MATTHAI 10

Locceihtu Lu Haw Lae Ning A Po

(Mar 3.13-19; Luk 6.12-16)

1Jesu nynh a zuitu hae lu haw lae ning kha amaw kalan ko hae zah athyaa leipaw muisaw hae dee khonaw te ccinaw aphuinphuin te ccihawnaw miakaw dansah khonaw kaw a pya hae. 2Locceihtu hae lu haw lae ning min tuh: masaty, Peter cite a ko hae paw Simon, te a neitaw Andru, Zebedi ccapaw James, te a neitaw Johan; 3Filip te Bartholomew; Thomas te ngunto khoipaw Matthai; Alfeas ccapaw James te Taddias; 4Kanaan khuapaw Simon, te Jesu a pheetupaw Judas Iskariot nynh thua hae.

Locceihtu Lu haw Lae Ning A Saw

(Mar 6.7-13; Luk 9.1-6)

5E lu haw lae ning hynh Jesu nynh saw hae zah hynhte kaw a pya hae: “Zenta hae ram lang la cceih nan oh, Samaria hae khua lang mah la tee nan oh. 6Israel minphuin kyaze azopaw tuu hae kalan palia la cceih oh. 7Na ccia vae oh ze, ‘Vaawlang peenaw tuh anae vae,’ cite thehoypaw kha la siakhae oh.#Luk 10.4-12 8Ngeccih hae kha la dansah oh, a chih hae paw kha la thoosah oh, vaethyakae hae paw kha la thyaasah oh, raerangsaro hae kha la dee oh. Nanning tuh amee pya leite na mue oh zah, amee lawku leite la pya oh. 9Nae phuabu kya sui, ngun te sohinphua kha la sangkuh nan oh. 10Khuaccong nawlan sohrae, angki zung ning, phanah hae te hoitang hae mah phukuh nan oh; pawccecize ryalahtupaw tuh looh dang lan accan.#1Ko 9.14; 1Ti 5.18 11Khuapi lang thuasah, khua taraw lang thuasah na tee vae oh ze, tuin khua kya angaekuhpaw innccong kha la khia oh lah tuin khua kyate na pou mawlaezung oh tuin kya la um oh. 12Inn lungkhu lang na tee vae oh ze, ‘Nae kya daenaw um sah,’ cite la beih oh. 13Tuh-e inn tuh angaeku ze nae kya-e daenaw tuh tuh-e innbyn hae kya la um sah; thuasalama angaeku khyh ze, nae kya-e daenaw tuh naemaw kalan la ki sah. 14Te humhung zemah nanning kha innccong ae doih oh zah nae bya kha mah a ngae khyh ze, tuh-e inn, tuhkhyhze tuh-e khuapi kyate he na pou oh te, nae ccu kya-e vuiping kha la khuanua sya oh.#Loc 13.51 15Byaccaccing kae hopya oh, byapia nin kya tuh-e khuapi hanlan laeze Sodom te Gomorrah khua hanlan ngaesang kho a umhua cih.#Mat 11.24; Gen 19.24-28

Tuaasahkunaw A um cih

(Mar 13.9-13; Luk 21.12-17)

16“Ngaetua oh! Suizaw hae laku tuu hae saw hawte nanning kha kae saw oh, tukeiccuze hupaw hawte nae lunghaw sah lah vahu hawte nae lungne sah.#Luk 10.3 17Ccungccaw hae kha la raeringkuh oh; pawccecize minmin nynh zung lang ae ap cih oh zah mih sinakok hae kya ae bua cih oh.#Mar 13.9-11; Luk 12.11-12, 21.12-15 18Kae ka keiccuze ram uktu hae te siapharan hae malang ae thuakhae cih oh zah, minmin te Zenta hae kya ccaekia lang na tang cih oh. 19Minmin nynh he ae ap vae oh ze, pawmou ka ho cih, pawtemou ka ho cih cipaw nae lungvawsaw nan sah; pawccecize tuh-e ccyh kya na ho lan oh paw kha pya na thua cih oh. 20Pawccecize a ho cih paw tuh naemaw thua khyh, nae Paaw Muisaw nynh nanning kyate a ho cih. 21Uno nynh a uno toulou kha chinaw kalan yn ap cih, paaw nynh a ccaaw kha yn ap cih; ccaaw hae nynh nungpaaw hae kha oun rawse cih hae zah minmin kha oun chisah cih hae.#Mar 13.12; Luk 21.16 22Kae ka min keiccuze ccungccaw balyn nynh nanning kha ae hua cih oh. Thuasalama athangnaw cia a tynpaw tuh khum athua cih.#Mat 24.9, 13; Mar 13.13; Luk 21.17 23Khua khuakheit kya ae tuaa ae sah oh ze, khua ccanglang la ccue oh; pawccecize byaccaccing kae hopya oh, Ccungccaw Ccapaw yn thua maw nanning nynh Israel khua miakaw kalan na cceih kou lan khyh oh.

