵakaronga ŵawo wose ŵali kukomeka,
palije na yumoza uyo wakuromba wovwiri kwa ine.”
Israele wasazgikana na ŵamitundu
8 Fumu yikuti,
“ŴaEfurayimu ŵasazgikana na ŵamitundu,
ŵali nga ndi chingwa chipapati icho chaphya ku lwande pera.
9Ŵalendo ŵakuŵamara nkhongono,
iwo kuti ŵakumanyako chara.
Ŵayamba kumera mbuha
iwo kuti ŵakumanyako chara.
10ŴaIsraele kujikuzga kwawo kukuŵasuska ŵekha.
Ndipouli, iwo ŵakuwerera kwa ine Fumu, Chiuta wawo chara,
nanga nkhundipenja.”
11“ŴaEfurayimu wali nga ndi nkhunda,
iyo njakupusa na yambula mahara.
Iwo ŵakuchemerezga ku ŵaEguputo,
kweni ŵakuruta ku kapenja wovwiri ku ŵaAsiriya.
12Para ŵakuruta, nditi nditandazge ukonde wane
na kuŵakora.
Nditi ndiŵawiskire pasi nga ndi viyuni vya mudera,
na kuŵalanga chifukwa cha zakwananga zawo.
13Soka kwa iwo,
chifukwa ŵandireka ine.
Pharaniko yiŵe pa iwo,
pakuti ŵandigarukira ine.
Nkhukhumba kuŵawombola,
kweni ŵakuyowoya mautesi na vya ine.
14Iwo kuti ŵakuromba kwa ine na mtima wose chara,
ŵakulira uku ŵagona pa vitara vyawo.
Ŵakujichekacheka chifukwa cha vyakurya na vinyo,
ndipouli ŵakundigarukira.
15Ŵanthu aŵa nkhaŵasambizga na kuŵakhwimiska,
ndipouli ŵakundichitira chiŵembu.
16Iwo ŵakuzgokera kwa chiuta wawakawaka,
kwa Chiuta Chikurukuru chara,
ŵali nga ndi uta uwo ngwa kubendera.
Ŵarongozgi ŵawo ŵati ŵafwenge na lupanga,
chifukwa cha mayowoyero ghawo gha mutafu.
Ntheura ŵati ŵasekeke mu charu cha Eguputo.”
Currently Selected:
Hoseya 7: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
