MARKA 9

Awm nai sai takhra nai

(Mt 17.1–13; Lk 9.28–36)

1Naibaly mymy ly nichi teng y, “Meitang khyp kang thui pi, hi i angdo nai phyreichi ly Tameuh i peang nai ly atiti sa thai naira hawi tym nai niu u y ryrei ly dei naira den py pateng ai ny y,” napi.

2Naibaly Isu ly kani tariurei nai khala y Petera hawi, Jakob hawi, Johan ai py hawi takhra iy, mawi asang parai naira y mymychi my tlairei chei hai kalau; naibaly nichi i mo y mymy i meimai awm nai sai ly takhra bo;#2 Pet 1.17–18 3naibaly mymy i ateaung ly khaileaung pri i kanih pasiu nai keungchi nanai ly huna tanrei kaleung hai thai y nai pa-rei kaleung nai sadi na. 4Naibaly Elija nini Mosi ly nichi teng y amteng i Isu hawi arum. 5Naibaly Petera ly pathang i Isu teng y, “Rabbi awi, kaichi i vui hi y awm ai nai hawi parai; kaichi my taichy thomrei so si ba, nang i vui harei, Mosi i vui harei, Elija i vui harei,” napi. 6(Ni my ly khri pa-rei jei nai deaungkho y mymy ly mana mana thui ai mo, nanai dawn pajau y.) 7Naibaly mymychi ai khupanym my khiu meuh iy, khupanym theung i dengdairei raawi theu i, “Hini ly kai i Chapo ngai parai nai ne, mymy i leu tangai u,” napi.#Mt 3.17; Mk 1.11; Lk 3.22 8Naibaly nichi ly dengtheang i nichi teng y Isu ai leaungrei ny y baly ami ai py niu y.

9Naibaly nichi ly mawi i dengdairei kathiu nai thym khala y, Khumi i Chapo kadeichi theung i dengdairei angthau bi nai bo y ny y baly, nichi i atiti niu nai ly ami ai py thui pi y ai nai ang napi cheng. 10Hunaibaly nichi ly huni leu paleung y pateung me jo i, “Kadeichi theung i dengdairei angthau bi ai nai ly mana nai sai mo?” nanai adeng. 11Naibaly nichi my ly mymy teng y, “Reita patiu nai keungchi ly, ‘Elija jeu man ai nai tla,’ nanai ly ati mana nai sai mo?” nanai deng.#Mal 4.5; Mt 11.14 12Naibaly mymy ly nichi teng y, “Elija ly jeu man ai nai angchi yb i, ati cheaungkhang sa palai bi ai; naibaly Khumi i chapo ly atiti neangneang patang iy, amichi my ni ai tahm khai y nai awm ai nai tla, nanai mymy i satang ly ati mana nai tajiu nai mo? 13Na i py kang thui pi, Elija ly tym veng bo: naibaly mymy i satang tajiu nai kamta khyp my, nichi ly mymy i tlang tleaung y nichi i ngaingai py sa chum veng nai bo,” napi.

Isu my deaungdi teng i vawinam patheu nai

(Mt 17.14–21; Lk 9.14–43a)

14Naibaly nichi ly abangnaichi teng y tym nai kha y mymychi i ahawi y khumi mipui ka-teng ny y nai hawi, Reita patiu nai keungchi my aei hai nai py niu. 15Naibaly khumi mipuichi bawibawi ly mymy ai niu iy khri pa-rei lyh i, mymy teng y angpreng u praw iy kawn nai leu thui pi. 16Naibaly mymy ly nichi teng y, “Nichi hawi ati leu aei u mo?” napi nai deng. 17Naibaly khumi mipuichi theung y leaungrei my ly ni teng y, “Sara awi! Kai i chapo leu katheu y nai vawinam my nam nai ai ly nang teng y kang hawi; ni ai patiu naira tleirei y atlym hai mawp reng, 18hunaibaly ni ly pachi phawn tla sobam i ho kachai iy veung jei ryry bo; hunaibaly nang khi y abangnaichi teng y patheu ai nai kanapi i, nichi ly so thai y pasi lawh,” napi nai pathang. 19Naibaly mymy ly nichi teng y, “Aw vai deung kangthau ym naira by y naichi awi, kai ly nangchi teng y mana tanrei kang awm hai ai mo? mana tanrei kang kham hai thai ai mo? Ni ai ly kai teng y hawi u,” napi. 20Naibaly ni ai ly mymy teng y hawi u; naibaly vawinam ly mymy ai niu phai niu bo nabaly deaungdi ai khri pa-rei kyn hai praw iy, ni ly khaileaung y atlym i, pachi phawn phro phro na pa-rei theu naimy khri pa-rei atapi na. 21Naibaly mymy ly ampo teng y, “Hina nai awm angchei nai ly mana tanrei kra bo mo?” nanai deng. Ni my ly, 22“Deaungdi khala i nai bo; hunaibaly ni ai tama hai ai nai mai y py tui y py neangneang atlyh hai reng nai bo; na i py nangmy sai sairei sa pajau baly kaichi ai pahen ly, sabawm kyh,” napi. 23Naibaly Isu ly ni teng y, “Nang sa pajau baly e! Ym nai khumi i vui ly ati cheaungkhang sa pajau na a,” napi. 24Hunaibaly deaungdi i ampo my ly, “Kai ym mang, kai i ym thai y naira y kai ai sabawm kyh,” napi. 25Naibaly Isu ly khumi mipuichi angpreng achu dudu nai niu kha y, vawinam ai jo i ni teng y, “Nang vawinam leu katheu thai y nai hawi kano kapang awi, ni i taku theung i nai theu ly, kun bi moh, nanai leu kang pei,” napi. 26Hunaibaly ni ly aeu iy mymy ai khri pa-rei kyn hai pajau nai bo y theu vui bo: naibaly deaungdi ly dei nai kamta na, hunaibaly khumi nawi keh naichi my ly, “Dei nai na a,” napi. 27Na i py Isu my ly ni i kiu y amkhaw iy pathau, naibaly ni ly angthau ryp. 28Naibaly mymy ly yhm y kun i, nichi my tlairei awm kha y abangnaichi my ly, “Ati mana nai kaichi ly patheu thai y lawh be?” nanai deng. 29Naibaly mymy ly nichi teng y, “Hini amjy ly chiu sa naira y ny y baly mana khala y py patheu thai y leang,” napi.

