Milimo ya Ŵakutumika 25

Paulosi wakweruzgika na Porokiyo Fesito

1 Fesito wakati wafika mu chigaŵa icho, ndipo ghakati ghajumphapo mazuŵa ghatatu, wakakwerera ku Yerusalemu kufuma ku Kesareya. 2Ŵasofi ŵarara na ŵakuruŵakuru ŵa ŵaYuda, ŵakiza na kumuphalira ivyo ŵakamupacha navyo Paulosi. 3Ŵakamuŵeya nga ndi mwaŵi wa pa dera kuti waŵatumire Paulosi ku Yerusalemu, kweni ŵakanozgera kumukhazga pa nthowa kuti ŵamukome. 4Fesito wakazgora wakati, “Paulosi wakhalirenge mu gadi ku Kesareya, kweni ine ndirutenge kwenekura sonosono. 5Rekani ŵanthu awo ŵali na mazaza mwa imwe ŵikhe na ine ku Kesareya, ndipo usange munthu uyo wali nayo na mrandu, ŵakamupache kwenekura.”

6Fesito wakati watandara nawo mazuŵa ghankhonde na ghatatu panji khumi, wakakhilira ku Kesareya. Na machero ghakhe, Fesito wakakhara mu mphara pa mupando wa kweruzgirapo, ndipo wakalangula kuti ŵize nayo Paulosi. 7Wakati wafika, ŵaYuda awo ŵakafuma ku Yerusalemu ŵakimilira na kumuzingirizga ndipo ŵakamupacha na vinthu vya kofya vinandi, vyeneivyo ŵakaŵavye ukaboni wakhe. 8Kweni Paulosi wakajivikirira wakati, “Ndilije kuchita kanthu kaheni kwanangira marango gha ŵaYuda, panji Nyumba ya Chiuta, panjiso karonga wa ku Romu.”

9Fesito pakukhumba kukondweska ŵaYuda, wakamufumba Paulosi wakati, “Kasi ukukhumba kuruta ku Yerusalemu kuti ndiko ukeruzgikire panthazi pane pa ivyo ŵakukupacha navyo?”

10Kweni Paulosi wakazgora wakati, “Ine nkhwimilira panthazi pa weruzgi wa karonga wa ku Romu, penepapo nkhwenera kweruzgikira. Ine ndilije kuŵachitira kaheni ŵaYuda, nga ndi umo imwe namwe mukumanyira makora ghene. 11Usange ndili wakwananga, ndipo ndachita kanthu kakunenereska nyifwa, kuti nkhukana kufwa chara. Kweni usange mulije unenesko mu ivyo ŵakundipacha navyo, palije munthu uyo wangandipereka kwa iwo. Mrandu wane urute kwa karonga wa ku Romu.”

12Fesito wakati wadumbiskana na awo ŵakamovwiranga pa weruzgi wa mirandu, wakati, “Wayowoya kuti mrandu wako urute kwa karonga wa ku Romu, ntheura kwa karonga wa ku Romu ndiko urutenge.”

Paulosi panthazi pa Agripa na Berenike

13Ghakati ghajumphapo mazuŵa ghanyakhe, Karonga Agripa na Berenike ŵakafika ku Kesareya kwiza kamupokerera Fesito. 14Pakuti ŵakakharako mazuŵa ghanandi, Fesito wakamwandulira Karonga mrandu wa Paulosi wakati, “Walipo munthu yunji mweneuyo Felike wakamureka mu gadi. 15Para nkhaŵa mu Yerusalemu, ŵasofi ŵarara na ŵarara ŵa ŵaYuda, ŵakandiphalira vya iyo na kundiromba kuti ndimweruzge kuti ngwakwananga. 16Kweni nkhaŵaphalira kuti ndi luso la ŵaRoma chara kupereka munthu uyo ŵakumupacha na mrandu ukuru pambere wandakumane na awo ŵakumupacha maso na maso kuti waŵe na mwaŵi wakujivikirira pa mrandu wakhe. 17Ntheura apo ŵakakumana pamoza kuno, kuti nkhaziwurika chara, kweni na machero ghakhe, nkhakhara pa chitengo cha kweruzgirapo. Nkhalangula kuti ŵize nayo munthu yura. 18Apo ŵakamupachanga ŵakimilira, ŵakapharapo chara nanga nchimoza cha vifukwa vikuru ivyo nkhagomezganga kuti ŵangaphara. 19Kweni ŵakasuskana nayo vya chisopo chawo, na vya munthu yunji Yesu, mweneuyo wali kufwa, ndipo Paulosi wakuti ngwamoyo. 20Ine nkhazgeŵa na umo ndingasandira vyeneivi. Ntheura nkhamufumba Paulosi usange wakakhumbanga kuruta ku Yerusalemu kuti wakasuskane nawo kwenekura pa ivyo ŵakamupacha navyo. 21Kweni apo Paulosi wakaŵeya kuti wasungike mu nyumba yakusungamo ŵa mirandu, apo wakulindizga na udumuliro wa karonga wa ku Romu, nkhamulangula kuti wakolerekere pasi danga mpaka apo nkhenera kumutumira kwa karonga wa ku Romu.”

22Ndipo Agripa wakati kwa Fesito, “Ine nane nkhukhumba kumupulika munthu uyu.”

Fesito wakazgora wakati, “Wizamkumupulika na machero.”

23Na machero ghakhe, Karonga Agripa na muwoli wakhe Berenike, ŵakiza na mazaza ghose gha ufumu. Ŵakanjira mu chipinda cha kweruzgiramo mirandu pamoza na ŵarongozgi ŵa nkhondo, na ŵanthu ŵakuzirwa ŵa mu msumba. Ndipo Fesito wakati walangula Paulosi ŵakiza nayo. 24Fesito wakati, “Karonga Agripa, na mose imwe muli pano pamoza nase, mukuwona munthu uyu, mweneuyo ŵaYuda wose, ku Yerusalemu na kuno wuwo, ŵakadandaulanga nayo kwa ine, ndipo ŵakachemerezga kuti wakwenera kukharaso wamoyo chara. 25Kweni ine nkhasanga kuti wakaŵavye kuchita kanthu kakwenerera chilango cha nyifwa. Sono pakuti iyomwene wakati mrandu wakhe urute kwa karonga wa ku Romu, nkhadumula kumutuma kwenekuko. 26Kweni ine kuti ndili na kanthu kenecho chara pa munthu uyu, kakuti ndilembere karonga wa ku Romu na vya iyo. Ntheura ndamutorera panthazi pinu, chomenechomene pa imwe Karonga Agripa, mwakuti para tamufumbisiska pa mrandu wakhe, ndiŵe na kanthu kakuti ndilembe. 27Pakuti kukuwoneka kwa ine nga nkhupusa kutuma mukayidi kwambula kuphara makora vifukwa vya mrandu wakhe.”

Currently Selected:

Milimo ya Ŵakutumika 25: Tumbuka

Highlight

Copy