JAMES 2

Laesakunaw Hoi Nan Oh

1Ka u te ka neitaw hae, phu-enaw Bawipaw athuapaw, ah Bawipaw Jesu Khri zynnaw kya ccungccaw laesahnaw la hoi nan oh. 2Nanning na pumkunaw oh kalan ccungccaw lu kheit nynh sui kuihpu te apuithyapaw uccaw lawkute yn teebua zah, a ryachipaw mah anyaapaw uccaw lawkute yn teebua ze, 3apuithyapaw uccaw te yn ccaankuhpaw kha saw na tua oh zah, “E ahoypaw hmin kyahin haung,” na cipah oh zah, a ryachipaw kha, “Khuhlang khuin la thadyn, tuhkhyhze e ka ccu nungnaw kyahin yn haung,” na cipya oh lanze, 4naemaw te naemaw laku laesakunaw na hoi oh zah athahpaw tuanaw te bya a piatu hae khaw na thua oh? 5Ka sungsahpaw uteno hae, la ngaetua oh. Hynh-e laephi kya-e ryachi hae hynh zynnaw kya hoirum khylan thuasah, amaw a sungsah hae paw hanlan bya a kinpyaku vae hae paw, peenaw rho kha ccou khylan thuasah Pachia nynh po khyh hae tou? 6Thuasalama nanning nynh ryachi hae kha pawlang na ria khyh oh. A hoirum hae paw nynh nanning kha ae tuaa ae sah khyh oh tou? Byapianaw zung lang ae sue khyh oh tou? 7Nanning ae konaw oh paw, aphutepaw min kha minmin nynh thethya ho khyh hae tou?

8“Na innpaw kha namaw hawkhate na sungsah cih,” acikuhpaw Ccathyaa thyhte alesaepaw kawbya kha na ccingsah ccaccing oh ze, kou hoy lan na cyi vae oh.#Lev 19.18 9Thuasalama mirymihua na po oh ze, a sei hae paw nynh na thua oh. Kawbya a lawe hae paw hawte kawbya nynh a sei cite a nysaku hae paw nynh na thua oh. 10Pawccecize humhung zemah Kawbya balyn kha marya zui salamah ccangkheit kya a mesei lanze, aning tuh kawbya marya a meseipaw nynh thua. 11Pawccecize, “Milae zu milae vawpaw kya sei nan,” cite a hotupaw nynh, “Ccungccaw theih nan,” cite mah a hobia. Nang tuh milae zu milae vawpaw kya na sei khyh zemah ccungccaw na chia ze, kawbya zui leipaw nynh na thua.#Exo 20.13, 14; Deu 5.17, 18 12Luenaw te asekuhpaw kawbya khate byapia athua cih hae paw hawte, nanning mah byaho oh lah tuhte cyih oh. 13Pawccecize ngaethyaumsahnaw a langsakuh leipaw ccungccaw tuh ngaethyaumsahnaw leite byapianaw kha a mue cih. Ngaethyaumsahnaw nynh byapianaw kha phe a tae.

Cyisahnaw Um leipaw Zynnaw

14Ka u te ka neitaw hae, ccungccaw lu kheit nynh zynnaw ka hoi a ci zemah cyisahnaw a hoi khyh ze pawmou athane? Tuh-e zynnaw nynh amaw kha a khum kho cih tou? 15Uno lu kheit tuhkhyhze ccianung lu kheit tuh boeining leite um zah nin takyh ae lanpaw looh hoi leite a um lanze, 16nanning lukhakheit nynh minmin kha, “Daebabi lan la cceih oh, nae khua la lung sah lah, nae vue la so sah,” cite hopah hae zah, pyn hanlan ahopaw uccaw hae kha a pya khyh hae ze, pawmou athane? 17Tuhawte zynnaw mah cyisahnaw um leite, a makhaete tuh achihpaw nynh thua.

18Thuasalama ccungccaw lukhakheit nynh, “Nang tuh zynnaw na hoi zah, kae tuh cyisahnaw ka hoi, na cyisahnaw um leite na zynnaw tuh yn langsahpya tua; kae tuh ka zynnaw kha ka cyisahnaw hae liate kae langsahpah cih,” a ci ze a ci cih. 19Nang nynh Pachia ccangkheit nynh a um cite na zyn, kou ahoy. Raerangsaro hae nynh heize zyn hae zah a thyngkuh hae. 20Pou mingaeepaw! Cyisahnaw um leite zynnaw tuh a chih cipaw hynh na nyh ry tou? 21Ah minpaaw Abraham nynh silawhang vawlan a ccapaw Isak kha silawnaw lang he a pya tuh, cyisahnaw liate thyaaccou khyh tou?#Gen 22.1-14 22A zynnaw tuh a cyisahnaw ryte ryalahkheih hae zah, cyisahnaw liate nynh zynnaw tuh accing cipaw kha na muih. 23“Abraham nynh Pachia kha zyn zah tuh-e a zynnaw tuh dingnaw lang a riapya,” acikuhpaw Ccathyaa tuh phe accing; aning tuh Pachia banpaw cite ko athua.#Gen 15.6; 2Sh 20.7; Isa 41.8 24Ccungccaw tuh zynnaw kyalya te thua leite, cyisahnaw liate nynh thyaaccou athua cipaw kha na muih oh. 25Tuhawte ohhuanung Rahab kha mah, zeccuetu hae kha innccong ua hae zah ccangpaw laanpi kalan he a saw hae tuh, cyisahnaw liate aning tuh thyaaccou khyh tou?#Jos 2.1-21 26Pawccecize muisaw um leipaw pyn tuh a chih, tuhawte cyisahnaw um leipaw zynnaw mah achihpaw nynh thua.

Currently Selected:

JAMES 2: ZB16

Highlight

Copy