ATITI AWM ANGCHEI NAI 19

Sodom mary i kamngo nai sai

1Kani pri amtaw thau nai leaung nyhrei ly huni dym Sodom mary y tym; Lota ly mary katheu pa-kho y ateh naimy awm. Mymy ly nini ai niu nai hawimy, ang thau iy nini hawi avum ai nai chei bo. Mymy ly nini i mo y lu meung naimy, 2“Arengni awi, kai ly nangni ai pacho panei ai nai ngai i, kai i yhm y jeu hawi kyh. Kheu asi hawi ly vai dym ly kai teng y ango hawi. Khawndam khawn angthodyh ang thau iy tako hawi,” napi. Na i py nini my, “Ny y leang, kaini ly vum torei hini mary theung y amki ai,” napi.

3Lota my takeng veangveang i kangkhym y nini ly yhm y kun hawi bo. Lota my miseaungchi teng y tako phyrei paawp ai nai leu pei i, angvyn i vui sawn pi. Naibaly nini ly cha hawi bo.

4Angvyn nini i y kyh rai khala y, Sodom mary i neampacho bawibawichi ly jeu i yhm katan u meuh bo. 5Nichi ly Lota ai palau u i ni teng y, “Vai dym nang i yhm y tym nai angvyn ni ly ma y mo? Nini ai patheu pi,” napi. Sodom mary i khumichi ly nini hawi kamleaung sa ai ngai nai ne.#Tara chih 19.22–24

6Lota ly angam mang y theu i katheu ly kho tawp teang. 7Lota my nichi teng y, “Ahawichi awi, huna nai hawi y nai ly so u reng moh! 8Khen cham, kai i chaniu anglo leaung nyhrei awm, nini ai kang patheu pi ai; nangmychi ngai nai kamta so u. Na i py angvyn ni ai ly ati sai py so hai u moh; nini ly kai i angvyn ne i kaimy kry nai ne,” napi.

9Na i py khumichi my, “Leh veng, nang ly cheng takhra teu! Kaichi ai leu pei nai nang ly ami mo? Nini avum ai nai tleaung y ly nang i tlang tleaung y hawi y keh nai tym lawh na,” napi u bo. Nichi ly Lota ai nui vui iy, katheu taphra ai nai atho sa u. 10Na i py yhm angtheung mang y awm nai angvyn leaung nyhrei my ly Lota ai yhm angtheung mang y ryh vui iy katheu kho hai vui bo. 11Naibaly nini my angam mang i khumichi ai mei paju hai vui i, mymychi ly katheu pa-kho hau keaung nai ne.#2 Ar 6.18

Lota Sodom mary i theu nai

12Nini my Lota teng y, “Hini mary theung y nang i chapochi, chaniuchi, meaungchachi hawi takhra ngamjo ngamnauchi awm baly hi i dengdairei theu hai pawn jau; 13Kaini my hini mary taphra veng ai bo. Areng my hini khumichi i thui tamawn nai sai deaungkho y Sodom mary taphra vui ai nai kaini ai pato nai bo,” napi.

14Naibaly Lota ly chaniu ni hawi apom hai ai nai neampachochi teng chei iy, “Hi i nai theu u kaliki jau; Areng my hini mary taphra ai bo,” napi. Na i py nichi ly amnui thui nai teu, nanai palawn u.

15Khutawi nai khala, kani pri amtaw thai nai nimy Lota teng y, “Hini mary taphra nai khala nang py abawi lawh na i, nang i aju py, chaniu leaung nyhrei py, hi i nai theu u kaliki,” napi. 16Lota ly niniuna nai deaungkho y Areng my pahen i, mymy i chaniu leaung nyhrei ai py, aju ai py, mymy ai py kiuban y amkhaw iy, mary theung i nai theu hai bo.#2 Pet 2.7 17Naibaly kani pri amtaw thai nai nini theung i leaungrei my, “Nangchi tleaung ai nai angpreng u! Nithun mang y khen u ali bi moh; adym y py anawn u moh. Mawi salo mang phai angpreng u, naibaly nangchi tleaung u ai,” napi.

