JOHAN 7
7
Judah hae Bu Poi kya Jesu
1Tukoute Jesu tuh Galilee pee kya khua a ccong; pawccecize Judah hae nynh chia lan a ccung hae keiccuze Judea pee kya khuaccong ry khyh. 2Atu Judah hae Bu poi tuh anae vae.#Lev 23.34; Deu 16.13 3Tukeiccuze a neitaw hae nynh Jesu kha, “Na zuitu hae nynh mah rya na lawpaw kha a muihbua ccaw hae, e kyate toikuh lah Judea pee lang cceih ccavae. 4Pawccecize ccungccaw patae nynh oun nyh hae sah ci a rypaw nynh tuh pawsang mah aphirute cyih boi khyh. Nang nynh e uccaw hae hynh na cyi lan thua ze, laephi ccungccaw hae kalan langku tua,” a cipya hae. 5(Pawccecize amaw a neitaw hae nynh heize amaw kha zyn khyh hae.) 6Jesu nynh minmin kha, “Ka ccyh thua loh khyh, nanning hanlan tuh pawpaw ccyh mah nae ccyh nynh thua. 7Laephi nynh nanning tuh ae hua kho khyh oh, thuasalama kae tuh yn hua hae, pawccecize nae umtuzia hoy khyh cite ccaekia ka khan keiccu nynh thua. 8Tuh-e poi kalan nanning la cceih oh, kae tuh ka ccyh phe ccing lan thua loh khyh zah tuh-e poi kalan ka cceih loh lan khyh,” a cipya hae. 9Tuhte a ho koute Jesu tuh Galilee pee kya a um ung.
10Thuasalama a neitaw hae tuh poi kalan a cceih kou hae te, Jesu mah a cceihthung bua, thuasalama alangkuh lei lante aruh lante nynh a ccia. 11Judah hae nynh poi kya amaw kha ccung hae zah, “Jesu tuh teimou a um?” a ci hae. 12Amaw te asekuh lante ccungccaw zapi laku kya byalungnaw patae a um; pawccecize ccungccaw abang nynh, “Aning tuh ccungccaw hoypaw nynh thua,” a ci hae. Mingccang hae nynh, “Ccungccaw hoypaw thua khyh, aning nynh ccungccaw hae kha a ling hae,” a ci hae. 13Tuhzemah Judah hae raw a ri hae keiccuze hum nynh sanmah amaw kong kha alangkuh lante ho ngan khyh hae.
14Tuh-e poi angankuh loukaw athang te, Jesu nynh beikinn lang cceih zah a ccangpya hae. 15Judah hae tuh mih ngaeangthua zah, “E ccungccapaw hynh a ccangkuh lei pite pawtemou hynhzeih hynh a ny kho?” a ci hae. 16Jesu nynh, “Ka ccangpyanaw hynh kamaw kya-e thua khyh, kae yn sawtupaw kya-e nynh thua. 17Ccungccaw lu kheit nynh Pachia rynaw kha a cyi ry lanze, ka ccangpyanaw kong kha a nyh cih, tuh-e tuh Pachia kya-e tou, tuhkhyhze kamaw kya-e tou ka ho cipaw a nyh cih. 18Amaw a rynaw te a hopaw ccungccaw tuh amaw phu-enaw nynh a ccungku; thuasalama a sawtupaw phu-enaw a ccungpaw tuh ahmepaw thua zah a lungkhu kya seinaw um khyh.
19“Moses nynh nanning kha kawbya ae pya khyh oh tou? Tuhzemah hum nynh san kawbya kha na zui khyh oh? Pawccemou kae hynh chia lan nae ccung oh?” a cipya hae. 20Ccungccaw hae nynh, “Nang tuh raerangsaro bahkuhpaw nynh na thua, hummou nang chia lan ae cih?” a ci hae. 21Jesu nynh, “Kae nynh ryalaw ccangkheit ka lah zah nae balynte nae ngaeangthua. 22Moses nynh nanning kha vingdungawkunaw ae pya oh; (tuh-e tuh Moses kyate yn thopaw thua leite minpaaw hae kyate yn thopaw nynh thua;) nanning nynh sabbath nin kya ccungccapaw kha vingdung na aw oh.#Gen 17.10; Lev 12.3 23Moses Kawbya tuh ro athua khyh nawlan ccungccapaw lu kheit tuh sabbath nin kya vingdung a awku lanze, kae nynh sabbath nin kya ccungccaw lu kheit ka dansah keiccu tou ka tungvaw nae thinria?#Joh 5.9 24Atolang muihnaw te byapia nan oh, ahmepaw byapianaw te byapia oh,” a cipya hae.
