Mutendeko 15

Chiuta wakuchita phangano na Abramu

1Pamanyuma pa vyeneivi, mazgu gha Fumu ghakiza kwa Abramu mu mboniwoni kuti, “Ungopanga Abramu, ine ndine chiskango chako. Njombe yako yakuruska yiti yikule chomene.”

2Kweni Abramu wakati, “Mwe Fumu Chiuta, kasi muti mundipenge vichi pakuti ndilije mwana, ndipo muhaliri wa nyumba yane ndi Eliyezere wa ku Damaseko.”

3Abramu wakatiso, “Wonani, mulije kundipa mwana. Ntheura muzga wakubabika mu nyumba yane ndiyo wati waŵenge muhaliri wane.”

4Kweni mazgu gha Fumu ghakiza kwa iyo ghakati, “Muzga uyu kuti ndiyo wati waŵenge muhaliri wako chara. Mwana wako na wako ndiyo wati waŵenge muhaliri wako.” 5Penepapo Fumu yikamutorera kuwaro ndipo yikati, “Laŵiska kuchanya ndipo upende nyenyezi, usange ungamanya kuzipenda.” Penepapo yikati kwa iyo, “Ntheura ndimo ŵamkuŵira ŵa mphapu yako.”#Rom 4.18; Heb 11.12

6Abramu wakapulikana na Fumu. Ntheura pa chifukwa ichi Fumu yikamupima kuti ndi murunji.#Rom 4.3; Gal 3.6; Yak 2.23

7Yikatiso kwa iyo, “Ine ndine Fumu, iyo yikakufumya ku Uru mu charu cha Babuloni, kuti ndikupe charu ichi kuti chiŵe chako.”

8Kweni Abramu wakati, “Mwe Fumu Chiuta, kasi nditi ndimanye uli kuti chizamkuŵa chane?”

9 Fumu yikati kwa iyo, “Unditorere mwana wa ng'ombe mwanakazi wa virimika vitatu, mbuzi yanakazi ya virimika vitatu, mberere yanarume wa virimika vitatu, nkhunda na njiŵa yichoko.” 10Abramu wakiza navyo vyose ivi kwa Fumu, na kuvidumula paŵiri. Wakachigoneka chipitika chilichose kuthyana waka na chinyakhe. Kweni viyuni vira wakavidumula paŵiri chara. 11Para makuŵi ghakakhiliranga pa nyama Abramu wakaghaŵinganga.

12Para dazi likanjiranga, Abramu wakaŵa na tulo tuzitu chomene, ndipo mdima ukuru na wakofya ukamuwira.#Yob 4.13-14 13Sono Fumu yikati kwa Abramu, “Umanyiske nadi kuti ŵa mphapu yako ŵamkuŵa ŵalendo mu charu icho kuti nchawo chara, ŵamkuŵa ŵazga kwenekuko ndipo ŵamkunyekezgeka virimika 400.#Kuf 1.1-14; Mil 7.6 14Kweni ine ndamkweruzga mtundu wa ŵanthu uwo ŵamkuwuteŵetera, ndipo pamanyuma ŵamkufuma na vyuma vinandi.#Kuf 12.40-41; Mil 7.7 15Iwe wamwene uti wizamkufwa mu mutende. Wizamkuŵikika mu dindi ndipo ndiwe muchekuru chomene. 16Kweni ŵa muwiro wa chinayi ndiwo ŵamkuwereraso kuno, pakuti ubendezi wa ŵaAmori undakwanire.”

17Likati lanjira dazi ndipo kukaŵa mdima, Abramu wakawona josi likusunkha na chenje cha moto chakulilima vikajumphanga pakati pa vipikita vira vya nyama. 18Pa zuŵa lenelira Fumu yikapangana na Abramu, yikati, “Ku mphapu yako ndiko ndapereka charu ichi, kwamba ku mronga wa ku Eguputo kuya kafika ku mronga ukuru, mronga wa Yufurate,#Mil 7.5 19charu cha ŵaKeni, ŵaKenizi, ŵaKadimoni, 20ŵaHiti, ŵaPerezi, ŵaRefayimu, 21ŵaAmori, ŵaKanani, ŵaGirigashi, na ŵaYebusi.”

Currently Selected:

Mutendeko 15: Tumbuka

Highlight

Copy