JOHAN 21

Zuitu hae Lu Sari kya Langkunaw

1Tukoute Jesu tuh a zuitu hae kya Tiberias Tuili pe bua a langkuh; a langkunaw tuh hynhte nynh thua: 2Simon Peter te Ccaawphei a ci hae paw Thomas, Galilee pee Kana khuapaw Nethanal, Zebedi ccapaw hae te ccangpaw a zuitu hae lu ning tuh pynkheihlan la um hae. 3Simon Peter nynh minmin kha, “Ngasaw kyng lan ka cceih cih,” a cipya hae. Minmin nynh, “Kaening mah kae cceihbua cih,” a ci hae. Minmin tuh cceih hae zah kohlung lungkhu lang a tee hae, tuh-e khuazi tuh ccangkheit san kyng khyh hae.#Luk 5.5

4Khua he yn dae tuh Jesu tuh varang langkhe a thadyn; thuasalama zuitu hae nynh Jesu nynh thua cipaw nyh khyh hae. 5Jesu nynh minmin kha, “Ka ccaaw oh, ngasaw na kyng khyh oh tou?” cite a khia hae. Minmin nynh, “Kae kyng khyh,” cite a khung hae. 6Jesu nynh minmin kha, “Kohlung ranglang khe mia kha vua oh lah, beihtaraw tuh na kyng cih oh,” a cipya hae. Tukeiccuze minmin nynh mia kha vua hae zah ngasaw eih alung keiccu mih mia kha sue kho vae khyh hae.#Luk 5.6 7Tetuh Jesu nynh a sungsahpaw zuitupaw nynh Peter kha, “Bawipaw nynh thua!” a cipya. Simon Peter nynh Bawipaw nynh thua cipaw he a thae tuh a angki kha kikuh zah tuili lungkhu lang a phungkuh, (pawccecize aning tuh angki la kikuh khyh). 8Ccangpaw zuitu hae tuh ngasaw phe beihpaw mia kha oun suebia hae zah kohlung taraw te oun thua hae, pawccecize minmin tuh varang langte eih sawkuh khyh hae, dung za ning loukaw nynh a sawkuh hae.

9Varang lang he oun thua hae tuh, maeehue maee vawlan ngasaw rankuhpaw te sanlou kha a muih hae. 10Jesu nynh minmin kha, “Atu na kyng oh paw ngasaw abang kha oun cciakhae oh,” a cipya hae. 11Simon Peter nynh kohlung kalan kae zah ngasaw lepaw za kheit sung pangaw zaw thum te phe beihpaw mia kha varang lang a sue; ngasaw tuh myarya alung zemah mia tuh seiikuh khyh. 12Jesu nynh minmin kha, “Rang oh lah awkhua looh hynh oun ae oh,” a cipya hae. Bawipaw nynh thua cipaw kha a ny hae keiccu zuitu hae kyaze hum nynh sanmah, “Hummou na thua?” cite khia ngan khyh hae. 13Jesu nynh cceih zah sanlou kha lah zah minmin kha a pya hae, tuhawte ngasaw kha mah a pya hae. 14E tuh Jesu chinaw kyate a thoothui koute a zuitu hae kya vae thumnaw a langkunaw nynh thua.

Jesu te Peter

15Awkhua looh a ae kou hae te, Jesu nynh Simon Peter kha, “Johan ccapaw Simon, hynh-e hae nynh yn sungsah hae laeze kae hynh nae sungsahua tou?” cite a khia. Simon nynh, “Ou, Bawipaw, kae sungsah cipaw phe na ny,” a cipya. Jesu nynh, “Ka tuutaw hae kha looh la dang hae,” a cipya. 16Jesu nynh, “Johan ccapaw Simon, kae hynh nae sungsah tou?” cite vae ningnaw bua a khia. Simon nynh, “Ou, Bawipaw, kae sungsah cipaw phe na ny,” a cipya. Jesu nynh, “Ka tuu hae kha la do-oih hae,” a cipya. 17Jesu nynh, “Johan ccapaw Simon, kae hynh nae sungsah tou?” cite vae thumnaw bua a khia. Bawipaw nynh, “Kae hynh nae sungsah tou?” cite vae thum cia a khia keiccuze Peter tuh a thinlungccih zah, “Bawipaw, nang tuh pawpaw balyn marya na ny; kae sungsahpaw mah phe na ny,” a cipya. Jesu nynh, “Ka tuu hae kha looh la dang hae. 18Byaccaccing kae hopya, na no lya tuh na taeccia kha na cciakuh zah na rynaw miakaw lang leih na cceih. Thuasalama he nae taw vae tetuh na kuih hae kha na zo cih zah ming hae nynh ae heede cih hae zah na ccia ry leinaw lang ae cciakhae cih hae,” a cipya. 19(Jesu nynh hynhte a hopaw tuh, Peter nynh pawcihawpaw chinaw te nynh Pachia kha phu-enaw a pya cih cipaw a langsahpaw nynh thua.) Tuhte a ho koute Jesu nynh Peter kha, “Yn zui,” a cipya.

Peter te Johan

20Peter nynh nulang maekuh zah Jesu nynh a sungsahpaw zuitupaw tuh mih nulang te yn zuikupaw kha a muih. Tuh-e paw tuh zerya a ae lya hae ze Jesu by vaw kya ngeikuh zah, ‘Bawipaw, nang ae phee cih paw tuh hummou?’ cite a khiatupaw nynh thua.#Joh 13.25 21Tuh-e paw kha Peter nynh he a muih tuh Jesu kha, “Bawipaw, hynh-e paw so pawtemou athua cih?” cite a khia. 22Jesu nynh, “Kae thua cia aning kha ka hiinsah ry ung ze, nang te pawmou asekuh? Kae hynh yn zui!” a cipya. 23Tukeiccuze tuh-e zuitupaw tuh chih lan khyh cite uno hae kya laanbya athan; thuasalama aning tuh chih lan khyh cite Jesu nynh ho khyh; thuasalama, ‘Kae thua cia aning kha ka hiinsah ry ung ze, nang te pawmou asekuh?’ cite nynh a ho.

24Tuh-e zuitupaw tuh hynh-e konglang ccaekiakhantu thua zah hynh-e konglang a zeitu mah athua, te a ccaekia tuh ahme cipaw kaening nynh kae ny. 25Jesu nynh a cyipaw ccangpaw patae a um ung, tuh-e hae miakaw tuh zei athua ze, zeinawpaw ccauh hae kha laephi nynh ccawng lan khyh cite nynh ka tua.

Currently Selected:

JOHAN 21: ZB16

Highlight

Copy