LUKA 1
1
Angchei i leu
1Huni achi theung y atiti tym angym nai satang, angchei i dengdairei niu naichi my achi ai thui pi nai ka-tawm khumi neangneangchi my tajiu ai nai tau bo; 2huna nai deaungkho y Theophila kahawi keh awi, ati cheaungkhang pakeung i dengdairei hawihai palai kapatawm i, 3nang ai patiu nai leu ly teng parai, nanai nang pany thai ai nai, 4nang i vui ka-thui tajiu i khyly hawi ai kana kai ly.
Baptis sa nai Johan tapen ai nai thai hai nai
5Judai pri i samrang Heroda awm khala y Abija i kamkawm theung i pathyp pi nai keung leaungrei awm, amyn ly Zakaria ne; ni my ly Aron i kangpreangchi theung i nai aju la bo, amyn ly Elizabet ne.#1 Neng 24.10 6Nini leaung nyhrei ly cheh ai nai by y pa-rei my Areng i leu pei nai hawi reita bawibawi patawm iy, Tameuh i mei ka-niu y awm nai sai hawi parai nai ne. 7Na i py Elizabet ly teng nai deaungkho y chanau so y, naibaly myni ly miteaung tlai veng bo.
8Naibaly hina nai ne, ni ly mymy i kamkawmchi i ka-thui sa nai kamta Tameuh i mo y pathyp pi nai keung i kalop amsi nai thym khala y ly, 9pathyp pi nai keung i reita kamta, ni i vui ly achura yhm kalen pui y kun iy rimui patawi ai nai tla. 10Naibaly rimui patawi nai neng khala y khumi mipuichi bawibawi ly angam mang y chiu sa u. 11Naibaly kani pri i amtaw thau nai leaungrei ly rimui patawi nai maicham lamtang mang y angdo i, ni teng y amteng. 12Naibaly Zakaria my niu baly paleung bi i, jei py jei. 13Na i py kani pri i amtaw thau nai my ly mymy teng y, “Zakaria, jei moh; nang i hnei nai ly ang thai na a: nang i aju Elizabet my chapo ang tapen pi ai, amyn y Johan pathi ai nai tla. 14Naibaly nang ly kawn py kawn ai, amo py theu ai; mymy ai tapen nai khala y ly khumi neangneangchi my kawn teang ai. 15Ati mana nai mo nabaly ni ly Areng khi y ly khumi kalen ne ai i, kreip athai hang hawi mhm ly den py nei y ai:amhm taku theung i ka-so Phailo Kachai my kawi ai.#Kati 6.3 16Israela kangpreang neangneangchi ai py mychi i Areng Tameuh teng y ali hai teang ai. 17Naibaly ampochi i paleung ly chanauchi mang y ali hai ai nai hawi, leu tangai y naichi ai khumi kahawichi i cheng naira mang y ali hai ai nai py, Areng i vui y amcheang yb nai khumichi ai angvei hai rym ai nai, Elija i paleung hawi sa thai naira apu naimy Areng i mo y tako ai,” napi.#Mal 4.5–6
18Naibaly Zakaria my kani pri i amtaw thau nai teng y ly, “Huni ly mana kapany ai mo? Kai ly miteaung bo, kai i aju py miteaung bo,” napi. 19Naibaly kani pri i amtaw thau nai my ly pathang i mymy teng y, “Kai ly Kabriela, Tameuh i mo y angdo reng nai ne: nang hawi arum ai nai hawi, hini satang kahawi kang thui pi ai nai ang pato nai he.#Dan 8.16, 9.21 20Khen cham, kai i leu thui naichi ly neng khyp khala tym ai nai ly nang ym y nai deaungkho y, hunichi tym y ryrei ly nang den py leu katheu y ai, katheu py katheu ai ny y,” napi. 21Naibaly khumichi my ly Zakaria ai ajeng jo i, achura yhm kalen pui theung y kra kyh nai deaungkho y lyh parai. 22Naibaly mymy ly theu nai khala y nichi teng y leu katheu thai y bo: hunaibaly ni ly achura yhm kalen pui y ati mo tahm, nanai pany u bo; naibaly mymy ly nichi hawi kiu apali jojo i, leu katheu thai y naimy awm jo. 23Naibaly hina nai ne, mymy i kalop sa ai nai kani chi bo nabaly mymy i yhm y vawi ali teang.