Isu ly mymy i dei ai nai satang thui pi bi nai

(Mt 17.22–23; Lk 9.43b–45)

30Naibaly nichi ly hu i nai theu iy, Kalili pri y tako prei i, ni ly ami py pany ai nai ngai y. 31Ati mana nai mo nabaly mymy ly abangnaichi ai patiu i nichi teng y, “Khumi i Chapo ai ly khumichi i kiu y patiu hai ai i, ni ai padei u ai; naibaly padei u nai bo y kani thomrei kani y ly angthau teang ai,” napi. 32Na i py nichi ly mymy i leu thui nai ly dawn ai nai pany y, mymy teng y khy deng vam y.

Ami len keh mo?

(Mt 18.1–5; Lk 9.46–48)

33Naibaly nichi ly Kapernaum avang y tym i, mymy ly yhm angtheung y awm nai thym khala y ly nichi teng y, “Lam y ly ati leu aei u mo?” nanai deng. 34Na i py nichi ly mymychi theung y ami len keh ai mo? nanai lam y aei u chum veng nai deaungkho y sai py katheu y.#Lk 22.24 35Naibaly mymy ly ateh iy holai nyhreichi ai palau i nichi teng y, “Ami py kangman keh awm ai ngai nai ngierei ly bawibawichi tleaung y kangkhym keh y awm ai nai tla i, bawibawichi ai sabawm nai keung y awm ai nai tla.#Mt 20.26–27, 23.11; Mk 10.43–44; Lk 22.26 36Naibaly mymy ly deaungdichy leaungrei ai pahawi iy nichi theung y angdo hai: naibaly ni ai takawi i nichi teng y, 37“Ami py kai i amyn deaungkho y hinai kamta deaungdichy leaungrei ai py kawn nai ngierei ly kaimy ai kawn nai bo; ami py kai ai kawn nai ngierei ly kai ai kawn nai ny y leang, kai ai pato nai keung ai kawn nai bo,” napi.#Mt 10.40; Lk 10.16; Jh 13.20

Achi ai paka y nai khumichi ly achi mang y asa nai

(Lk 9.49–50)

38Johan my ly ni teng y, “Sara awi, kaichi ly ami mo nang i amyn y vawinamchi ai patheu nai niu i, ni ly achi teng y abang nai ny y nai deaungkho y kaichi my paka veng na a,” napi. 39Na i py Isu my ly, “Paka u reng moh; kai i amyn y atiti lyh ai awm nai sa makho iy, kai ai thui preaung praw thai ai nai khumi ami py by y. 40Achi ai paka y nai khumi ly achi i mang y asa nai na a.#Mt 12.30; Lk 11.23 41Ami py nangchi ly Krista i khumi ne nai deaungkho y nangchi ai tui khaurei nei ai nai pei nai ngierei ly, meitang khyp kang thui pi, ni ly kawn nai vang ly pipi tamo pajau y leang.

Kamngo parawi nairachi

(Mt 18.6–9; Lk 17.1–2)

42Naibaly ami py hini kai ai ym nai keung theangchichy naichi theung y leaungrei ai py atlym hai nai ngierei ly, mymy i kaneaung y choh nip naira lengseaung kalen pui awi hai iy, pangli tui y aphi vui i khyly, mymy i vui hawi keh alam ai. 43Naibaly nang i kiu my nang ai atlym hai baly tameang vui; kiu angym naimy ngari angawm, mai dei pajau y naira y tla nai tleaung y ly, kiu angym y naimy heng naira y kun ai nai nang i vui hawi keh alam.#Mt 5.30 44[Hu y ly nichi i kaleung dei vai y; naibaly mai py dei vai y.] 45Naibaly nang i kheu my nang ai atlym hai baly tameang vui; kheu angym iy ngari angawm y aphi nai tleaung y ly kheu tabai naimy hengra y kun ai nai nang i vui hawi keh alam. 46[Hu y ly nichi i kaleung dei vai y, naibaly mai py dei vai y.] 47Naibaly nang i mei ly nang ai atlym hai baly takhawi piu vui:#Mt 5.29 48mei angym iy ngari angawm, kaleung dei vai y nai hawi mai dei vai y naira y nang ai aphi nai tleaung y ly, mei makengrei awm iy, Tameuh i peang naira y kun ai nai nang i vui hawi keh alam.#Is 66.24 49Khumi bawibawichi ai mai y lum hai ai. 50Palawi ly hawi, na i py palawi ly dau veng baly ati my lum hai bi ai mo? Nangmychi kypkyp teng y palawi awm sy ly, ado u,” napi.#Mt 5.13; Lk 14.34–35

Currently Selected:

MARKA 9: KCL02

Highlight

Copy