Mapisarema 40
40
Mufaro womunhu anotenda kuna Jehovha
Kumutungamiriri wokuimba. Pisarema raDhavhidhi.
1Ndakarindira-rindira Jehovha;
Akarerekera kwandiri, akanzwa kuchema kwangu.
2Akandibudisawo pagomba rokuparadzwa,
nomudziva ramatope;
Akamisa tsoka dzangu padombo,
akasimbisa kufamba kwangu.
3Akaisa rwiyo rutsva mumuromo mangu,
rwokurumbidza Mwari wedu narwo;
Vazhinji vachazviona, vachitya,
Vachavimba naJehovha.
4Akakomborerwa anoita Jehovha chivando chake.
Asina hanya navanozvikudza,
navanotsaukira kunhema.
5Jehovha Mwari wangu, mabasa enyu,
anoshamisa, amakaita, mazhinji,
Nemifungo yenyu kwatiri;
Hapana angaenzaniswa nemi.
Kana ndikada kuzvidudzira nokuzvireva,
Hazvingaverengwi nokuwanda kwazvo.
6Imi hamufadzwi nezvibayiro nezvipiriso;
Makandidziurira nzeve dzangu;
Zvipiriso zvinopiswa nezvezvivi hamuna kuzvireva.
7Ipapo ndakati, “Tarirai, ndauya;
Parugwaro rwakapetwa ndakazvirairwa,
8Ndinofara kwazvo kuita kuda kwenyu,
Mwari wangu;
Zvirokwazvo murayiro wenyu uri
mumwoyo mangu.”
9Ndakaparidza mashoko omufaro paungano huru;
Tarirai, handingadzori miromo yangu,
Jehovha, munozviziva.
10Handina kuvanza kururama kwenyu mumwoyo mangu;
Ndakadudzira kutendeka kwenyu nokuponesa kwenyu;
Handina kuvanzira ungano huru
unyoro hwenyu nezvokwadi yenyu.
11Jehovha, imi hamungandinyimi ngoni dzenyu;
Unyoro hwenyu nezvokwadi yenyu
zvichandichengeta nguva dzose.
12Nokuti madambudzo asingaverengwi akandikomberedza,
Zvakaipa zvangu zvakandibata, naizvozvo
handigoni kutarira kumusoro;
Zvakawanda kupfuura vhudzi romusoro wangu,
ndapera mwoyo.
13Jehovha, ngazvikufadzei kundirwira;
Kurumidzai kundibatsira, Jehovha.
14Ngavanyadziswe, ngavazvidzwe pamwechete.
Ivo vanotsvaka mweya wangu kuti vauparadze;
Ngavadzoserwe shure, vashorwe
Ivo vanofarira kundikuvadza.
15Ngavavhunduswe nokuda kwenyadzi dzavo
Ivo vanoti kwandiri, “Hekani, hekani waro!”
16Vose vanokutsvakai ngavafarise vave
nomufaro mamuri;
Vanoda kuponesa kwenyu ngavarambe vachiti,
“Jehovha ngaakudzwe!”
17Asi ini ndiri murombo nomushaiwi;
Kunyange zvakadaro Ishe anondifunga;
Imi muri mubatsiri wangu nomurwiri wangu;
Regai kunonoka, Mwari wangu.
Currently Selected:
Mapisarema 40: SNA2002
Highlight
Share
Copy
Want to have your highlights saved across all your devices? Sign up or sign in
© Shona Union Version 2002
