Habakuku 1
1
1Agha ndi mazgu agho nchimi Habakuku wakapokera kufuma kwa Chiuta mu mboniwoni.
Habakuku wakusinginika na weruzgi wambula kunyoroka
2Mwe Fumu, kasi ndirombenge wovwiri mpaka pa uli,
ndipo imwe mureke kundipulika?
Panji ndichemerezge kwa imwe kuti, “Nkhaza!”,
ndipo imwe mureke kundithaska?
3Kasi nchifukwa uli mukukhumba kuti ndiwone,
maubendezi agho ŵanthu ŵakuchitirana?
Kasi nchifukwa uli mukukhumba kuti ndiwone suzgo ya ntheura?
Phasulo na nkhaza vili panthazi pane,
mphindano na kulimbana vyazara uku na uku.
4Ntheura dango lagowozgeka,
ndipo weruzgi wakunyoroka kuti ukuwoneka chara.
Pakuti ŵaheni ŵakuŵaruska ŵarunji,
mwakuti weruzgi wakunyoroka ukutindiŵizgikira pasi.
Zgoro la Fumu
5Laŵiskani mukati mu mafuko ndipo muwone,
muti muzizwe chomene.
Pakuti mu mazuŵa ghinu ndizamkuchita mlimo,
uwo mwizamkuwugomezga chara,
nanga munthu yunji wangiza kamwandulirani.#Mil 13.41
6Pakuti Wonani,
nditi ndiwuske ŵaBabuloni,
ŵanthu awo mbakari na lupusu.
Ŵeneaŵa ŵakwenda uku na uku mu charu,
kuya kapoka malo agho kuti ngawo chara.#2 Kar 24.2
7Mbakofya na ŵakutenthemeska,
iwo ŵekha ndiwo weruzgi wakunyoroka,
ndipo ŵakujiwunjikira nchindi pa iwo ŵekha.
8Ŵakavalo ŵawo ŵakuchimbira kuruska ŵanyalubwe,
mbakofya kuruska mphumphi zakutandara na njara,
awo ŵakuzigara ŵakwenda mwakujikuzga.
Nadi, awo ŵakuzigara ŵafumira kutali,
ŵakuwuruka nga ndi nombo,
kuya kakora nyama.
9Wose ŵakwiza kuti ŵachite nkhaza.
Para ŵakwiza wose ŵakopa.
Iwo ŵakuyora waka ŵazga nga ndi muchenga.
10Ŵakuŵayuyura ŵakaronga,
ŵakuŵaseŵereska awo ŵakuwusa.
Ŵakuseka para ŵakuwona malinga,
pakuti iwo ŵakuzenga waka vibumira vya dongo na kupoka linga.
11Penepapo ŵakujumpha nga ndi mphepo na kurutilira,
ŵaheni aŵa, ŵeneawo nkhongono zawo ndizo chiuta wawo.
Habakuku wakusinginikiraso Fumu
12Mwe Fumu, asi ndimwe kufuma ku mutendeko,
mwaŵeneimwe ndimwe Chiuta wane, Mutuŵa wane Yura?
Ise kuti tifwenge chara.
Mwe Fumu, mwimika ŵa charu cha Babuloni,
kuŵa ŵeruzgi.
Imwe, ndimwe Jarawe lithu,
ndipo ndimwe mwaŵimika kupereka chilango ichi.
13Maso ghinu ngatuŵa chomene,
kuti ghangalaŵiska pa uheni chara,
imwe kuti mukurekerera ubendezi chara.
“Kasi nchifuwa uli mwakhara waka chete,
apo iwo ŵakukoma waka ŵanthu,
awo mbarunji kuruska iwo?”
14Imwe mukuŵazgora ŵanthu, kuŵa nga ndi somba za mu nyanja,
nga ndi vyakukhwaŵa ivyo vilije wakuviwusa.
15Muheni wakuziŵeja zose na mbeja,
wakuzitegha na chirepa chakhe,
wakuziwunjika mu mukwawu wakhe,
ntheura wakusekerera na kukondwera.
16Pa chifukwa ichi wakupereka sembe ku mukwawu wakhe,
ndipo wakocha vyakununkhira ku chirepa chakhe,
pakuti na ivi wakukhara makora,
ndipo vyakurya vikumuŵira vinandi.
17Kasi sono warutilirenge kukhutura mukwawu wakhe,
na kukoma mafuko kwambula lusungu?
Currently Selected:
Habakuku 1: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
