ATITI AWM ANGCHEI NAI 24

Isaka i vui aju hau pi nai

1Abraham ly khri pa-rei miteaung cheang bo; Areng my ni i sa nai cheaungkhangra y amtheaung hai nai ne. 2Ni ly mymy i yhmtheaung kry nai keung miseaung lu ai palau i, “Nang i kiu kai i phai anui y thawi iy vaineng abeu. 3Nang ly kai i chapo i vui aju ly Kanan chengchi theung y hau y leang, nanai kani hawi khaileaung palum nai keung Areng Tameuh i amyn y vaineng abeu. 4Kai ai tapen nai pri y kai i misochi theung i nai kai i chapo Isaka i vui aju hau pi ai nai nang chei ai nai tla,” napi.

5Na i py miseaung my, “Anglo ly mychi yhm i dengdairei hini pri y abang ai nai ngai y lawh baly, nang jeu nai pri mang y nang i chapo ai kahawi ai nai tla ai a?” nanai deng.

6Abraham my, “Kai i chapo ai huni pri y hawi ai nai dawn moh! 7Kani pri mang i Areng Tameuh ly kai i ampo hawi amjo amnauchi awm nai pri i dengdairei kai ai ang pahawi iy, kai i khumichi ai hini pri pei ai, nanai kai teng y adeu yb bo. Nang ly kai i chapo i vui aju hau nai nga hai ai nai, mymy ly kani pri amtaw thau nai ai huni pri y pato pi yb ai. 8Huni anglo my nang hawi abang ai nai ngai y lawh baly nang i vaineng abeu nai lawi bo mang. Na i py ati py ne sy, huni pri y kai i chapo ai hawi ai nai ly nang dawn moh,” napi. 9Naibaly miseaung ly Abraham i phai anui y kiu thawi i, Abraham i leu pei nai kamta sa ai nai vaineng abeu bo.

10Abraham i yhmtheaung kry nai keung miseaung lu ly yhmkeung Abraham teng i kula-iu horei la iy, Mesopotamia pri tosyh Nahora awm nai mary mang y chei bo. 11Ni ly huni meingtym y tym nai khala, mary angam mang i tuikan ahawi y kula-iuchi ai ambeu hai tliu bo. Huni neng ly kani ka-reu, mary theung i neampachychi tui deu nai neng ne. 12Ni ly “Kai i yhmkeung Abraham i Areng Tameuh, kai i areng teng y nang i leu adeu nai kamta vaini kai ai eaung hai kyh ba. 13Kai ly mary theung i anglochi tui deu nai hini tuikan sahawi y tym bo. 14Kaimy nichi theung i leaungrei teng y, ‘Pahen parai naimy nang i tui kacheangra i tui nei ai nai pei kyh,’ kanapi ai. Huni anglo my, ‘Nei bei, nang i kula-iuchi i vui py tui kang deu pi ai’ nanai thui lawh baly, huni anglo ly nangmy i miseaung Isaka i vui nangmy vawi pi yb nai ne sy. Kai i takeng nai kamta ne lawh baly, kai i yhmkeung teng y nangmy leu adeu pi khyp nai kamta sa, nanai kai pany pajau ai,” nanai chiu sa bo.

15Ni ly chiu sa nai pajau khyp nai khala y, anglo Rebeka ly tui kacheang tapawm naimy tym ryp bo. Huni anglo ly Abraham i amnau Nahora i aju Milaka i tapen nai Bethuela i chaniu ne. 16Huni neampachy ly khri pa-rei mo hawi parai nai anglo ne; mymy ly tuikan y tui deu ai nai satla. Kacheang y tui kawi baly vawi kalau teang bo. 17Miseaung ly avum ai nai chei kaliki iy, “Pahen parai naimy nang i tui kacheangra i tui nei kyh rai si,” napi.

18Anglo my, “Areng awi, nei bei,” napi i paleang tleaung i tui kacheang ly pala kaliki iy kiu hawi amkhaw pi i nei hai bo. 19Nei pajau nai bo y anglo my, “Nang i kula-iuchi tui bym pa-rei nei ai nai kaimy tui deu pi ai” napi. 20Anglo ly tui kacheangra i tui ai tawnbawichi tui nei nai eukura y lai pi iy, Kula-iuchi tui nei nai bym pa-rei tuikanra i tui deu pi kaliki bo. 21Huni miseaung py Areng my ni i kangai eaung hai ai mo, eaung hai y ai mo, nanai ajeng nai ne.

22Anglo ly tui deu pajau bo nabaly huni khumi my vang teng parai nai muku kano ly ni i notareang y amcho hai iy, muku ka-si nyhrei py kiu y amchiu hai bo. 23Huni bo y mymy ly “Nang i ampo amyn ami mo, nanai thui pi kyh; Vai dym kai hawi kai i khumichi anga ai nai meingtym awm a?” nanai deng.

