ATITI AWM ANGCHEI NAI 16

Hakari hawi Ismaela

1Abram i aju Sarai ly chanau leaungrei py so y. Na i py mymy teng y amyn Hakari napi nai Aikupta neampachy miseaung leaungrei awm. 2Sarai ly Abram teng y, “Areng my kai ai cho chanau ngo hai y nai bo. Kai deaungdi ngo teu lawh na moh; nang ly ati mana nai y kai i miseaung nu teng i y nai mo?” napi. Naibaly aju Sarai i thui nai leu y Abram ly tangai. 3Naibaly Sarai ly Abram teng y, miseaung nu Hakari ai au bo. (Hini ly Abram Kanan pri y saneng horei awm nai bo y Hakari ai aju palawn nai ne.) 4Abram ly Hakari hawi i ahawi i deaungdi aniu bo. Mymy ly deaungdi aniu nai khala y paleung len i, Sarai teng y amlyh hai iy tahm khai y lawh bo.

5Naibaly Sarai my Abram teng y, “Hakari my kai ai tahm khai y nai thui tamawn lawh nai ly nang i katamang teu. Kaimy hini neampachy ai nang teng kang pei nai ne; mymy ly deaungdi aniu khyp khala i dengdairei kai ai tahm khai y, thui tamawn lawh. Areng my ani sala y tara chih na sy!” napi.

6Abram my, “Ne mang, mymy ly nang i miseaung nu ne, nang i kiu theung y awm nai, nangmy ngai nai kamta mymy ai so be,” napi. Naibaly Sarai my Hakari ai kham pajau y na pa-rei ana i, paleung hawi y naimy Hakari ly preang jo bo.

7Naibaly Areng i kani pri amtaw thau nai my Shur mary lam daichi ka-vym tavo micheaungra y Hakari ai avum i, 8Ni my, “Sarai i miseaung nu Hakari awi, ma i dengdairei jeu nai mo? Ma y chei ai nai mo?” nanai deng. Hakari my, “Kai ly kaimy i yhmkeung nu Sarai teng i preang nai ne,” nanai pathang.

9Kani pri amtaw thai naimy, “vawi ali teang ly nangmy i yhmkeung nu i miseaung y phai awm teang” napi. 10Naibaly kani pri amtaw thai naimy thui bi nai ly “Nang i kangpreang ly kati lei y na pa-rei kang peung hai ai. 11Nang ly deaungdi aniu bo i chapo tapen ai; amyn ly Ismaela#16.11: Ismaela Ismaela, nanai ly “Tameuh my pathang bo,” nanai sai ne. pathi ai nai tla. Areng my nang i patang nai hawi vo nai raawi thai bo. 12Na i py nang i chapo ly keaungngo kano kasau kamta khumi kasi lawm ai; mymy ly khumichi hawi aly y ai i, khumichi py ni ai niu ngai y ai. Mymy ly amjo amnauchi hawi vanrei awm ai ny y; mymy vui awm takhra vui ai,” napi.

13Hakari ly mymy ai mymy naimy, “Kai ly Tameuh ai niu i py heng lawh rai a?” nanai thui. Hunai deaungkho y mymy hawi leu arum nai Areng ai, “Niu nai keung Tameuh,” nanai palau bo. 14Khumichi my Bered mary hawi Kadesa mary sala y awm nai huni tuikan ai ly hina nai kamta, “Kai ai niu nai keung Tameuh kangheng i tuikan ne,” nanai palau u bo.

15Hakari my Abram i vui chapo tapen pi bo; Abram my Ismaela, nanai amyn pathi.#Kal 4.22 16Huni neng y Abram ly saneng vuitaja takaw tariurei awm nai ne.

Currently Selected:

ATITI AWM ANGCHEI NAI 16: KCL02

Highlight

Copy