LUKA 17

Seinaw

(Mat 18.6-7, 21-22; Mar 9.42)

1Jesu nynh zuitu hae kha, “Seinaw lungkhu lang a ccawsahpaw uccaw hae tuh palei a um cih, thuasalama tuh-e uccaw hae a umsahtupaw hanlan ngaethya lan kou um! 2E imua taraw hae lukhakheit kha seinaw a raesah lae tuh a nging kyakhe mianawpaw lung kha sae lan zah rili lungkhu lang ccaring vua lanze amaw hanlan ahoyhua. 3La raeringkuh oh! Na uno nynh a sei ze la thuihei, a ngaesiku ze la ngaethya.#Mat 18.15 4Nin kheit lungkhu na tungvaw vae sari sei zah nin kheit lungkhu vae sari na kalan yn ki zah, ‘Ka ngaesikuh,’ ae cipya ze, na la ngaethya cih,” a cipya hae.

Zynnaw

5Locceihtu hae nynh Bawipaw kha, “Kae zynnaw hynh oun lesahthungpya tua,” a ci hae. 6Bawipaw nynh, “Nanning nynh mungngia cii cia zynnaw na hoi oh ze hynh-e thaeku ku hynh, ‘Na tharui kyate phohkuh lah rili lungkhu lang la bingkuh,’ na cipya oh ze, tuh-e nynh nae kaw phe ae ngae cih oh.

See Ryalaw

7“Nanning lakuze lukhakheit nynh see lu kheit hoi zah tuh-e see nynh lei a thue ze thuasah, tuhkhyhze tuu a rin ze thuasah, inn lang yn thua te, ‘Rang kangmaw lah, ae lan haung,’ cite hum nynh mou na ci cih oh? 8Tuh-e see kha, ‘Ka hanlan zerya yn hyngpah, anghyngnawpaw boeining kha lawkuh lah, ka ae ka nia lya yn ngawbia; tukoute nang tuh na ae na neih cih,’ cite na cipah lan khyh oh tou? 9Kaw na pya thyhte tuh-e see nynh a cyi keiccuze lungtuabya na hopah cih zawtou? 10Tuhawte nanning mah ryalaw ae naw oh paw balyn kha he na cyi vae oh ze, ‘Aening tuh angae-aduakuh leipaw see hae nynh ah thua oh, ah cyi lan oh paw rya kyalya nynh ah cyi oh!’ na ci cih oh,” cite a hopya hae.

Lu Haw Dansahnaw

11Jesu tuh Jerusalem lang a ccia lyakhe Samaria te Galilee laku kyate po a cceih. 12Khua khuakheit lungkhu lang a tee tuh, vaethya ccinaw a kae hae paw lu haw nynh amaw kha a cciadue hae. Asawnaw khe thadyn hae zah, 13“Bawipaw Jesu, kaening hynh ngaethya oun umsah!” cite a sia hae. 14Jesu nynh he a muih hae tuh minmin kha, “La cceih oh lah ranpibawi hae kha la dosakuh oh,” a cipya hae. Minmin nynh a ccia lya hae khe mih ccinaw tuh phe athyaa.#Lev 14.1-32 15Minmin lakuze lukheitpaw nynh a dannaw kha he a muihkuh tuh, ki zah roi accae lante Pachia kha the a hoysah. 16Jesu cculeihpaw khe bakhung zah lungtuabya a ho; tuh-e paw tuh Samariapaw nynh thua. 17Jesu nynh, “Vaethya ccinaw a thyaa hae paw kha lu haw thua khyh tou? Lu takua hae so teimou a um hae? 18E minphuin ccangpaw holeite Pachia thehoysah lan yn kipaw lu kheit san um khyh tou?” a ci. 19Jesu nynh tuh-e paw tuh, “Thokuh, la cceih ccavae, na zynnaw nynh ae dansah vae,” a cipya.

Hohtuhmou Peenaw Yn Thua Cih?

20Farasi hae nynh Pachia peenaw tuh hohtuhmou yn thua cih cite Jesu kha a khia hae. Jesu nynh, “Pachia peenaw tuh muihpaw uccaw te yn thua khyh. 21‘Dotua, hein kya nynh a um!’ Tuhkhyhze, ‘Khuin kya nynh a um!’ cite mah oun ci lan khyh hae; pawccecize Pachia peenaw tuh nae lungkhu nynh a um,” a ci.

22Jesu nynh zuitu hae kha, “Ccungccaw Ccapaw nin ninkheit kha muih na ry oh ccyh yn thua cih zah, na muih lan khyh oh. 23‘Hein kya nynh a um!’ Tuhkhyhze, ‘Khuin kya nynh a um!’ ae cipah cih oh; thuasalama la cceih nan oh, mih nulang la zuikuh nan oh. 24Pawccecize vaawlui san kheit kyate khozaw laekuh zah ccangpaw san kheit kalan a aw hawte Ccungccaw Ccapaw mah amaw nin kya tuhawte yn thua cih. 25Thuasalama aning tuh patae yn teing ty cih zah, e ciihan hae nynh oun vua cih hae. 26Noah ccyh lya a la cyiku hawte Ccungccaw Ccapaw ccyh kya mah yn cyihkuh cih.#Gen 6.5-8 27Noah nynh sanphalung lungkhu lang a tee nin cia, ccungccaw hae tuh aete, niate, zudykute, zudypyakute a um hae, te tuipayn yn ynkuh zah mih balynte marya a ro hae.#Gen 7.6-24 28Tuhawte nynh Lot she lya mah a la cyiku; ccungccaw hae tuh aete, niate, uccaw reku zuakute, thingku ccoukute, inn sakkute a um hae.#Gen 18.20—19.25 29Thuasalama Lot nynh Sodom khua kyate a pou nin khe vaawlang te maee te kemaee khuaa yn rah zah mih balynte marya a ro hae. 30Ccungccaw Ccapaw yn langku nin mah tuhawte yn cyihkuh cih. 31Tuh-e nin kya, inn tungvaw umpaw ccungccaw nynh inn lungkhu umpaw a uccaw hae lawku khylan rungbung nan vae sah; tuhawte loo kya umpaw nynh mah inn lang ki nan vae sah.#Mat 24.17-18; Mar 13.15-16 32Lot a zu kha liathui oh.#Gen 19.26 33Humhung zemah a hiinnaw khumku lan a zuakuhpaw tuh a hiinnaw a shung cih, a hiinnaw a shungpaw tuh a hiinnaw a khyn cih.#Mat 10.39, 16.25; Mar 8.35; Luk 9.24; Joh 12.25 34Nanning kae hopya oh, tuh-e khuazi kya ikhung ccangkheit kya ccungccaw lu ning um hae paw kha lu kheit tuh law athua cih zah lu kheit kha cciataw athua cih. 35Sungsuhkheih hae paw nopi hae lu ning kha lu kheit tuh law athua cih zah lu kheit tuh cciataw athua cih. 36Loo kya a um hae paw lu ning kha lu kheit tuh law thua cih zah lu kheit tuh cciataw athua cih,” cite a hopya hae. 37Zuitu hae nynh, “Teilangmou law athua cih hae, Bawipaw?” cite a khia hae. Jesu nynh, “Achihpaw rhua a umnaw kya lantaw hae mah a pumkuh bua cih hae,” a cipya hae.

Currently Selected:

LUKA 17: ZB16

Highlight

Copy