24Neampachy my, “Kai i ampo ly Nahora hawi Milaka i chapo Bethuela ne,” 25“Kaichi i yhm y tawnbawichi i vui chohphi hawi acha kajeichi py awm, hu y nang i vui angara meingtym py awm,” napi.

26Naibaly huni khumi ly kheukhu di naimy Areng ai chiu bo. 27“Kai i areng teng y adeu nai leu ai ka-ym awm hai nai keung, kai i areng Abraham i Areng Tameuh ai ly palo nai awm sy. Areng ly kai i areng i misochi teng y kai ai ang pahawi nai ne,” napi.

28Anglo ly amhm yhm mang y angpreng i leu amti angym pa-rei thui pi. 29Rebeka ly Labana napi nai ampro awm; mymy ly Abraham i miseaung awm nai tuikan mang y ampreng bo. 30Labana ly tuicho teng y notareang amcho muku kano hawi muku ka-si nyhrei niu iy, huni khumi my tuicho teng y thui pi nai leu saichi py thai nai ne. Huna nai y mymy ly tuikan sahawi kula-iuchi awmra y angdo nai Abraham i miseaung teng y chei iy, 31“Areng my amtheaung hai nai khumi awi, kai i yhm y jeu bei. Ati mana nai hi y angdo jo lawh mo? Kai i yhm y nang anga ai nai ka-vo sa yb bo; nang i kula-iuchi i vui py meingtym awm,” napi.

32Hunaibaly huni khumi ly Labana i yhm y anga. Labana my vawnchi amteih hai iy kula-iuchi ai chohphi hawi acha kajeichi pacho pi. Naibaly Abraham i miseaung hawi ni i khumichi kheu asi ai nai tui la pi. 33Nichi i vui teicha teinei sawn pi nai khala y huni khumi my, “Kai thui ai awm nai ngierei thui chum nai khala cha nei ai,” napi.

Labana my, “Thui bei,” napi.

34Huni khumi my, “Kai ly Abraham i miseaung ne,” nanai thui amteaung i, 35“Areng my kai i yhmkeung ai khri pa-rei amtheaung hai i, mymy ly nang chawn bo. Areng my ni ai ly beram kanghu, mi-i kanghu, muku, tangka, miseaung neampacho neampachy, kula-iu hawi keaungngo kano kasauchi amtheaung hai nai ne. 36Kai i yhmkeung i aju Sarah ly miteaung theung mang y chapo leaungrei tapen; kai i yhmkeung my, ni i yhmtheaung katui bawibawichi ly chapo ai pei pi nai ne. 37Kai i yhmkeung my mymy i leu tangai ai nai kai ai vaineng abeu hai bo. Mymy ly ‘Kai i chapo i vui aju ly Kanan pri neampachychi theung i hau moh. 38Kai i ampo i khumichi napi nai kai i misochi teng y chei iy, hu y kai i chapo i vui aju hau pi,’ ang napi. 39Naibaly yhmkeung teng y kaimy, ‘Anglo ly kai nithun abang ai nai ngai y lawh baly mana sa ai mo?’ nanai deng. 40Mymy i pathang nai ly ‘Kaimy leu tangai pi jojo nai Areng my kani pri amtaw thau nai ai nang hawi vanrei pato iy, nang ai eaung naira ang pei ai; nang ly kai i chengchi napi nai kai i ampo amjo amnauchi theung y, kai i chapo i vui aju hau pi ai nai tla. 41Hinira y nangmy i vaineng lawi y ai nai lam harei awm khyh; kai i misochi teng y nang chei nai khala y mymychi ly akhi u vui lawh baly nangmy i sa nai vainengra i nang lawi ai mang,’ ang napi.

