JOHAN 1

Bya Pynsaw lang Tangnaw

1Athotakawnaw kya Bya a um, Bya tuh Pachia ryte a umkheih hae, Bya tuh Pachia nynh thua. 2Tuh-e Bya tuh athotakawnaw kyamawte Pachia ryte a umkheih hae. 3Tynre balyn tuh amaw liate nynh rae athua, amaw leite raepaw ccangkheit san um khyh. 4Amaw kya tuh hiinnaw um zah, hiinnaw tuh ccungccaw hae awnaw nynh thua. 5Awnaw tuh mohnaw kya a aw, thuasalama mohnaw nynh tuh-e awnaw tuh the kho khyh.

6Johan a ci hae paw ccungccapaw lu kheit kha Pachia nynh a saw.#Mat 3.1; Mar 1.4; Luk 3.1-2 7Tuh-e paw liate ccungccaw hae balyn nynh a zyn nawlan hae, awnaw kong ccaekiakhan khylan ccaekia lang yn thua. 8Aning tuh awnaw thua khyh, awnaw kong ccaekiakhan khylan yn thuapaw nynh thua. 9Tuh-e ahmepaw awnaw tuh laephi vawlan yn thua zah ccungccaw miakaw kha a awsah.

10Aning tuh laephi vawlan um zah laephi hynh amaw liate rae athua, tuhzemah laephi nynh amaw kha nyh khyh. 11Aning tuh amaw ram lang yn thua, thuasalama a ccungccaw hae nynh amaw kha lehkhan khyh hae. 12Thuasalama amaw kha lehkhan hae zah amaw min a zynpaw balyn kha Pachia ccaaw thuanaw kaw a pya hae. 13Minmin tuh chiisaw te saahpaw ccaaw, pynsaw rynaw te saahpaw ccaaw, ccungccaw rynaw te saahpaw ccaaw thua khyh hae; thuasalama Pachia rynaw te saahpaw ccaaw nynh athua hae.

14Bya tuh ccungccaw lang yn tang zah aening kya a um, aning tuh thawccinaw te byaccing te phe beih zah, Paaw kya-e lu kheit kyalyapaw Ccapaw phu-enaw lante a phu-enaw kha ah muih vae oh. 15Johan nynh amaw kong kha ccaekiakhan zah, “ ‘Kamaw koute yn thua cih paw ccungccapaw tuh kamaw laeze a lesaehua, pawccecize aning tuh kamaw laeze a umty,’ cite a kong ka hopaw kha hynh-e paw nynh thua,” cite thawte a sia. 16Amaw a ccingnaw kyate thawccinaw tungvaw thawccinaw kha aening balyn nynh ah mue oh. 17Pawccecize kawbya tuh Moses liate pya athua, thawccinaw te byaccing tuh Jesu Khri liate nynh yn thua. 18Hum nynh sanmah Pachia tuh muih boi khyh, Paaw by vaw kya a umpaw, lu kheit kyalyapaw Ccapaw nynh Pachia kha a langsah vae.

Baptisma Pyatu Johan Ccaekiakhannaw

19Judah hae nynh, “Nang hynh hummou?” cite Johan kha khia khylan Jerusalem kyate ranpibawi hae te Levi hae kha a saw lya hae ze Johan nynh hynhte ccaekia a khan. 20Johan nynh mih bya tuh ei leite, “Kae tuh Messiah ka thua khyh,” cite ccaerarih lan a khung hae. 21Minmin nynh, “Tuhteze nang tuh hummou? Elijah na thua tou?” cite a khia hae. Johan nynh, “Ka thua khyh,” a ci. Minmin nynh, “Profeh na thua tou?” cite bua a khia hae. Aning nynh, “Ka thua khyh,” a ci.#Deu 18.15, 18; Mal 4.5 22Tetuh minmin nynh, “Hummou na thua? Kaening oun saw hae paw kalan kae la hopya ccaw hae namaw te namaw kha hum na ciku mou?” cite a khia hae. 23Johan nynh,

“‘Bawipaw a ccianaw laanpi kha

lawbabin lan raepah oh,’ cite

profeh Isaiah nynh a ho vae hawte,

kae tuh ramkaw kya

a siapaw lukheitpaw roi nynh

ka thua,” a ci.#Isa 40.3 (LXX)

24Minmin a sawtu hae tuh Farasi hae nynh athua hae. 25Minmin nynh Johan kha, “Nang tuh Messiah na thua khyh, Elijah mah na thua khyh, profeh mah na thua khyh lanze, pawccemou baptisma na pya hae?” cite a khia hae. 26Johan nynh minmin kha, “Kae nynh tui kya baptisma ka pya hae, thuasalama nae laku kya na ny lei oh paw lu kheit a um. 27Aning tuh ka nulang te yn thua salamah kae tuh a phanah rui phoupya lan san ka ngaekuh khyh,” a cipya hae. 28E hynh Johan nynh baptisma a pyanaw hae Jordan vaw khuraw lang umpaw Bethabara khua kya nynh acyiku.

