ATITI AWM ANGCHEI NAI 29

Labana i yhm y Jakob tym nai

1Jakob ly nisi pri mang y tako veangveang nai ne. 2Huni pri y tym nai khala beram kanghu phy thomrei ambeu taki lum nai tuikan harei niu ryp bo. Huna nai takilum nai ly beram kanghuchi ai huni tuikan i tui panei reng nai deaungkho y ne. Huni tuikan ai ly lengseaung pui hawi tleang khup bo. 3Beram kanghuchi ly hu y tym nai tleirei beram typ nai keungchi ly lengseaung pui kasyh vui iy beramchi ai tui panei nai ne. Tui panei pajau bo nabaly nichi ly lengseaung pui ai hu y kasyh ali teang reng.

4Jakob my beram typ nai keungchi teng y, “Kai i ahawichi awi, nangchi ly ma i jeu u nai mo?” nanai deng.

Nichi my, “Haran mary i dengdairei jeu u nai ne,” napi.

5Mymy ly nichi teng y, “Nahora i katu Labana ai pany u a?” nanai deng.

Nichi my, “Kaichi pany na a,” nanai pathang u.

6Jakob my nichi teng y, “Mymy ly noso hawi a?” nanai deng.

Nichi my, “Hawi na a, khen cham, mymy i chaniu Rakeli ly beram kanghuchi hawi hi y ang jeu dudu bo,” napi.

7Jakob my nichi teng y, “Kani awm mang rai, beramchi ai py pangym ai nai neng ny y rai be; tui panei iy ati mana nai beramchi ai patlai u y lawh mo?” napi.

8Huna nai khala nichi my, “Kaichi huna nai ly so thai y; beram kanghu bawibawichi hini meingtym y tym angym iy lengseaung pui kasyh vui khala naini, beram kanghuchi ai tui panei thai khyh,” napi.

9Jakob ly nichi hawi leu arum nai thym khala, Rakeli ly beram kanghuchi hawi tym bo. 10Jakob ly Rakeli ai ampu Labana i beram kanghu hawi tym nai niu nai khala, ni ly tuikan sahawi y chei tapai i, lengseaung pui kasyh vui iy beramchi ai tui panei pi. 11Naibaly Jakob ly Rekeli ai pachawm iy, mymy ly amo theu naimy vo bo. 12Mymy ly ni teng y, “Kai ly ngampo i tuicho Rebeka i chapo ne,” napi.

Rekeli ly angpreng iy ampo teng y amti pi; 13naibaly mymy ly tuicho i chapo Jakob i satang thai nai kha y avum ai nai chei praw i takawi iy pachawm bo; naibaly yhm mang y vawi hai i, Jakob my Labana teng y mymy i satang angym pa-rei amti pi nai ne. 14Labana my, “Ne, nang ly kai i thi ngan kamji kypkyp ne,” napi. Naibaly Jakob ly hu y lo jeungrei awm bo.

Jakob ly Leah hawi Rakeli molam y Labana teng tham nai

15Labana my Jakob teng y, “Nang ly kai i miso ne nai deaungkho y jawm naimy kalop kang so hai y leang. Nang ly vang majirei kang pei baly ngai ai mo?” napi. 16Labana ly chaniu leaung nyhrei awm; Kalen ly Leah ne i, katheang ly Rakeli ne. 17Leah i meichi ly khrei ai nai hawi parai; na i py Rakeli ly mo py hawi, tlang apheung py hawi iy khen apu parai nai ne.

18Jakob ly Rakeli ai khrei nai deaungkho y ni ly “Kai hawi Rakeli ai apom hai ai nabaly, kai ly nang teng y saneng saryhrei kalop sa ai,” napi.

19Labana my, “Khumi takhrachi teng y deaung paseng nai tleaung y ly nang teng y kang pei nai ly hawi keh nai ne. Hi y kai hawi vanrei phai awm,” napi. 20Jakob ly Rakeli ai nga ai nai molam y saneng saryhrei kalop sa bo; naibaly mymy i vui ly khrei phi nai y, kani py neng py tanareichy apany khyh nai ne.

21Naibaly Jakob my Labana teng y, “Neng tym bo i, nang i chaniu hawi apom ai nai pei ba,” napi. 22Hunaibaly Labana my khumichi ai palau achu i apom nai pawi sa pi bo. 23Na i py huni vum y, Rakeli i jeng y Leah ai Jakob teng y tha i, Jakob ly Leah hawi i ahawi nai ne. 24(Labana ly chaniu Leah ai kry ai nai miseaung nu Zilpah ai pei.) 25Khawn mang y Jakob my mymy i aju ly Leah ne lawh nai pany i Labana teng y chei iy, “Hina nai kamta mana sa lawh mo? Rakeli ai nga ai nai i vui y kalop kang sa pi nai ne. Ati mana nai kai ai tapawp lawh mo?” napi.

26Labana my, “Hi i reita ly chaniu kalen ai deaung paseng man y naimy, chaniu katheang ai deaung paseng man vai y. 27Nang ly kai i kalop saneng saryhrei sa pi bi ai nabaly, apom pawi bo y kani saryhrei ajeng rai; huni bo baly Rakeli ai kang pei ai mang,” napi.

28Jakob py ngai nai ne i, apom nai pawi bo y kani saryhrei tym baly Labana my chaniu Rakeli ai Jakob i aju lawm ai nai pei bo. 29(Labana ly chaniu Rakeli ai kry ai nai miseaung nu Bilaha ai pei.) 30Naibaly Jakob ly Rakeli hawi i ahawi nai ne; mymy ly Leah tleaung y Rakeli ai khrei keh, tamen py tamen keh nai ne. Naibaly mymy ly Labana i kalop saneng saryhrei sa pi bi bo.

Jakob i vui cho chanau tapen pi nai

31Jakob ly Rakeli y tanrei Leah ai tamen y nai sai Areng my pany i Leah ai chanau sa ai nai ka-vo sa pi, na i py Rakeli ai ly teng hai bo. 32Leah ly deaungdi aniu i chapo tapen. Mymy ly “Areng my kai i patang nai ang niu i, vai ly kai ai py kai i juvo my tamen teang ai,” nanai thui i, huni chapo ai Ruben,#29.32 Ruben: Hebrai leu y “Chapo kanga, kai i paleung kabi niu pi bo,” nanai sai ne. nanai amyn pathi bo. 33Leah ly deaungdi aniu bi i chapo tapen bi; mymy ly “Areng my chapo ang pei bi bo; kai ai juvo my tamen nai ny y, nanai Areng my ang pany pi nai bo,” napi. Hunai deaungkho y huni chapo ai Semeon,#29.33 Semeon: Hebrai leu y “pany pi,” nanai sai ne. nanai amyn pathi nai ne. 34Ni ly deaungdi aniu bi i chapo tapen bi. Mymy naimy, “Vai ly kai i juvo my kai ai hawihai ang khaw hai ai bo, mymy i vui chapo leaung thomrei katapen pi bo,” napi. Hunai deaungkho y amyn ly Levi,#29.34 Levi: Hebrai leu y “kawm cheng,” nanai sai ne. nanai amyn pathi bo. 35Mymy ly deaungdi aniu taleang bi i, neampacho tapen taleang bi: mymy ly hini tlenrei nai ly Areng ai kapalo ai,” napi. Hunai deaungkho y Juda,#29.35 Juda: Hebrai leu y “palo ai,” nanai sai ne. nanai amyn pathi nai ne. Naibaly mymy ly chanau tapen nai ly anawn bo.

Currently Selected:

ATITI AWM ANGCHEI NAI 29: KCL02

Highlight

Copy