Amosi 8
8
Amosi wakuwona chidunga cha vipambi
1 Fumu Chiuta wakandirongora ichi mu mboniwoni: Pakaŵa chidunga cha vipambi vya chihanya. 2Fumu yikandifumba yikati, “Amosi, kasi ukuwonachi?” Ine nkhazgora nkhati, “Chidunga cha vipambi vya chihanya.” Ntheura Fumu yikati kwa ine,
“Umaliro waŵizira ŵanthu ŵane ŵaIsraele.
Ine kuti ndamkuŵagowokeraso chara.
3Pa zuŵa ilo sumu za mu Nyumba ya Chiuta
zamkuzgoka za chitengero.
Vitanda vyamkuŵa vinandi,
vyamkuponyeka waka chisisi palipose.”
Ntheura ndimo Fumu Chiuta wakuyowoyera.
Kulangika kwa ŵaIsraele
4Amosi wakati,
“Pulikani ivi, imwe mukutindiŵizgira pasi ŵasokwano,
imwe mukukandirizgira pasi ŵakavu ŵa mu charu ichi.
5Imwe mukuti,
‘Kasi chiphikiro cha kuthwasa kwa mwezi chimarenge pauli,
mwakuti tiguliske mbuto zithu?
Zuŵa la sabata nalo limarenge pauli,
mwakuti tiguliske tirigu withu,
kuti tichepeske debe na kukuzga mtengo,
mwakuti tibire ŵanthu na vyakupimira vyakupusika,
6kuti ŵakavu tiŵagule na ndarama ya siliva,
ŵasokwano na skapato ziŵiri,
na kuguliska gaga wa tirigu wuwo?’ ”
7 Fumu yarapa pakujikuzga kwa Yakhobe kuti,
“Nadidi, kuti ndamkuruwapo chara
nanga nkhamoza ka ivyo wakuchita.
8Charu chamkusunkhunyika chifukwa cha vyeneivi.
Munthu yose uyo wakukhara mwenemumo wamkutengera.
Charu chamkufuruka nga maji gha mronga wa Nayelo.
Chamkuyegheka uku na uku na kubira
nga ndi mronga wa Nayelo wa charu cha Eguputo.”
9 Fumu Chiuta wakuti,
“Mu zuŵa leneilo ndizamkuzgora dazi
kuti linjire na muhanya pakati
na kuŵika chisi pa charu
apo dazi lichali kuŵala.
10Viphikiro vyinu ndamkuvizgora
kuŵa chitengero,
sumu zinu ndamkuzizgora
kuŵa chiliro.
Munthu waliyose ndamkumuvwarika chigudulu,
ndipo waliyose wamkumeteka mupara.
Mwamkuŵa nga ndi mupapi
uyo wakutengerera mwana wakhe kananda.
Zuŵa ili lizamkuŵa la viphyo vikuru nadi
mpaka umaliro wakhe.”
11 Fumu Chiuta wakuti,
“Mazuŵa ghakwiza,
apo ndizamkutuma njara pa charu.
Yizamkuŵa njara ya chakurya chara
nesi nyota ya maji.
Kweni yizamkuŵa njara
yakukhumba kupulika mazgu gha Fumu.
12Ŵanthu ŵamkwendendeka
kufuma ku nyanja iyi kuya kafika ku nyanja yinyakhe,
kufuma ku mpoto kuya kafika ku mafumiro gha dazi.
Ŵizamkuchimbilira uku na uko,
kupenjerera mazgu gha Fumu,
kweni kuti ŵizamkughasanga chara.
13Pa zuŵa ilo, ŵamwali ŵakulangwa na ŵakutowa
na ŵanyamata ŵa mathupi ghaweme,
ŵizamkufwa lunkhuŵa chifukwa cha nyota.
14Awo ŵakuchita chirapo mwa Ashima,
chiuta ngoza wa ku Samariya,
na kuyowoya kuti, ‘Iwe Dani, nkhurapira mwa chiuta wako wamoyo,’
panji kuti, ‘Nkhurapira mu nthowa yakuya ku Beyeresheba,’
wose aŵa ŵizamkuwa kwambula kuwukaso.”
Currently Selected:
Amosi 8: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
