MATTHAI 8

Vaethyakaepaw A Dansah

(Mar 1.40-45; Luk 5.12-16)

1Mua kyate Jesu he a rungbung tuh myarya lungpaw ccungccaw zapi nynh amaw kha a zui hae. 2Te vaethyakaepaw lu kheit yn thua zah amaw malang a ccukharutungte, “Bawipaw, na ry zetuh kae hynh nae thyaasah kho,” a cipya. 3Jesu nynh a kuih dyng zah tuh-e paw kha hae zah, “Ka ry, thyaa ccavae!” a cipya. Vaekheihmawte a vaethya ccinaw tuh phe athyaa. 4Tukoute Jesu nynh, “E konglang hynh humhung kya mah na ho khyh nawlan la raeringkuh; thuasalama ranpibawi kalan la cceih lah la dosakuh; te ccungccaw hae kya na dannawpaw ccaekia lang Moses kawbya thyhte silawnaw kha la rae,” a cipya.#Lev 14.1-32

Rhawbawipaw Zynnaw

(Luk 7.1-10)

5Jesu tuh Kapernaum khua lang he a tee tuh, rhawbawipaw lu kheit nynh amaw kalan yn thua zah, 6“Bawipaw, ka ryalahtupaw tuh kuihccuchite ccih zah innvaw phang a huekuh, myarya a ccih,” cite bawmnaw a ngiaku. 7Jesu nynh, “Kae cceih cih zah ka dansah cih,” a cipya. 8Rhawbawipaw nynh, “Bawipaw, nang nynh ka inn lang tee lante kae tuh ka ngaekuh khyh; bya te kyalya kawpya lah ka ryalahtupaw tuh a dan cih. 9Pawccecize kae mah ka luki e bawi hae kaw te a umpaw ka thua zah ka kuihkaw mah rhawkaw hae a um hae; te lu kheit kha, ‘Cceih,’ ka ci ze a cceih; ccangpaw lu kheit kha, ‘Rang,’ ka ci ze yn thua; te ka ryalahtupaw kha, ‘E hynh cyih,’ ka ci ze a cyih,” cite a hopya. 10Jesu nynh tuh-e bya kha he a thae tuh a ngaeangthua zah amaw a zui hae paw kha, “Byaccaccing kae hopya oh, hynhcih alepaw zynnaw tuh Israel hae kya heize ka muih boi khyh. 11Nanning kae hopya oh, ccungccaw patae tuh nithua langte, niccaw langte oun thua cih hae zah vaawlang peenaw kya Abraham, Isak te Jakob ryte a aekheih cih hae.#Luk 13.29 12Thuasalama vaawlang peenaw rho a ccou lan hae paw paleih kha tuh atolang mohnaw lungkhu lang vua athua cih hae, tuin kya tuh rawkhuinaw te hawzynaw a um cih,” a cipya hae.#Mat 22.13, 25.30; Luk 13.28 13Te Jesu nynh rhawbawipaw kha, “La cceih ccavae; na zyn thyhte cyipya thua sah,” a cipya. A ryalahtupaw tuh tuh-e ccyh ccaccei kya phe a dan.

Ccungccaw Patae A Dansah hae

(Mar 1.29-34; Luk 4.38-41)

14Jesu nynh Peter inn lungkhu lang he a tee tuh, Peter a zu nung tuh ccih zah a huekupaw kha a muih. 15Te Jesu nynh a kuih kha hae zah a ccinaw tuh phe dan; te aning nynh thokuh zah Jesu kha a do-oih vae. 16Zete he thua tuh ccungccaw hae nynh raerangsaro bahkuh hae paw patae kha Jesu kalan oun cciakhae hae; Jesu nynh a bya kaw kheit te ahoy leipaw muisaw hae kha dee zah ngeccih hae balyn kha a dansah hae. 17Hynh-e hynh profeh Isaiah nynh, “Aning nynh aening vaemaw kha lah zah, aening ccinaw kha a phu,” cite a hopaw bya accing nawlan nynh thua. #Isa 53.4

Jesu A Zui Cih hae paw

(Luk 9.57-62)

18Jesu nynh a pepan e myarya lungpaw ccungccaw zapi kha he a muih tuh khuraw lang ccia lan kaw a pya hae. 19Te kawbya sazae lu kheit tuh amaw kalan yn thua zah, “Sazae, na ccianaw miakaw lang kae zui cih,” a cipya. 20Jesu nynh, “Suizaw hae nynh karung hoi hae zah vaawlang e pavaw hae nynh bu a hoi hae; thuasalama Ccungccaw Ccapaw tuh a lu nungnaw sanmah hoi khyh,” a cipya. 21Ccangpaw a zuitupaw nynh, “Bawipaw, masaty ka la cceih sah lah ka paaw kha ka la uh hin sah,” a cipya. 22Thuasalama Jesu nynh, “Kamaw yn zui, michi hae nynh mih michi hae kha la uh hae sah,” a cipya.

Jesu nynh Khise A Daesah

(Mar 4.35-41; Luk 8.22-25)

23Jesu tuh kohlung lungkhu lang tee zah a zuitu hae nynh a zui hae. 24Rili kya myarya rupaw khise yn tho zah kohlung tuh tuileih nynh vyavya a vu, thuasalama Jesu tuh marya a ih. 25Te a zuitu hae nynh amaw kha ccianuate tho hae zah, “Bawipaw, kaening oun khumtua, aening ah chih vae cih oh!” a cipya hae. 26Jesu nynh minmin kha, “Pou zynnaw zya hae paw, pawccemou na ri oh?” a cipya hae. Tuinte thokuh zah khise te tuileih tuh daenaw kaw pya hae zah zya adae hae. 27Te minmin tuh mih ngaeangthua zah, “E paw hynh pawcihawpaw ccungccaw mou? Khise te tuileih nynh heize a kaw a ngae hae!” a ci hae.

Raerangsaro Bahkuh hae paw

(Mar 5.1-20; Luk 8.26-39)

28Jesu tuh rili khuraw lang Gadara ram he a thua te, raerangsaro bahkuh hae paw lu ning nynh shawku kyate oun pou hae zah amaw kha oun tungku hae; minmin tuh ri lan myarya um hae zah humhung nynh mah tuh-e laanpi te cceih ngan khyh hae. 29Te minmin nynh vaekheihmawte, “Pachia Ccapaw, nang te kaening tuh pawmou ah sekuh oh? Accyh azaw mawze kaening hynh vawsaw pya khylan tou hynhlang nae thua?” cite a sia hae. 30Te minmin kyate eih asaw leinaw khe rampaeekuh hae paw voh phu kheit a um. 31Te raerangsaro hae nynh, “Nang nynh kaening hynh nae dee ze, voh hae lungkhu lang beih oun teesah,” cite a ngiaku hae. 32Jesu nynh minmin kha, “Cceih oh!” a cipya hae. Tukeiccuze minmin tuh pou hae zah voh hae lungkhu lang a tee hae; voh hae tuh mih balynte apannaw lang thawmawte ccuebung hae zah rili lungkhu lang phungkuh hae zah tui kya pong a chih hae. 33Voh a rintu hae tuh ccue hae zah khua lungkhu lang a tee hae, te raerangsaro bahkuh hae paw kya acyihkuhpaw balyn kha a hopya hae. 34Khuaccaaw hae balyn nynh Jesu te tungku lan oun cceih hae zah amaw kha he a muih hae te, mih ram kyate a pou nawlan a ngia hae.

Currently Selected:

MATTHAI 8: ZB16

Highlight

Copy