JAMES 5

Mihoi hae Raeringnaw Pyanaw

1Mihoi hae, atu ngaetua oh! Nae tungvaw yn thua lanpaw vawsaw riathaenaw hanlan rawkhuite siatua oh. 2Nae hoirumnaw tuh baluh mawe vae, nae boeining tuh ripaw nynh a ae vae.#Mat 6.19 3Nae sui te nae ngun tuh chihhangkae zah, tuh-e chihhangkaepaw nynh nanning kha rawsete ccaekia lang a tang cih zah maee hawte nae ngesaw kha a ae cih. Nyathyakou e nin hae hanlan nynh sisua kha na ccakhungku oh. 4Ngaetua oh, nae leikua hae kya ccatan aw hae paw ryalahtu hae kha ryalaw mee pya leite na hynpah oh zah, mih ryalaw mee nynh a sia hae. Loohruetu hae siaruanaw tuh Vaaw Bawipaw nakaring kya phe a thua vae.#Deu 24.14-15 5Laephi vawlan hoysahnaw kya na hiin oh zah na hoysah oh. Chia nin hanlan nae thinlung kha thobaleih lan na thosahku vae oh. 6Midingpaw kha sei na be oh zah na chia oh; aning nynh nanning kha ae rawse ru khyh oh.

Teingnaw kya Lungsaenaw

7Tukeiccuze uteno hae, Bawipaw yn thua cia lungsaete la ngaw oh. Dotua oh, loophopaw nynh khuaatui te hawkhuaa kha a mue cia, laephi kya-e aphutepaw athae-apaw kha lungsaete phang a ngawdae. 8Nanning mah nae lungsae sah, nae thinlung kha tynsah oh; pawccecize Bawipaw yn thuanaw lanpaw tuh anae vae. 9Uteno hae, byapia na thua khyh nawlan oh, lu kheit te lu kheit ccohnuakuh nan oh; dotua oh, byapiatu tuh thuakaw malang phang a thadyn. 10Ka u te ka neitaw hae, Bawipaw min te bya a ho hae paw profeh hae kha vawsaw teingnaw te lungsaenaw hanlan dosuinkupaw lang la lawkuh oh. 11Dotua oh, a ngaesang kho hae paw tuh hythuaccou hae paw ah ci oh. Job nynh a ngaesangnaw kong te nyathyakou kya Bawipaw nynh a pyapaw kong kha na thae vae oh. Bawipaw tuh myarya thawccih thyapaw te ngaethyaumsah thyapaw nynh thua cipaw na ny vae oh.#Job 1.21-22, 2.10; Sam 103.8

12Thuasalama ka u te ka neitaw hae, pawpaw balyn kya thyalawkuh nan oh; vaawlang te thuasah, laephi te thuasah, byakinkunaw ccangkhakheit te mah thuasah thyalawkuh nan oh. Thuasalama byapianaw lungkhu lang na phungku sei khyh nawlan oh, athuapaw kha “athua” ci oh lah, athua leipaw kha “thua khyh” ci oh.#Mat 5.34-37

Zynnaw Sawsangnaw

13Nanning laku vawsaw a teingpaw a um tou? A um ze sawsang sah. A lungtuapaw a um tou? A um ze thehoysahnaw hlaw kha sah sah. 14Nanning laku ngeccih a um tou? A um ze khriccaawbuu kya-e pastor hae kha ko hae sah lah, minmin nynh Bawipaw min te chitui thuhpah hae sah lah, sawsangpah hae sah.#Mar 6.13 15Zynnaw kya-e sawsangnaw nynh ngeccih kha a khum cih zah, Bawipaw nynh tuh-e ngeccih tuh a thosah cih. Seinaw a la rae ze, aning tuh ngaethya athua cih. 16Tukeiccuze na cyisei oh paw kha lu kheit te lu kheit hopakuh oh lah, dansah na thua nawlan oh lu kheit te lu kheit sawsangpakuh oh. Midingpaw sawsangnaw tuh myarya a thawsae zah athane. 17Elijah tuh aening tahawpaw ccungccaw nynh thua; aning nynh khuaa araw khyh nawlan thawte saw a sang; te laephi vawlan kum thum te sawpaw sah taruh cia khuaarah khyh.#1Si 17.1, 18.1 18Aning nynh saw bua sang zah vaawlang nynh khuaa a rawsah, te laephi nynh a thae a pousah.#1Si 18.42-45

19Uteno hae, nanning lakuze lukhakheit tuh byaccing kyate cceihsei zah, lukhakheit nynh amaw kha a paleihsaku lanze, 20miseipaw kha a cciaseinaw kyate a paleihsakuhpaw ccungccaw nynh tuh-e paw muisaw kha chinaw kyate a khum cih zah, seinaw patae kha a bongpah cih cipaw kha la nyh sah.#Ptb 10.12; 1Pe 4.8

Currently Selected:

JAMES 5: ZB16

Highlight

Copy