24Hunai bo y ly mymy i aju Elizabet ly deaungdi aniu bo; naibaly mymy ly, 25“Khumichi teng y kai i amyn hawi y nai khiu ai nai Areng my kai ai ang niu khala y hina nai ang sa pi bo,” nanai lo pangrei aheu.
Isu tapen ai nai thai hai nai
26Naibaly tariu lo y ly Tameuh my Kalili pri i avang harei Nazaret napi naira i anglo kachai leaungrei teng y kani pri i amtaw thau nai Kabriela ai pato. 27Huni anglo ly Davida i kangpreang theung i khumi leaungrei Josepha napi nai i aju angam nai ne; anglo amyn ly Mari ne.#Mt 1.18 28Naibaly kani pri i amtaw thau nai ly mymy teng y kun i, “Kawn ba ngai keh nai awi, Areng ly nang teng y awm,” napi. 29Naibaly huni leu thui nai deaungkho y mymy ly khrikhri pa-rei paleung bi i, ati mana nai y kai ai kawn ba napi nai mo? nanai adawn. 30Naibaly kani pri i amtaw thau nai my ly mymy teng y, “Mari, jei moh: nang ai ly Tameuh my ang tamen mang. 31Khen cham, nang deaungdi aniu ai i, chapo tapen ai: amyn y Isu pathi ai nai tla.#Mt 1.21 32Mymy ly khumi kalen lawn ai i, salo kangteng i Chapo napi ai; Areng Tameuh my mymy i amsi Davida i areng atehra ly pei ai;#2 Sam 7.12, 13, 16; Is 9.7 33mymy ly Jakob kangpreangchi tleaung y deungtasarei areng lawn ai i, my i peang nai ly temra awm ai ny y,” napi.
34Naibaly Mari my kani pri i amtaw thau nai teng y ly, “Huni ly mana awm ai mo? Kai ly neampacho by y pui be,” napi. 35Naibaly kani pri i amtaw thau nai my ly pathang i mymy teng y, “Nang i tlang tleaung y Phailo Kachai tym ai i, Salo Kangteng i atiti sa thai naira ly nang ai khiu ai mang; hunai deaungkho y nang i tapen ai nai py kachai, Tameuh i Chapo napi ai. 36Naibaly khen cham, nang i amjo amnau Elizabet my py miteaung mang y neampacho deaungdi aniu bo: teng napi reng nai ly hini lo ly tariu lo bo. 37Tameuh teng i nai theu nai leu ly atiti so thai y nai ha py by y.#AA 18.14 38Naibaly Mari my, “Khen cham, kai ly Areng i miseaung nu ne, nang i leu kamta kai i tlang tleaung y tym sy,” napi. Naibaly kani pri i amtaw thau nai my ly mymy ai khai su bo.
Mari ly Elizabet teng y pavai nai
39Hunai khala y Mari ly angthau i, mawi tleaung y Judai pri i avang harei naira y chei praw: 40naibaly Zakaria i yhm y kun iy, Elizabet ai kawn ba, napi. 41Naibaly hina nai ne, Elizabet my Mari i kawn nai leu thai baly my i taku theung i deaungdicho ly angto; naibaly Elizabet ly Phailo Kachi my kawi iy, tao pajeng parai naimy aeu i, 42“Nang ly neampachychi theung y py taham hawi, nang i taku theung i athai nai py taham hawi. 43Kai i Areng i amhm kai teng y jeu nai ly ati mana nai mo? 44Khen cham, nang i kawn nai leu katyn kai i kano y kun nai kha y ly deaungdicho ly kawn nai deaungkho y kai i taku theung y angto. 45Ym nai neampachy ly taham hawi, mymy teng y Areng my leu thui nai ly tym nai y,” napi.
Mari i palo nai khulym
46Naibaly Mari my,#1 Sam 2.1–10
Kai i hengra ly Areng ai ang palo mang:
47Kai i phailo py kai ai Paheng nai Keung Tameuh
teng y amo theu parai bo.
48Mymy i miseaung nu i cheng theang nai sai ang niu bo;#1 Sam 1.11
Khen cham, vai i ka-so deung kangthau bawibawichi
my kai ai taham hawi, napi ai.
49Atiti sa thai nai keung my kai i tlang tleaung y atiti
ka-teng ny y nai ang sa pi bo;
Mymy i amyn py kachai ne.
50Mymy ai tahm khai naichi ai ly deung kangthau
khrairei ang pahen jojo ai.
51Atho awm nai sai ly mymy i kiuban y amteng bo;
Am-e naichi ai ly mymychi i paleung adawn naira y
ahei hai bo.