18Na i py Lota my, “Areng awi, hunai kamta so hai mo kyh. 19Nang ly kai ai pahen nai deaungkho y kai ly tleaung bo; mawichi ly palo parai i, mawi salo y tym y rai khala my patang naira kai lawh na, nanai mawn parai. 20Mo kataw y mary katheang niu hawi a? Huni ly kasa nai deaungkho y kai i vui hawi khyp bo. Kai ai chei hai kyh; Huni meingtym ly theang i py hawi, nanai nangmy pany i, huni mang y angpreng si; naibaly kai awm nemra nga ai,” napi.

21Kani pri amtaw thau my, “Hawi mang, kai py kang ngai hai; huni mary ai ly taphra y leang, 22angpreng kaliki jau! Nang hu y tym y ryrei ly kai ati sai py so y leang mang,” napi. Huni mary katheang ai ly Zoar,#19.22: Zoar Zoar, nanai ly “Katheang,” nanai sai ne. nanai amyn pathi bo.

Sodom mary hawi Komora mary taphra nai

23Lota Zoar mary y tym baly kani si bo. 24Areng my Sodom hawi Komora mary salo y tlenrei khyh my kan mai kani nai hai bo. 25Khaileaung salo y prau nai cheaungkhang hawi adym ang deng leaunghawira awm nai khumichi py, mary i awm nai khumi bawibawichi ai py taphra be bo.#Mt 10.15, 11.23; Lk 10.12, 17.29; 2 Pet 2.6; Jud 1.7 26Na i py Lota i aju ly nithun mang y khen alengli teang lawh nai y, palawi lengseaung lawm vui bo.#Lk 17.23

27Khawn pa-nyh angthodyh Abraham ly Areng hawi leu arum nai meingtym mang y chei kaliki bo. 28Mymy ly Sodom mary hawi Komora mary ai py, adym ang deng leaunghawi bawibawi py khen angdeang i, huni pri dengdairei mai khyhthleung nai niu bo; huni ly tamang mai pui sau nai kamta maikhyh sau nai niu bo. 29Na i py Tameuh my Lota awm nai adym i mary bawibawi ai py taphra nai khala, Tameuh my Abraham ai pany jo i, Lota ai ly tleaung hai nai ne.

Ammon cheng hawi Moba cheng amteaung angchei nai

30Lota ly Zoar mary y awm vam y nai deaungkho y mymy i chaniu leaung nyhrei hawi mawi mang y lyn kalau iy tapiu theung y awm u nai ne. 31Chaniu Kalan my amnau teng y, “Ani i ampo ly miteaung cheang bo; ani hawi apom ai nai khaileaung pri y#19.31 khaileaung pri y; ti y baly hini pri y, nanai py ne. khumi neampacho leaungrei py by y i, ani ly deaungdi ngo y ai bo. 32Jeu ly ani i ampo ai kreip hang nei hai hawi sina; pavui nai khala y, ani ly mymy hawi i ahawi ai; naibaly ani ly mymy deaungkho y cho chanau nga ai,” napi. 33Huni dym y nini my ampo ai kreip hang panei i chaniu kalen ly ampo hawi i ahawi bo; ampo ly pavui ala nai deaungkho y ati sai py pany y.

34Pa-nyh kani y ly amjo my amnau teng y, “Jangdym kai ly i ahawi bo, vai dym py kreip hang panei bi sina; nang py kai kamta ni hawi i ba; huna khala naini ngaai i saho y ani ly cho chanau nga ai,” napi. 35Huni dym y ampo ai kreip hang nei hai hawi bi i, amnau ly ampo hawi i ahawi bo: ampo ly pavui ala nai y ati sai py pany y. 36Lota i chaniu leaung nyhrei ly huna nai kamta sa hawi nai deaungkho y deaungdi aniu hawi mei bo. 37Chaniu kalen ly deaungdi neampacho tapen i, amyn ly Moba,#19.37 Moba: Hebrai leu y “Kai i ampo dengdairei,” nanai sai ne. nanai amyn pathi bo. Vai deung kangthau Moba chengchi i amsi pajo ne. 38Chaniu katheang py chapo tapen teang i, amyn ly Benammi,#19.38: Benammi: Hebrai leu y “Kaimy amjy i chapo,” nanai sai ne. nanai pathi. Mymy ly vai deung kangthau Ammon chengchi i amsi pajo ne.

Currently Selected:

ATITI AWM ANGCHEI NAI 19: KCL02

Highlight

Copy