MATTHAI 3

Baptis sa nai Johan i leu thui nai

(Mk 1.1–3; Lk 3.1–18; Jh 1.19–28)

1Naibaly hunai thym khala y ly Baptis sa nai Johan ly Judai pri i daichi ka-vym y leu thui nai tym i, 2“Uikhei u, kani pri my peang nai ly kasa bo,” napi.#Mt 4.17; Mk 1.15 3Amo Isaia my,#Is 40.3

“Daichi ka-vym y aeu nai raawi ly,”

“Areng i lamlen so u rym ly,

Mymy i lam cheaungkhang pataw u,’ napi,”

nanai thui nai ly mymy ne he.

4Naibaly huni Johan ly kula-iu mui akhiu i, akeng y ly mawipeih khobai py akawm; mymy i cha nai ly akhu tama hawi khawi hang ne.#2 Ar 5Hunai thym khala y ly Jerusalem i khumichi hawi, Judai pri i khumi bawibawi hawi, Jordan tavo taku i khumi bawibawi py theu u i, 6mymy teng y chei u iy mymychi i kamngo ahui u nai Jordan tavo y mymy teng y baptisma nga u bo.

7Na i py mymy ly Pharisaichi hawi Saddukaichi neangneang ly baptisma nga ai nai jeu naichi ai niu baly mymychi teng y, “Pavui i kangpreangchi awi! Kado theu naira ang tym ai nai ly preang veng ai nai ami my ang pachei mo?#Mt 12.34, 23.33 8Hunaibaly uikhei nai amyn ataing ai nai athai u: ‘Abraham ly kaichi i amsi sangum na a,’ 9nanai paleung theung y adawn u moh; Tameuh my hini lengseaungchi ai ly Abraham i kangpreang y angdo hai thai na a, kang napi.#Jh 8.33 10Vai py dengkeaung pakeung tleirei y atiu khai yb bo; hunaibaly dengkeaung tleirei athai kahawi athai y nai ngierei ly paliu iy mai y aphi nai ne.#Mt 7.19

11“Kai ly nangchi uikhei ai nai tui hawi baptis kang sa nai teu; na i py kai i nithun y ang jeu ai nai ly kai tleaung y len keh nai ne, kai ly ni i phainai syn ai nai py ataing y leang; mymy ly Phailo Kachai hawi mai hawi baptis ang sa pi ai mang. 12Mymy i paho ly kiu y awm, naibaly mymy ly mymy i ho nai meingtym pachai pan iy, mymy i choh ly chenghi y adyh ai, choh ali naini padei pajau y nai mai y leng ai,” napi.

Isu i baptisma nga nai

(Mk 1.9–11; Jh 1.19–28)

13Hunai thym khala y ly Isu ly Johan teng y baptisma nga ai nai Kalili pri i dengdairei Jordan tavo y mymy teng y chei bo. 14Na i py Johan my ly “Kai ly nang teng y baptisma nga ai nai aly awm, nang ly kai teng y jeu lawh a?” nanai mymy ai paka ai nai tau. 15Na i py Isu my ni teng y, “Vai avo tanga sy, hinai kamta hawi naira bawibawi patawm ai nai ly ani i vui y apu,” nanai pathang. Hunaibaly avo napi bo. 16Naibaly Isu ly baptisma nga pajau bo nabaly mymy ly tui theung i dengdairei theu praw: naibaly khen cham, kani am-eaung iy Tameuh i Phailo ly buhu ka-tawm kathiu i, mymy i tlang tleaung y chym nai niu. 17Naibaly khen cham, kani pri mang i dengdairei raawi ly, “Hini ly kai i Chapo ngai parai nai ne, kai ly mymy i tlang tleaung y khrikhri pa-rei kakawn parai,” napi.#AA 22.2; Sam 2.7; Is 42.1; Mt 12.18, 17.5; Mk 1.11; Lk 9.35

Currently Selected:

MATTHAI 3: KCL02

Highlight

Copy