52Arengchi ai ly mychi i atehra i nai tasyh vui i,
Cheng katheangchi ai ang pasang bo.#Job 5.11, 12.19
53Kajeu alam naichi ai ly ati mo hawi parai nai hawi
kajeu ang kawi hai bo;
Kanangchi ai ly beng tlairei pato veng bo.
54Isichi teng y thui nai kamta,
55Abraham hawi, my i kangpreangchi ai ly mymy i pahen#AA 17.7
ai nai sai deungtasarei pany jo ai nai.
Mymy i miseaung Israela ai ly sabawm bo,” napi.
56Naibaly Mari ly mymy teng y lo thomrei awm i, mymy i yhm y vawi ali teang bo.
Baptis sa nai Johan ai tapen nai
57Naibaly Elizabet ly deaungdi tapen ai nai neng i, chapo tapen bo. 58Naibaly my i saleaungchi hawi amjychi my ly Areng my ni ai tamen parai, nanai pany i kawn hai. 59Naibaly hina nai ne, nini ly kani tajarei kani y ly deaungdi ai lengkhym takip ai nai chei hai i, amyn ly ampo i amyn Zakaria pathi teang ai nai tau bo.#Lev 12.3 60Na i py amhm my, “Ny y leang, ni ai ly Johan pathi ai nai tla,” nanai pathang. 61Naibaly nichi my mymy teng y, “Nang i amjychi theung y hini amyn ly ami py by y be,” napi. 62Naibaly nichi ly my i ampo teng y ly, “Amyn ly ami pathi khyly ngai mo?” nanai kiu y apali. 63Naibaly ni ly cha tajiu ra hnei i, “Amyn ly Johan ne,” nanai tajiu iy nichi bawibawi my lyh parai. 64Naibaly my i labeaung hawi palai ly vaimy asu ryp iy, mymy ly leu katheu i Tameuh ai palo bo. 65Naibaly nini i saleaung bawibawichi ly jeu i, huni satang bawibawi ly Judai pri mawi tleaung meingtym tleirei y amthang prei. 66Naibaly thai nai ngiereichi ly mychi i paleung theung y dawn cheng i, Areng i kiu my ly mymy teng y awm nai deaungkho y, “Hini deaungdicho ly mana mana lawn ai mo?” napi.
Zakria i amo
67Naibaly mymy i ampo Zakaria ly Philo Kachai my kawi i,
68“Israelachi i Areng Tameuh ly palo nai awm sy:
Ati mana nai mo nabaly khaileaung palum angchei
kha i ka-so
69Mymy i amo kachaichi i labeaung y thui nai kamta
70Achi i paleung ka-echi hawi, achi ai niu ngai y naichi
bawibawi teng i nai paheng ai nai hawi,
71Achi i amsichi ai pahen ai nai adeu nai kamta sa ai
nai hawi,
Mymy i leu adeu nai adawn vau ai nai py.
Ni ly mymy i khumichi ai de i atleu naira hawi,
72Mymy i miseaung Davida i dengtheungchi theung y
ly paheng nai taki py ang sa pi bo.
73Achi i amsi Abraham teng y vaineng abeu khei nai ly
Achi ai paleung ka-echi khi i nai lawi hai iy,
74Achi heng nai ryrei ly mymy i mei ka-niu y chai parai
nai hawi, hawi parai naimy awm iy,
75Jei y naimy mymy i kalop sa pajau ai nai ly.
76Ne deang awi, nang ai ly salo Kangteng i amo ang
napi ai mang;#Mal 3.1
77Ati mana nai mo nabaly nang ly mymy i lam
cheaungkhang sa rym ai nai hawi,
Achi i Tameuh i pahen nai paleung awm nai saho y
Mychi i kamngo pahen ai nai,
78Mymy i khumichi teng y pahengra leu pany hai ai
nai py,
Areng i mo y nang tako ai;
79Kaveng theung y hawi, deira ka-khui y ateh naichi ai angvang hai ai nai hawi,#Is 9.2
Awm nem naira lam y achi i kheu takan hai ai nai py,
Salo mang i dengdairei kani si nai ly achi ai ang
de ai,” nanai thui yb.
80Naibaly deaungdicho ly len ryh len ryh i, paleung py khaw ryh khaw ryh, naibaly Israelachi teng y amteng y ryrei ly daichi ka-vymra y awm jo.
Currently Selected:
LUKA 1: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.
