THEU NAI 23

Hawi naira hawi meitang naira

1Nangchi ly teng y nai satang kamngo sa nai khumi mang y, teng y nai pany hai nai keung lawm moh. #Theu 20.10; Lev 19.11–12; Leu 5.20 2Khumi kanawichi i tamang naira y abang moh; khumi kanawichi mang y abang iy leu meitang ali hai vui ai nai, teng y nai pany hai nai keung lawm moh. 3Tara chih nai khala y khumi kamawn nai deaungkho y, khumi kamawn mang y teng y nai pany hai nai keung lawm moh. #Lev 19.15

4“Nang ly nangmy i paleung ka-e i si mo, keaungngo kano kasau mo, kanghu theung i preang jo nai niu baly, yhmkeung teng y tha pi teang ai nai tla. #Leu 22.1–4 5Nang i paleung ka-e i keaungngo kano kasau ly vawn kaji deaungkho y atlym jo baly, en vui y naimy tako teang pajau pa-rei sabawm ai nai tla.

6“Khumi kamawn ai tara chih nai khala y, tara lam teng y nai chih pi moh.#Lev 19.15; Leu 16.19 7Khumi leaungrei ai ka-chawi naimy seu moh; kamngo so y nai khumi ai tara pasum moh; Huna nai kateng chih y nai khumi ai ly kaimy pasum ai. 8Un cha nai khumi ly tara lam kateng niu y i, khumi kahawi ai phra hai pajau deaungkho y, un cho moh.

9“Nangchi ly Aikupta pri y angvyn kamta awm u reng nai deaungkho y, angvyn i ka-dawn pany iy nangchi i pri y angvyn lawm nai cheng takhrachi ai ano moh. #Theu 22.21; Lev 19.33–34; Leu 24.17–18, 27.19

Saryh saneng hawi saryh kani

10“Nangchi ly saneng tariurei sala y li, hlau amti amjangchi pakym achu ai nai tla. #Lev 25.1–7 11Na i py saryh saneng y ly li, hlau so y naimy khau u jo; hunira prau nai amti amjangchi py pakym u moh. Khumi kamawnchi cho u sy ly huni bo i nai ly daichi mawichi i vui khai pi ai nai tla. Nangchi i kreip akho hawi olive akhochi ai py, huna nai kamta sa teang ai nai tla.

12“Nangchi ly kani tariurei sala kalop sa iy, saryh kani y ly anawn ai nai tla; Hunai kamta teang, nang i kalop sa pi nai miseaungchi, nang i angvynchi hawi tawnbawichi ai py anawn hai ai nai tla. #Theu 20.9–11, 31.15, 34.21, 35.2; Lev 23.3; Leu 5.13–14

13“Kai Areng my nangchi ai kang thui pi nai ngiereichi tangai u; tameuh takhrachi ai chiu u moh; huni tameuhchi i amyn malawn py thui u moh.

Pawi kalen thomrei

(Theu 34.18–26; Leu 16.1–17)

14“Nangchi ly kai ai tahm khai ai nai, sanengrei y pawi kalen tlen thomrei sa ai nai tla. 15Tako angbo abawi y nai pawi sa ai nai tla. Kaimy leu pei nai kamta Aikupta pri i dengdairei theu nai Abiba lo y kani saryhrei angbo abawi y nai tako cha ai nai tla. Ami py katalamra syn y naimy, kai teng y ahi hawi iy chiu ai nai so moh. #Theu 12.14–20; Lev 23.6–8, 23.17–25

16“Nangchi li hlaura i choh tyn nai neng tym baly, nangchi i amti amjangchi hawi changtha la pawi sa ai nai tla.#Lev 23.15–21, 39–43; Kati 28.26–31

“Saneng dym baly nangmychi thengthai baichira i, thengthai athaichi pakym achu nai khala, chohboleh nai pawi sa ai nai tla. 17Saneng tleirei hini pawi tlen thomrei sa nai khala y, neampacho bawibawichi ly Areng Tameuh teng y ahi hawi iy chiu ai nai tla.

