Amosi 4
4
Kususkika kwa ŵanakazi ŵa ku Samariya
1Pulikani mazgu agha,
imwe ŵanakazi ŵakututuŵa nga ndi ng'ombe za ku Bashani,
mwaŵeneimwe mukukhara ku Phiri laSamariya.
Imwe mukuyuzga ŵakavu,
mukutindiŵizgira pasi ŵasokwano,
na kuyowoya ku ŵafumu ŵinu kuti,
“Tipani vyakumwa timwenge!”
2Fumu Chiuta, mu utuŵa wakhe warapa kuti,
“Mazuŵa ghakwiza ghakumulangirani,
apo ŵarwani ŵizamkumukoloworani na mbeja.
Inya ŵizamkumukoloworani na zimbeja za somba,
mpaka pa wa umaliro.
3Mwizamkufumira mu vidangazi vya malinga,
waliyose pa chidangazi icho warazgapo,
na kuponyeka pa Phiri la Harimoni.”
Ntheura ndimo yikuyowoyera Fumu.
ŴaIsraele ŵakutondeka kusambirapo kanthu
4“Zaninge ku Betele
na kuchitirako uheni winu.
Zaniso ku Giligala
na kurutilira kwananga.
Zani nazo sembe zinu mulenje uliwose
na vyakhumi vyinu pa mazuŵa ghatatu ghali ghose.
5Perekani sembe ya chingwa cha chirungo
kuti muwonge Chiuta.
Yowoyani na kupharazga pakweru
ivyo mwapereka mu wanangwa,
pakuti ndicho mukutemwa kuchita, Mwe ŵaIsraele.”
Ntheura ndimo Fumu Chiuta wakuyowoyera.
6“Ine ndine nkhalangula
kuti muŵe njara mu misumba yinu yose,
kuti muŵavye chakurya mu malo ghinu ghose.
Ndipouli imwe kuti mukawerera kwa ine chara.”
Ntheura ndimo yikuyowoyera Fumu.
7“Ndine nkhamunorani vura,
apo yikati yakharako myezi yitatu kuti muvune.
Ndine nkharokweska vura mu msumba umoza,
na kuyikanizga kurokwa mu msumba unyakhe.
Nkharokweska vura mu munda umoza,
ndipo mu munda umo yikareka kurokwamo, mbuto zikafota.
8Ŵanthu ŵa misumba yiŵiri panji yitatu
ŵakarutanga ku msumba umoza kuya kamwa maji,
kweni kuti ghakaŵakhorweskanga chara.
Ndipouli imwe kuti mukawerera kwa ine chara.”
Ntheura ndimo yikuyowoyera Fumu.
9“Nkhatuma nthenda
yakuŵawura mbuto zinu na ya chinoni.
Nkhomizga mbuto za mu minda yinu
ndiposo na za mu minda ya mpheska.
Zombe likapurura makuni
gha vikuyu na gha maolive.
Ndipouli imwe kuti mukawerera kwa ine chara.”
Ntheura ndimo yikuyowoyera Fumu.
10“Nkhatuma vilengo mukati mwinu
nga ndi vira vya mu charu cha Eguputo.
Nkhakomeska ŵawukirano ŵinu ku nkhondo,
na kupereka mahachi yinu ku ŵarwani.
Nkhamununkhiskani na sungu la vitanda
la kufumira mu misasa yinu.
Ndipouli imwe kuti mukawerera kwa ine chara.”
Ntheura ndimo yikuyowoyera Fumu.
11“Ŵanji ŵa imwe nkhaŵamara petu
nga ndi umo nkhamalira petu Sodomu na Gomora,
ndipo mwe mukaŵa nga ndi kachisinga
ako ŵaphura pa moto.
Ndipouli imwe kuti mukawerera kwa ine chara.”
Ntheura ndimo yikuyowoyera Fumu.#Mut 19.24
12“Sono ndizamkuchita namwe ntheura, Mwe ŵaIsraele.
Pakuti ndizamkumuchitirani ivi,
ipo muŵe ŵakunozgeka
kwiza kakumana na Chiuta winu, Mwe ŵaIsraele.”
13Sono pulikani.
Chiuta uyo wakuwumba mapiri na kulenga mphepo,
ndiyo wakumuvumbulira munthu maghanoghano ghakhe,
ndiyo wakuzgora mulenje kuti uŵe chisi
ndipo ndiyo wakwenda mu mapiri gha charu cha pasi.
Zina lakhe ndi Fumu Chiuta Mwenenkhongono zose.
Currently Selected:
Amosi 4: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
