ATITI AWM ANGCHEI NAI 30

1Na i py Rakeli ly Jakob i vui cho chanau leaungrei py tapen pi y nai deaungkho y mymy ly amjo ai paleung hawi y nai khai i Jakob teng y, “Kai ly cho chanau ngo y baly kadei ai,” napi.

2Huna nai khala Jakob ly Rakeli ai kado theu hai i, “Kai ly Tameuh lawh sai a? Mymy leaungrei naini nang ai deaungdi tapen hai pajau khyh nai ne,” napi.

3Rakeli my, “Hi y kai i miseaung nu Bilaha awm, ni hawi phai i ahawi ly deaungdi nga baly, ni i saho y kai ly amhm leaungrei lawm ai,” napi. 4Naibaly ni ly miseaung nu Bilaha ai Jakob teng y au i, Jakob ly Bilaha hawi i ahawi bo. 5Naibaly Bilaha ly deaungdi aniu i Jakob i vui chapo tapen pi nai ne. 6Rakeli ly “Tameuh my kai i vui tara chih pi bo. Mymy ly kai i chiu sa nai pathang pi i kai ai chapo ang pei nai bo,” nanai thui. Hunai deaungkho y ni ly huni deaungdi ai Dan,#30.6 Dan: Hebrai leu y “kai i kangai Tara chih pi,” nanai sai ne. nanai amyn pathi nai ne. 7Bilaha ly deaungdi aniu bi i Jakob i vui pa-nyh chapo tapen pi bi bo. 8Huna nai khala Rakeli my, “Kai ly kaimy i amjo hawi atiu nai ly kaimy kapajau vui bo,” nanai thui. Hunai deaungkho y ni ly huni deaungdi ai Naphtali,#30.8 Naphtali: Hebrai leu y “atiu alawm,” nanai sai ne. nanai amyn pathi nai ne.

9Leah py deaungdi so y vui nai apany nai khala, mymy ly miseaung nu Zilpah ai Jakob teng y aju palawn ai nai au bo. 10Naibaly Zilpah my Jakob i vui chapo leaungrei tapen pi. 11Leah my, “Kai ly hawi naira nga bo,” nanai thui. Hunai deaungkho y huni deaungdi ai Kad,#30.11 Kad: Hebrai leu y “taham hawi” nanai sai ne. nanai amyn pathi nai ne. 12Zilpah my Jakob i vui chapo leaungrei tapen pi bi i, 13Leah ly “Kai ai amo theu hai bo, neampachychi my kai ai taham hawi nai neampachy, nanai ang palau u ai,” nanai thui. Hunai deaungkho y huni deaungdi ai Aser,#30.13 Aser: Hebrai leu y “Amotheu” nanai sai ne. nanai amyn pathi bo.

14Hlau cho tyn nai neng, Ruben ly hlau y chei nai khala, Khuma athai #30.14 khuma athai: cho chanau sa hai pajau, anglo asi palawn nai ne. niu i amhm Leah i vui syn pi bo. Rakeli my Leah teng y, “Pahen parai naimy nang i chapo my syn pi nai khuma athai pei mai kyh,” napi.

15Leah my, “Nang ly kai i juvo ai nang my la vui nai ly paleung anyp y rai sai a? Vai py kai i chapo my syn pi nai Khuma athaichi paleungno bi lawh ly” napi.

Rakeli my, “Nang i chapo my syn pi nai Khuma athaichi pei baly, nang vai dym Jakob hawi i ahawi teu,” napi.

16Jakob ly dym mang y hlau i nai vawi khala, Leah my lamchung i ni my, “Kai i chapo my syn pi nai khuma athai ly Rakeli ai kapei veng nai deaungkho y, vai dym ly kai hawi i ahawi ai nai tla,” napi i, huni vum Jakob ly Leah hawi i ahawi bo.

17Tameuh my Leah i chiu sa nai pathang pi nai deaungkho y mymy ly deaungdi aniu i pa-ngo chapo leaungrei tapen pi bi bo. 18Naibaly Leah my, “Kai i miseaung nu ai kaimy i juvo teng y i ai nai kapei nai deaungkho y, Tameuh my kai ai kawn vang ang pei nai bo,” nanai thui. Hunai deaungkho y huni deaungdi ai Isakhar,#30.18 Isakhar: Hebrai leu y “kawn vang nga,” nanai sai ne. nanai amyn pathi nai ne. 19Leah ly deaungdi aniu bi i, tariu nai chapo tapen pi bi bo. 20Naibaly Leah ly “Tameuh my kai ai langseaung kahawi ang pei nai ne. Juvo i vui kaimy chapo leaung tariurei katapen pi nai deaungkho y mymy ly kai ai paleung bie jojo ai,” nanai thui. Hunai deaungkho y huni deaungdi ai Zebulun,#30.20 Zebulun: Hebrai leu y “Langseaung kanga,” nanai sai ne. nanai amyn pathi bo. 21Kangkhym kangtem y ly chaniu Dinah ai tapen nai ne.

