JOHAN 2

Kana Khua kya Zudy Poi

1Nin thumnaw kya Galilee pee Kana khua kya zudy poi a um; Jesu a nung tuh tuin kya a umbua. 2Jesu te a zuitu hae mah zudy poi kalan a kobua hae. 3Misutui he athang tuh, Jesu a nung nynh, “Misutui hoi vae khyh hae,” cite Jesu kha a hopya. 4Jesu nynh, “Nopinung, nang tuh kae te hein kya pawmou ah sekuh? Ka ccyh thua loh khyh,” a cipya. 5A nung nynh thohae hae kha, “Aning nynh ae hopya oh paw miakaw kha cyih vae oh lou,” cite a hopya hae. 6Judah hae ccikankunawpaw phung thyhte, galan kaw kuin, sung thum accawngpaw, tui nungnawpaw lungre re taruh kha tuin kya a nung hae. 7Jesu nynh thohae hae kha, “Lungre hae kha tui bia oh,” a cipya hae. Minmin nynh tuh-e re hae tuh arae phe thua lan tui a bia hae. 8Jesu nynh minmin kha, “Atu tui kha sua oh lah thohae piccanpaw kalan cciakhae oh,” cipah hae zah, minmin nynh a cciakhae hae. 9Thohae piccanpaw nynh misutui lang a tangpaw tui kha he a taangtua tuh, tuh-e tuh paw kyate yn thua cipaw nyh khyh, (thuasalama tui sua hae paw thohae hae nynh tuh phe ny hae), tukeiccuze thohae piccanpaw nynh zudy ccangvaepaw kha ko zah, 10“Ccungccaw miakaw nynh athuapaw misutui kha masaty a nee hae, ccungccaw hae phe a byn kou hae te, anyaapaw misutui kha leih a nee hae, thuasalama nang tuh athuapaw misutui kha atu cia phang na nung,” a cipya. 11Jesu nynh a raepaw ngaeangnaw hae kyaze masaty a raepaw hynh-e ngaeangnaw hynh Galilee pee Kana khua kya rae zah a phu-enaw kha a langsahpya hae, te a zuitu hae nynh amaw kha a zyn hae.

Jesu nynh Beikinn A Ccikan

(Mat 21.12-13; Mar 11.15-17; Luk 19.45-46)

12Tukoute Jesu tuh a nung, a neitawpaw hae te a zuitu hae ryte Kapernaum khua lang cceihbung hae zah, tuin kya nin beihtaraw a um hae.#Mat 4.13

13Judah hae Kawtaw Poi tuh nae vae zah Jesu tuh Jerusalem lang a cceihthung.#Exo 12.1-27 14Beikinn voidu kya vaetua hae, tuu hae te valaele hae a zua hae paw te mih ccaboi kya a haung hae paw phuaru hae paw kha a muih. 15Liarue hae kha buanawpaw lang raekuh zah tuu hae te vaetua hae te minmin balyn kha beikinn voidu kyate pong a dee hae, phuarutu hae kya-e phua kha phya phaepah hae zah ccaboi hae kha phe a dawleihpya hae. 16Valaele a zuatu hae kha, “E uccaw hae hynh hein kyate poukhae oh! Ka Paaw inn hynh kungkunaw inn lang mang nan oh!” a cipya hae. 17A zuitu hae nynh, “Na inn kya-e duaanaw rynaw thinlung nynh kamaw kha phe yn ae,” cite azeikuhpaw kha a liathui hae.#Sam 69.9 18Tetuh Judah hae nynh Jesu kha, “Nang nynh hynhte cyinaw kaw na hoinawpaw hynh paw muihsahnaw mou nae langsapakuh cih?” cite a khia hae. 19Jesu nynh minmin kha, “E beikinn hynh roh oh lah, nin thum lungkhu ka sakthui cih,” cite a khung hae.#Mat 26.61, 27.40; Mar 14.58, 15.29 20Judah hae nynh, “Hynh-e beikinn saknaw hynh sung pali kum taruh aro, nang nynh e hynh nin thum lungkhu nae sakthui kho cih tou?” a ci hae. 21Thuasalama Jesu nynh tuh amaw pyn athuapaw beikinn kha nynh a ho. 22Tukeiccuze chinaw kyate Jesu he a thoothui te, Jesu nynh a hopaw e bya hynh a zuitu hae nynh liathui hae zah, Ccathyaa te Jesu nynh a hosyapaw bya kha a zyn hae.

Kawtaw Poi kya Jesu

23Jesu nynh Kawtaw Poi lungkhu Jerusalem khua kya a um lyakhe ngaeangnaw a raepaw kha ccungccaw patae nynh a muih hae keiccuze a min kha a zyn hae. 24Thuasalama Jesu nynh ccungccaw balyn kha marya a ny keiccuze minmin kha zyn khyh hae, 25ccungccaw lungkhu a umpaw miakaw kha a ny keiccuze, ccungccaw konglang hynh hum nynh sanmah ccaekiakhanpya ho khyh.

Currently Selected:

JOHAN 2: ZB16

Highlight

Copy