18“Kai teng y tawnbawi hawi apathyp nai khala y, angbo abawi nai tako hawi talam moh; kai teng y apathyp nai tawnbawi thau ly khawn mang khrairei kamlai khai ai nai tlo y.

19“Saneng tleirei nang i li hlauchira i amti amjang chaluchi ly nang i Areng Tameuh i yhm y tym hai iy talam ai nai tla.

“Beram cho, ti y baly mi-i cho ai ly amhm i kanutui hawi byh ai nai tlo y.#Theu 34.26; Leu 14.21, 26.2

Leu adeu naichi hawi Leu pei naichi

20“Nangchi i khuleaung lam jeungrei ang kry ai nai hawi Kaimy sa pi yb nai pri y nangchi ai pahawi ai nai nangchi i mo mang y angel pato pi ai. 21Ni ai tahm khai iy ni i leu tangai u. Ni ai kaimy pato nai ne i, ni ai tiu u moh; ni ly huna nai tiu nai ai ly pahen pi ai ny y. 22Na i py nangchi ly ni i leu tangai iy kai i leu pei nai kamta sa u baly, kai ly nangchi i paleung ka-e bawibawi hawi, nang ai ka-awi sa nai khumichi ai kaimy tiu ai. 23Kai i angel ly nangchi i mo mang lu sa iy tako hai ai i, Amori cheng, Hiti cheng, Perizi cheng, Kanan cheng, Hevit cheng, Jebusi chengchi awm nai pri y tym pa-rei ang pahawi ai; huni pri i chengchi ai ly kaimy tamyh pawn ai. 24Nangchi ly nichi i tameuhchi ai lu meung iy chiu u moh; nichi i reitachi kamta teaung u moh; nichi i tameuhchi taphra iy, nichi i khai takhra nai leungchengchi py pakhau pi pawn ai nai tla. 25Nangchi ly nangchi i Tameuh, kai Areng ai chiu khyh baly, kai ly nangchi ai teicha teinei amtheaung hai iy noso aho hai ai. 26Nangchi i pri y cho deaungdi pahaw vui nai, teng vui nai neampachy awm ai ny y; nangchi ai deung sau hai ai.

27Nangchi ai tiu nai khumichi ly kai ai jei u ai; nangchi ai tiu nai pri i khumichi ly khrukhra iy ahei u phro ai. 28Hivit cheng, kanan cheng hawi Hiti chengchi ly athengra naimy preang u bawn ai. 29Kai ly huni khumi cheng bawibawichi ai sanengrei sala y my, kapatheu be ai ny y; huna nai kapatheu be lawh baly, huni pri ly daichi mawichi khri pa-rei hyn ai i, khumeung khuram lawm vui na. 30Nangchi ly huni pri peang pajau ai nai khumi vuikanai peung nai ryrei, kaimy huni pri i chengchi ai maiden maidenrei kapatheu ai. 31Kaimy nangchi i khujyh ly pangli kamsen dengdai mrethe pangli ryrei, daichi ka-vym dengdai Euphrat tavo ryrei kau hai ai. Kai ly huni pri i khumichi ai nangchi kiu y kang au ai i, nichi ai nangchi my patheu u pajau ai. 32Huni khumichi hawi py, huni khumichi i tameuhchi hawi py, Leu Maikawm aso u moh. 33Nangchi i pri y nichi ai awm ai nai pei moh; nichi ai awm ai nai pei lawh baly, nichi ly nangchi ai kai i tlang tleaung y kamngo so hai lawh na. Nangchi ly nichi i tameuhchi ai chiu u lawh baly, phra hai angchi khyp nai deaung y man u ai.

Currently Selected:

THEU NAI 23: KCL02

Highlight

Copy