Hoseya 6
6
Kung'anamuka kwambula kufikapo kwa ŵaIsraele
1Ŵanthu ŵakuyowoya kuti,
“Tiyeni tiwerere kwa Fumu.
Yatiparura, kweni yitichizgenge,
yatipweteka, kweni yikakenge vilonda vyithu.
2Pamanyuma pa mazuŵa ghaŵiri,
Fumu yamkutipamphuska.
Pa zuŵa la chitatu yamkutiwuska,
mwakuti tiŵe ŵamoyo panthazi pakhe.
3Tiyeni tiyimanye Fumu,
tiyeni tilimbelimbe nadi kuti tiyimanye.
Yizenge kwa ise kwambula nkhayiko,
nga ndi umo ghakwizira matandakucha.
Yizenge kwa ise nga ndi vura yakuwazga
nga ndi vura ya chifuku iyo yikuzumbwiska charu.”
4Kweni Fumu yikuti,
“Kasi ndichitechi nawe, we Efurayimu?
Kasi ndichitechi nawe, we Yuda?
Kugomezgeka kwinu kuli nga ndi nyankhuŵinda,
nga ndi jumi ilo likurakata mwa luŵiroluŵiro.
5Ndicho chifukwa ndamudumulani nga ndi nkhuni,
na mazgu gha nchimi.
Ndamukomani na mazgu ghane.
Weruzgi wane ngwa pakweru
nga ndi ungweru wa leza.
6Pakuti ine nkhukhumba chisungusungu,
sembe chara.
Nkhukhumba kuti ŵanthu ŵandimanye ine Chiuta,
kuruska kupereka sembe zakocha mburuma.”#Mat 9.13, 12.7
7“Iwo ŵali kuswa phangano lane,
nga ndi umo wakachitira Adamu.
Ntheura ŵali kuŵa ŵambula kugomezgeka kwa ine.
8Gileyadi ndi msumba wa awo ŵakuchita uheni,
ngwa kunangika na ndopa za ŵanthu.
9Nga ndi umo ŵankhungu ŵakukhazgira munthu,
ndimo ŵasofi nawo wakuwunganirana pamoza.
Iwo ŵakukoma ŵanthu pa nthowa yakuya ku Shekemu.
Nadidi, ŵakuchita viheni vinandi.
10Ine ndawona chinthu chakuseruska,
mu nyumba ya ŵaIsraele.
Efurayimu wajipereka kuti wachitenge uzaghali,
Israele wajikazuzga pakusopa vikozgo.
11Imwe namwe ŵa charu cha Yuda,
nyengo ya kuvunira chilango chinu yikwiza,
para ndamkuwezgeraso mauweme ku ŵanthu ŵane.”
Currently Selected:
Hoseya 6: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