22Naibaly Tameuh my Rakeli ai pany pi nai deaungkho y, ni i chiu sa nai pathang pi i, deaungdi sa ai nai ka-vo dawn pi bo. 23Mymy ly deaungdi aniu i chapo leaungrei tapen pi. Rakeli ly “Tameuh my kai ai chapo pei nai deaungkho y, amichi my kai ai cheh nai ly tama hai vui bo. 24Areng my kai ai chapo pei bi sy,” nanai thui. Hunai deaungkho y huni deaungdi ai Josepha,#30.24 Josepha: Hebrai leu y “pei panawi bi sy” nanai sai ne. nanai amyn pathi nai ne.

Jakob hawi Labana nini tawnbawi amji hawi nai

25Josepha ai tapen nai bo y, Jakob ly Labana teng y, “Kaimy i yhm mang y vawi ai nai kai ai pei kyh. 26Kai ly hi i nai theu ai bo i, nang teng y kalop sa naira y nga naichi hawi cho chanauchi py, ajuchi ai py kai hawi abang ai nai pei kyh; kai i kalop sa nai saichi py nangmy pany yb nai teu bo,” napi.

27Huna nai khala Labana ly mymy teng y, “Kaimy kang thui pi ai; nang i saho y Areng my kai ai amtheaung hai, nanai kang pany pi bo. 28Nang i ngai nai vang thui ba, kang pei ai,” napi.

29Jakob my, “Kai ly nang i vui kalop mana kang sa pi mo, nanai py, kai my kang kry pi nai saho y nang i tawnbawichi mana tanrei peung mo, nanai py, nang pany nai teu bo. 30Kai tym y rai khala nang i tawnbawichi ly maidenreichy khyh, vai ly neangneang peung bo. Kai i saho y Areng ly nang ai amtheaung naira ang pei nai ne. Vai kai ly kaimy i dengtheungchi i vui nang chawn ai nai molam kalop sa ai nai neng tym bo,” napi

31Labana ly “Nang ai vang majirei kang pei ai mo?” napi.

Jakob my, “Kai ly vang ngai y leang. Hini leu kang thui pi nai ngai baly nang i beramchi kaimy kang kry pi bi ai. 32Vaini kai ly tawnbawi kanghuchi theung y amki iy khen ai. Hunichi theung y beram kamnum hawi apreupra nai mi-ichi ai la ai. Hunichi ly kai i vui ne sy. 33Vai mo mang y kai i hawi nai sai py nang niu ai mang. Nangmy kai i vang nga naichi ai khen teang nai khala, kai i nga nai mi-ichi theung y apreupra nai ny y naichi, beramchi theung y kamnum ny y naichi niu lawh baly huni ly paviu nai bo, nanai nang pany pajau,” napi.

34Labana my, “Ngai mang, nang i thui nai kamta so sina,” napi. 35Na i py huni kani y Labana ly mi-i nu kariurachi, mi-i katai apreupra naichi hawi beram kamnumchi khai takhra iy mymy i chapochi teng y kry ai nai au bo. 36Naibaly Jakob hawi kani thomrei ka-tengra y awm hai vui bo. Jakob ly ampu Labana i awm nai beramchi ai hawihai kry pi nai ne.

37Jakob ly maicha keung, Baden keung hawi po kalang keung changpi kanghengchi la iy o-pangen i ki lei baly, kangleung hawi ariurala nai ne. 38Mymy ly hunichi ai beramchi, mi-ichi i tui nei nai euku sahawi y khai pi. Ati mana nai mo nabaly beram hawi mi-ichi ly tui nei ai nai chei khala, po achiu reng nai y hunai kamta khai pi nai ne. 39Naibaly mi-ichi ly huni dengkeaung changpi kariura mo y tym baly po achyh i po nga, tapen baly kariura naichi tapen bo.

40Jakob ly beramchi hawi mi-ichi khai takhra iy, Labana i beram kanghu, mi-i kanghu theung i nai kamnum hawi ariura naichi mo y mymy i beramchi hawi mi-ichi ai mo atha hai bo. Hunaibaly Jakob mymy i beram hawi mi-ichi ly peung ryh peung ryh nai y, Labana i tawnbawichi theung i nai mymy i tawnbawichi ai khai takhra bo.

41Jakob ly veung hawi nai beram kanghuchi hawi mi-i kanghuchi ai tui neira euku mo y huni dengkeaung changpi ariura naichi khai pi nai ne; naibaly tawnbawichi ly huni dengkeaung changpi ariura nai sala y po ahui u i po nga bo. 42Na i py mymy ly atho di nai tawnbawichi i mo y ly khai pi y leang. Naibaly atho di nai tawnbawichi ly Labana i ne; mymy i tawnbawichi ly khri pa-rei veung hawi parai tlai naichi ne. 43Huna nai deaungkho y Jakob ly yhmtheaung katui nawi ryh nawi ryh i, mymy ly tawnbawi kanghuchi, miseaungchi, kula-iuchi hawi keaungngo kano kasauchi py neangneang awm bo.

Currently Selected:

ATITI AWM ANGCHEI NAI 30: KCL02

Highlight

Copy