42Vaini kai tuikan y tym nai kha y, ‘Kai ly kai i yhmkeung Abraham i Areng Tameuh, kai i sa naira ai eaung naira pei kyh ba. 43Vai kai ly tuikan sahawi y tym bo. Tui deu ai nai anglo tym nai khala ni teng y, ‘nang i tui kacheangra i tui nei ai nai pei kyh,’ nanai kahnei ai. 44Ni my kai hawi kai i kula-iuchi ai tui nei ai nai pei lawh baly ni ly kai i yhmkeung chapo i vui nangmy vawi pi yb nai aju ne ai,’ nanai chiu kasa bo. 45Kai ly chiu kasa nai pajau y kyh rai khala, Rebeka ly tui kacheang atleang naimy tui deu ai nai tuikanra ang tym ryp bo. Kaimy ni teng y, ‘Pahen parai naimy tui nei kyh si,’ kanapi. 46Mymy ly tui kacheang pala kaliki iy, ‘Nei bei, nang i kula-iuchi i vui py tui kang deu pi ai,’ ang napi. Naibaly kai ly tui kanei, nimy kula-iuchi ai py tui panei pi. 47Kaimy ni teng y, “Nang i ampo ly ami mo?” nanai deng. Naibaly ni ly ‘Kai i ampo ly Nahora hawi Milaka i chapo Bethuela ne,’ ang napi. Naibaly kaimy ni i kiu y muku ka-sichi amchiu hai iy, notareang y py muku kano amcho hai bo. 48Naibaly kai ly kheukhu di naimy Areng teng chiu kasa. Kai i yhmkeung Abraham i chapo i vui aju awm nai amjo amnauchi teng y kai ai pahawi nai keung, kai i yhmkeung i Areng Tameuh ai kapalo nai ne. 49Vai nangchi my kai i yhmkeung kangai sa pi pajau ai mo, so pi pajau y ai mo, nanai kapany ai nai ngai; huna khala naini kai mana sa ai mo, nanai adawn bi ai,” napi.

50Bethuela hawi Labana nini my, “Areng my sa pi yb nai leaungsai ne nai deaungkho y, kaini my thui ai nai aly ngai y leang bo. 51Hi y Rebeka awm; ni ai hawi jo ba. Areng my dawn hai yb nai kamta nang yhmkeung i chapo i aju lawm ai nai hawi pajau mang,” napi. 52Abraham i miseaung my huni leu thai nai khala, ni ly lu meung iy Areng ai chiu bo. 53Naibaly ni teng y syn yb nai ateaungchi hawi muku tangka, vang kateng langseaungchi, patheaung iy Rebeka teng y pei pi. Ni ly Rebeka i ampro hawi amhm ai py vang kateng langseaungchi pei pi nai ne.

54Naibaly Abraham i miseaung hawi mymy i khumichi ly cha nei u chum baly hu y vum jei u bo. Abraham i miseaungchi ly khawn angthodyh ang thau u i miseaung lu my ly nichi teng y “Kaimy i yhmkeung teng y vawi ali teang ai bo,” napi.

55Na i py Rebeka i ampro hawi amhm my ni teng y, “Rebeka ly kaichi hawi kani saryhrei, ti y baly kani horei awm rai sy, huni bo y abang sy,” napi.

56Na i py nimy ly “Kai ai patawm moh. Areng my kai i khuleaung chei nai ly eaung hai bo; kaimy i yhmkeung teng y vawi ai nai pei u jau,” napi.

57Nichi my, “Rebeka ai palau cham rai si, mymy ly mana thui na moh,” napi. 58Naibaly nichi ly Rebeka ai palau u i ni teng y, “Nang ly hini khumi nithun abang ai nai ngai a?” nanai deng. Mymy ly “Abang ai,” napi.

59Naibaly nichimy Rebeka hawi kry nai keung miseaung ai, Abraham i miseaungchi hawi vanrei abang hai teang bo. 60Naibaly nichi my,

“Kaichi i tuicho ly kati pajau y nai khumi cheaungkhangchi i amhm lawm sy;

Nang i kangpreangchi ly paleung ka-echi i marychi ai py eaung u sy!”

nanai Rebeka ai amtheaungra pei nai ne.

61Naibaly Rebeka hawi kry nai keung miseaung ly Abraham i miseaungchi hawi vanrei abang ai nai kula-iu salo y atang u; naibaly nichi ly tako u amteaung bo.

62Isaka ly “Kai ai niu nai Tameuh kangheng i tuikan” nanai daichi ka-vym y tym i, Kanan pri tokalawi mang y awm bo. 63Mymy ly dym mang y amki ai nai angam y theu i, kula-iuchi tako tapai nai niu. 64Rebeka my Isaka ai niu baly kula-iu tleaung i nai satla i, 65mymy ly Abraham i miseaung teng y, “Achi mang y ang jeu tapai nai khumi ly ami mo?” nanai deng.

Nimy ly” Kai i yhmkeung na a,” nanai pathang. Naibaly Rebeka ly nidan la i meimai atleang praw bo.

66Miseaung my Isaka teng y, mymy i sa nai cheaungkhangchi amti pi nai ne. 67Naibaly Isaka my Rebeka ai ly amhm Sarah awm nai kanih yhm mang y chei hai i, Rebeka ly Isaka i aju lawm bo. Isaka ly Rebeka ai khri pa-rei khrei; mymy ly amhm dei nai molam y paleung si naira i nai awmnem naira nga bo.

Currently Selected:

ATITI AWM ANGCHEI NAI 24: KCL02

Highlight

Copy