Jesu Kong Byakhianaw
25Jerusalem khua e ccungccaw abang nynh, “E paw tuh minmin nynh chia lan cite a ccung hae paw kha thua khyh tou? 26Dotua oh, aning tuh rawhoyte bya a ho, thuasalama minmin tuh pawpaw bya mah ho khyh hae. E paw tuh Messiah nynh thua cipaw uktu hae nynh phe nyh ccaccing hae zahte vema? 27Tuhzemah kaening nynh e paw tuh paw kyate yn thuapaw cipaw kae ny; thuasalama Messiah tuh he yn thua te, paw kyate nynh yn thua cipaw hum ccungccaw nynh san nyh lan khyh,” a ci hae. 28Jesu nynh beikinn kya a ccangpya lya hae khe thawte sia zah, “Nanning nynh kae hynh nae ny oh, paw kyate nynh kae thua cipaw mah nae ny oh. Kae tuh kamaw kaw te kae thua khyh, kae yn sawtupaw tuh ahmepaw nynh thua, nanning nynh amaw kha na nyh khyh oh. 29Thuasalama kae tuh amaw kha ka ny; pawccecize kae tuh amaw kyate kae thuapaw thua zah, aning nynh kae hynh yn saw,” a ci. 30Minmin nynh Jesu kha kyng lan a ccung vae hae; thuasalama a ccyh azaw loh khyh keiccuze hum nynh sanmah kyng khyh hae. 31Ccungccaw patae nynh amaw kha zyn hae zah, “Messiah tuh he yn thua te, e ccungccapaw nynh a raepaw muihsahnaw laeze alunghua yn rae cih vema?” a ci hae.
32Ccungccaw hae nynh Jesu konglang tuhte palei a hoku hae paw kha Farasi hae nynh a thae hae; tetuh Farasi hae te ranpibawi lepaw hae nynh amaw kha kyng khylan beikinn ngawtu hae kha a saw hae. 33Jesu nynh, “Kae tuh nanning ryte sosoh nynh ka um cih, tukoute kae yn sawtupaw kalan ka cceih cih. 34Nanning nynh kae hynh nae ccung cih oh zah nae muih lan khyh oh, pawccecize ka umnaw lang na cceih kho lan khyh oh,” a cipya hae. 35Judah hae nynh, “Aening nynh ah muih leinaw lang oh aning tuh teilangmou a cceih cih? Grik hae laku um hae paw a phiakuh hae paw Judah hae kalan a cceih cih zah Grik hae kha a ccangpah cih hae tou? 36‘Nanning nynh nae ccung cih oh zah nae muih lan khyh oh; ka umnaw lang na cceih kho lan khyh oh,’ cite a hopaw hynh paw a horynaw mou athua?” cite lu kheit te lu kheit a hoku hae.
Muisaw Kong Ccangpyanaw
37Poi athang nin, abyapihua nin khe Jesu nynh thadyn zah, “Lukhakheit nynh tui a haw ze ka kalan yn cceih sah lah neih sah.#Lev 23.36 38Ccathyaa nynh, ‘Kae yn zynpaw tuh a thinlung kyate ahiinpaw tuidy alua cih,’ a ci hawte athua cih,” cite thawte a sia.#Eze 47.1; Zek 14.8 39Jesu nynh amaw a zyn hae paw nynh a mue lan hae paw Muisaw kong kha nynh hynh-e hynh a honuathe; tuh ccyh lya tuh Thyaa Muisaw kha pya thua loh khyh, pawccecize Jesu tuh phu-enaw te thoosah thua loh khyh.
Jesu Kong Ccungccaw hae Tuanaw
40Tukeiccuze ccungccaw patae nynh hynh-e bya a thae hae tuh, “E paw tuh profeh ccaccing nynh thua,” a ci hae. 41Mingccang hae nynh, “E paw tuh Messiah nynh thua,” a ci hae. Thuasalama abang nynh, “Messiah tuh Galilee kyate yn thua cih zawtou? 42Messiah tuh David ciihan kyate, David a umnaw Bethlehem khua kyate nynh yn thua cih cite Ccathyaa nynh ho khyh tou?” a ci hae.#2Sa 7.12; Mik 5.2 43Tetuh Jesu keiccuze ccungccaw hae laku kya phiakunaw a um. 44Ccungccaw abang nynh amaw kha kyng lan a ry hae; thuasalama hum nynh sanmah Jesu kha kyng khyh hae.
A Zyn leipaw Kawhoitu hae
45Beikinn ngawtu hae tuh ranpibawi lepaw hae te Farasi hae kalan oun thua hae; minmin nynh, “Pawccemou amaw kha nae cciakhae khyh oh?” cite beikinn ngawtu hae kha a khia hae. 46Beikinn ngawtu hae nynh, “E paw nynh a ho hawte hum nynh sanmah byaho boi khyh!” cite a khung hae. 47Farasi hae nynh, “Nanning so phe ae lingbua vae oh tou? 48Kawhoitu hae te Farasi hae laku kya amaw a zynpaw lu kheit san a um zawtou? 49Kawbya a nyh lei hae paw tuh-e zapi hae tuh thyalaw athua hae,” cite a khung hae. 50Farasi hae kyaze lu kheit athuapaw, langmawlya Jesu kalan a cceih boi paw Nikodemu nynh minmin kha,#Joh 3.1-2 51“Ccungccaw lu kheit nynh a hopaw kha thaety leite, a cyipaw mah nyty leite, aening ah Kawbya nynh tuh-e paw tuh bya a pia tou?” cite a khia hae. 52Minmin nynh, “Nang so Galilee paw tou na thuabua? Galilee kyate profeh lu kheit san pou boi khyh cipaw kha ccungtua lah na nyh cih,” cite a khung hae.
53Ccungccaw hae balyn tuh mih inn raveih lang a cceih hae.
Currently Selected:
JOHAN 7: ZB16
Highlight
Share
Copy
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