24“Siaimua tuh a sazae laeze thyahua khyh, see mah a bawipaw luki um khyh.#Luk 6.40; Joh 13.16, 15.20 25Siaimua nynh a sazae hawte athua ze azaw vae, see mah a bawipaw hawte athua ze azaw vae. Minmin nynh inn hoitu kha Beelzebul cite a ko hae ze a innbyn hae thathy tuh athah huapaw min te khaw a ko vae cih hae!#Mat 9.34, 12.24; Mar 3.22; Luk 11.15

Hummou Ri lan

(Luk 12.2-7)

26“Tukeiccuze minmin kha la rih nan oh; pawccecize alangkuh lei lante thuruhpaw miakaw kha langsah athua cih zah, khongpaw miakaw kha hungpya athua cih.#Mar 4.22; Luk 8.17 27Mohnaw kya kae hopya oh paw kha awnaw kya la ho oh; nae nakaring kya zya na thae oh paw kha innccukaly kyate la ho oh. 28Pyn tuh theih kho salamah muisaw a theih kho lei hae paw kha la rih nan oh; muisaw te pyn kha parouhte hell kya a roh khopaw raw kha la rih oh. 29Rithya sa ning kha phuapia pia kheit lang zua khyh hae tou? Tuh-e rithya sa kheit sanmah nae Paaw kaw leite laekhu lang ccah lan khyh. 30Nae lu kya-e nae sangrua kha heize marya ria athua. 31Tukeiccuze rih nan oh, nanning tuh rithya patae laeze nae phutehua.

Khri Pankhaenaw te Vuanaw

(Luk 12.8-12)

32“Humhung zemah ccungccaw hae malang kae kha ccaekia yn khan zetuh tuh-e paw kha vaawlang umpaw ka Paaw malang ccaekia ka khanru cih. 33Thuasalama humhung zemah ccungccaw hae malang kamaw kha yn vuapaw tuh vaawlang umpaw ka Paaw malang kae nynh mah ka vuaru cih.#2Ti 2.12

Daenaw Thua Khyh, Thaloi

(Luk 12.51-53, 14.26-27)

34“Laephi vawlan daenaw thuakhae khylan nynh yn thua cite tua nan oh, daenaw thuakhae khylan kae thua khyh, thaloi saw khylan nynh kae thua.

35Ccapaw nynh a paaw,

ccanung nynh a nung,

monung nynh a ninnung kha

rawsesah khylan nynh kae thua.#Mik 7.6

36Amaw a rhaw hae tuh

amaw a innbyn hae toulou kha

yn thua cih.

37Humhung zemah kae laeze a paaw khyhze a nung a sungsah huapaw tuh kae te ngaekuh khyh; humhung zemah kae laeze a ccapaw khyhze a ccanung a sungsah huapaw tuh kae te ngaekuh khyh. 38Humhung zemah amaw a vaelantung kha puihku leite kae yn zuipaw tuh kae te ngaekuh khyh.#Mat 16.24; Mar 8.34; Luk 9.23 39A hiinnaw a muihkuhpaw ccungccaw tuh hiinnaw kha a shung cih, kae ka keiccuze a hiinnaw a shungpaw tuh hiinnaw kha a muihkuh cih.#Mat 16.25; Mar 8.35; Luk 9.24, 17.33; Joh 12.25

Zuitu Do-oihnaw Mee Lasung

(Mar 9.41)

40“Humhung zemah nanning leh ae khan oh paw tuh kae kha leh yn khanpaw nynh thua, te humhung zemah kae kha leh yn khanpaw tuh kae yn sawtupaw kha leh a khanpaw nynh thua.#Mar 9.37; Luk 9.48, 10.16; Joh 13.20 41Humhung zemah profeh lu kheit kha profeh athua keiccuze leh a khanpaw tuh profeh kya-e lasung kha a mue cih, te humhung zemah miding lu kheit kha miding athua keiccuze leh a khanpaw tuh midingpaw kya-e lasung kha a mue cih, 42byaccaccing kae hopya oh, humhung zemah hynh-e hae kyaze adih huapaw kha ka zuitu athua keiccuze tuikyaa banang nang kheit a pyapaw tuh a ryalaw mee shung lan khyh,” a cipya hae.

Currently Selected:

MATTHAI 10: ZB16

Highlight

Copy