Habakuku 2
2
Zgoro la Fumu kwa Habakuku
1Nditi ndimilire pa malo ghane ghakulindirirapo,
nditi ndikwere pachanya pa chigongwe.
Nditi ndilaŵiske kuti ndiwone icho Fumu yindiphalirenge,
na umo yindizgorerenge na kusinginika kwane.
2Penepapo Fumu yikandizgora yikati:
“Lemba mboniwoni iyi,
uyilembe pa mawe ghapapati kuti yiwoneke makora,
mwakuti uyo wakusambirapo wendepo luŵiro.
3Pakuti mboniwoni yikulindirira nyengo yakhe,
mboniwoni iyi yikwiza luŵiro,
kuti yiti yitondekenge chara.
Para vikuwoneka kuti vikuchedwa, uyilindilire,
yiti yizenge nadi, kuti yichedwenge chara.#Heb 10.37
4Wona, uyo ngwambula kunyoroka,
wati watondekenge.
Kweni awo mbarunji ŵati ŵaŵenge wamoyo,
kwizira mu chipulikano.#Rom 1.17; Gal 3.11; Heb 10.38
Kumara kwa ŵanthu awo kuti mbarunji chara
5Nadi, vyakuloŵezga#2.5 vyakuloŵezga: Mabayibolo ghanyakhe ghakuti, “usambazi”. vikupuruska,
munthu uyo wakujikuzga kuti wakhalirirenge chara.
Iyo ngwa chigoro nga ndi malo gha ŵakufwa,
kuti wakukhuta chara nga ndi nyifwa.
Iyo wakujiwunjikira mafuko ghose,
ndipo wakuwunjika ŵanthu wose kuŵa ŵakhe.”
6Asi wose aŵa,
ŵamkumutombozga, kumuyuyura na kumuseka kuti,
“Soka kwa uyo wakuwunjika ivyo kuti nvyakhe chara!
Kasi wati wachite ichi mpaka pauli?
Asi wakujinyekezga na katundu uyo watewura!”
7Asi ŵa matewu ŵako, ŵamkukuwukira mwa mabuchibuchi?
Asi ŵamkuwuka mu tulo na kukutenthemiska?
Penepapo iwe ŵamkuŵa chakuskogha kwa iwo.
8Chifukwa iwe waskogha mafuko ghanandi,
ŵanthu awo ŵakharako ŵakukuskogha iwe.
Pakuti iwe wathiska ndopa za ŵanthu,
wachita nkhaza mu charu cha pasi,
ku misumba na ku awo ŵakukhara mwenemumo.
9Soka kwa uyo wakupenjera nyumba yakhe,
chandulo chambula urunji,
uyo wakuzenga nyumba ziweme na kuzikhozga,
kuyezga kuthaska mbumba yakhe ku urwani.
10Iwe wanozgera kumara ŵanthu ŵanandi,
kukhozga soni nyumba yako na kutaya umoyo wako.
11Pakuti libwe la chiliŵa lamkuchemerezga,
ndipo muchiko kufuma mu thabwa wamkuzomerezga.
12Soka kwa uyo wakuzenga msumba pakuthiska ndopa,
uyo wakwamba muzi kwizira mu ubendezi!
13Wonani, asi chikufuma kwa Fumu Mwenenkhongono zose,
kuti ivyo ŵanthu ŵakuteŵetera vimarirenge ku moto,
kuti mafuko ghajivuske na vyawakawaka?
14Pakuti charu cha pasi chizurenge na umanyi,
wa uchindami wa Fumu,
nga ndi umo maji ghakuzulira mu nyanja.#Yes 11.9
15Soka kwa uyo wakumweska ŵazengezgani ŵakhe,
vya mu nkhombo ya ukari wakhe,
ndipo wakuŵaloŵezga
kuti waŵakhozge soni.
16Wamkuzura na muyuyuro
mu malo mwa nchindi.
Imwa, wamwene, na kupenthyapenthya.
Nkhombo iyo yili mu woko la maryero la Fumu,
yamkwiza kwa iwe,
ndipo soni zizamkubenekerera uchindami wako.
17Kusakazika kwa makuni gha ku Lebanoni,
kwizamkukuzinga iwe.
Kukomeka kwa vikoko
kwamkukofya iwe.
Iwe wathiska ndopa za ŵanthu.
Iwe wasakaza charu na misumba
ndiposo na wose awo ŵali mwenemumo.
18Kasi chikozgo chili na chandulo uli?
Pakuti uyo wakachipanga ndi munthu,
ndipo ndi chisulo chakusambizga utesi pera.
Munthu uyo wapanga chikozgo,
wakugomezga mu cheneichi,
kweni ndi vikozgo vyambula kuyowoya!
19Soka kwa uyo wakuyowoya ku chikozgo chakuŵaja, kuti, “Wuka!”
Panji ku libwe lambula kuyowoya, kuti, “Imilira!”
Kasi cheneichi chingapereka uvumbuzi?
Wonani, chabenekerereka waka na golide na siliva,
ndipo mulije muvuchi na pachoko pose mwa icho.
20Kweni Fumu yili mu Nyumba yakhe yakupatulika.
Ŵanthu wose ŵa charu cha pasi,
ŵakhare chete panthazi pakhe.
Currently Selected:
Habakuku 2: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