Pachia Tuutaw

29Awkhualan khe Johan nynh a kalan yn cceihpaw Jesu kha muih zah, “Laephi seinaw a cciakhaepaw Pachia Tuutaw khuh dotua oh! 30‘Ka nulang te yn thua cih paw ccungccapaw tuh kae laeze a lesae huapaw nynh thua, pawccecize aning tuh kae laeze a umty vae,’ cite a konglang ka hopaw kha amaw lahyn athua. 31Amaw kha ka la nyh khyh, thuasalama Israel hae nynh amaw kha a ny nawlan hae kae nynh tui te baptisma ka pya hae,” a ci. 32Johan nynh ccaekiakhan zah, “Muisaw nynh vaawlang te vahu hawte yn rungbung zah a tungvaw kya a ccupaw kha ka muih. 33Amaw kha ka la nyh khyh, thuasalama tui te baptisma pya lan yn sawtupaw nynh kae kha, ‘Muisaw nynh yn rungbung zah a tungvaw a ccupaw kha na muih cih; tuh-e paw tuh Thyaa Muisaw te baptisma a pyatu nynh thua,’ cite yn hopya. 34Kae nynh ka muih vae zah, e paw tuh Pachia Ccapaw nynh thua cite ccaekia ka khan vae,” a ci.

Masaty Jesu Zuitu hae Konaw

35Awkhualan khe Johan te a zuitu hae lu ning nynh a thadyn lya hae khe, 36Johan nynh Jesu a cciapaw kha do zah, “Pachia Tuutaw khuh dotua oh!” a ci. 37Zuitu hae lu ning nynh Johan bya kha thae hae zah Jesu kha a zui hae. 38Jesu nynh maeleihkuh zah minmin nynh a zui hae paw kha he a muih tuh, “Pawmou na ccung oh?” cite a khia hae. Minmin nynh, “Rabbi, pawkyamou na um?” a ci hae. (Rabbi cipaw tuh Sazae cipaw nynh thua). 39Jesu nynh minmin kha, “Rang oh lah oun dotua oh,” a cipya hae. Minmin nynh cceih hae zah a umnaw kha a muih hae; tuin nin tuh amaw ryte a umkheih hae, pawccecize tuh lya tuh zete suimilan ccangpali loukaw acih vae. 40Johan bya kha thae hae zah Jesu a zui hae paw lu ning lakuze lu kheit tuh Simon Peter neitaw Andru nynh thua. 41Aning nynh a upaw Simon kha masaty muih zah, “Messiah kha kae muih vae,” a cipya. (Messiah cipaw tuh Khri cipaw nynh thua). 42Simon kha Jesu kalan a cciakhae. Jesu nynh amaw kha do zah, “Nang tuh Johan ccapaw Simon nynh na thua. Nang tuh Sefas cite ko na thua cih,” a cipya. (Sefas cipaw tuh Peter cipaw te lokuh zah asuilan tuh “lungpi” cipaw nynh thua).

Filip te Nethanal Konaw

43Awkhualan Jesu tuh Galilee pee lang ccia lan a paccynkuh. Filip kha muih zah, “Yn zui,” a cipya. 44Filip tuh Andru te Peter hae khua athuapaw Bethsaida khuapaw nynh thua. 45Filip nynh Nethanal kha muih zah, “Moses nynh Kawbya ccauh kya a konglang a zeipaw te profeh hae nynh mah a konglang a zei hae paw kha kaening nynh kae muih vae; aning tuh Josef ccapaw Jesu, Nazareth khuapaw nynh thua,” a cipya. 46Nethanal nynh, “Nazareth khua kyate uccaw hoypaw ccangkhakheit a pou kho cih tou?” cite a khung. Filip nynh, “Rang lah yn dotua,” a cipya. 47Jesu nynh a kalan yn cceihpaw Nethanal kha muih zah, “Thyaruhnaw thinlung a hoi leipaw Israel paw ccaccing khuh dotua oh!” cite a konglang a ho. 48Nethanal nynh, “Pawtemou kae hynh nae ny?” cite a khia. Jesu nynh, “Filip nynh ae ko maw, thaeku ku kaw na um lya kha phe kae muih vae,” a cipya. 49Nethanal nynh, “Sazae, nang tuh Pachia Ccapaw nynh na thua! Nang tuh Israel Siapharan nynh na thua!” cite a khung. 50Jesu nynh, “ ‘Thaeku ku kaw kya kae muih,’ cite kae hopya keiccu tou nae zyn? E laeze ale huapaw uccaw hae nae muih ung cih,” a cipya. 51Jesu nynh, “Byaccaccing kae hopya oh, vaaw tuh yn hungkuh zah Pachia vaaw hae nynh Ccungccaw Ccapaw tungvaw a rungbung hae paw te a kaethung hae paw kha nae muih cih oh,” cite amaw kha a hopya.#Gen 28.12

Currently Selected:

JOHAN 1: ZB16

Highlight

Copy