HEBRU 5
5
Ranpibawi Ryalaw
1Ccungccaw hae laku kyate popaw ranpibawi lupi miakaw tuh seinaw hae hanlan silawnaw te lasung hae kha Pachia kalan pya khylan, Pachia lante asekuhpaw uccaw hae kya ccungccaw hae ccelang khangpaw nynh thua. 2Amaw mah thawzyanaw aphuinphuin a hoipaw athua keiccuze aning tuh a nyhthya lei hae paw te a cceihsei hae paw tungvaw kya lungnenaw a hoi kho. 3Hynh-e keiccuze ccungccaw hae seinaw hanlan te amaw seinaw hanlan aning nynh silawnaw a rae aho.#Lev 9.7 4Hynh-e sawtuanaw hynh hum nynh sanmah amaw hanlan lawkuh kho khyh, Aaron a ko hawte Pachia nynh a kopaw ccungccaw rou nynh sawtuanaw kha a lawkuh.#Exo 28.1
5Tuhawte Khri mah Ranpibawi Lupi thua khylan amaw te amaw kha phu-esakuh khyh, thuasalama,
“Nang tuh ka Ccapaw,
atunin nang kha kae saah vae,”
cite a hotupaw nynh amaw kha a phu-esah.#Sam 2.7 6Ccathyaa ccangpaw kyakhe,
“Nang tuh Melkhizedek thuanaw thyhte
zungzae ranpibawi nynh na thua,”
cite mah a ho.#Sam 110.4
7Jesu tuh pynsaw lante a um lyaze, amaw kha chinaw kyate a khum khopaw kalan thawte sia zah mitphi luate, sawsang te a ngia; aning tuh Pachia raw a ri keiccu thaepya athua.#Mat 26.36-46; Mar 14.32-42; Luk 22.39-46 8Pachia Ccapaw mang athua zemah, a teingpaw uccaw hae liate aning nynh kawngaenaw kha a ccangku. 9Accingpaw lang rae athua koute, amaw kaw a ngae hae paw balyn hanlan aning tuh zungzae khumnaw athotupaw lang yn tang. 10Melkhizedek thuanaw thyhte Ranpibawi Lupi lante Pachia nynh a ko vae paw nynh thua.
Hyynaw te Raeringnaw Pyanaw
11Hynh-e konglang ho lanpaw patae kae hoi zemah na thaethya khyh oh keiccuze ccaesahpya lan aru. 12Pawccecize nanning tuh atu lya ccangpahtu lang heize tang lan vae paw, thuasalama Pachia bya athotakawnaw kha bua ccangpya na ho ung oh. Looh tangpaw thua leite samatei aho ungpaw nynh na thua oh.#1Ko 3.2 13Samatei kyalya a neih ungpaw ccungccaw miakaw tuh imua athua ung keiccuze dingnaw bya kha nythyanaw hoi khyh. 14Thuasalama looh tangpaw tuh piccan hae hanlan nynh thua; tuh-e hae tuh ahoypaw te athahpaw phiathya nawlan nynaw a hoi hae paw nynh thua.
Currently Selected:
HEBRU 5: ZB16
Highlight
Share
Copy
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
