AMTAW 20

Makedonia pri hawi Akaia pri mang y

1Naibaly tukulula nai pajau baly, Pawla my ly abangnaichi ai palau hai i pachei iy, leu kahawi y my amprei i, Makedonia pri y chei ai nai theu bo. 2Naibaly nichi ai leu neangneang pachei prei naimy huni pri y amki be i, Krik pri y tym bo. 3Naibaly hu y ly lo thomrei kra nai bo y Suria pri y paleaung mang chei ai nai thym kha y Judachi my mymy ai bawm ai tau nai deaungkho y Makedonia pri mang vawi prei ai nai tau lawh veng. 4Naibaly Pura i chapo, Sopatra, Beroia avang i khumi hawi, Thesalonika avang i khumi Aristarka hawi, Sekunda hawi, Derbe avang i khumi Kaia hawi, Timothei py, Asia pri i khumi Tukika nini Trophima py mymy teng y Asia pri y tym pa-rei chei u teang. 5Hunichi ly chei man i Troas avang y kaichi ai ajeng jo. 6Naibaly tako angbo abawi y nai neng chi nai bo y kaichi ly Philipi avang i dengdairei paleaung mang theu iy, kani pangrei kha y Troas avang y mymychi teng y kaichi tym i, hu y ly kaichi kani saryhrei ni awm.

Pawla i Troas y kangkhym kangtem tym nai

7Naibaly kani saryhrei angchei i kani, kaichi tako theng baw ai nai achu nai thym khala y, Pawla ly khawn mang y tako ai tau nai deaungkho y mymychi teng y leu hawihai palai thui pi i, aneng hyh pa-rei leu thui veangveang. 8Naibaly salo i sambeu kaichi i awm achu naira y ly maisi neangneang awm. 9Naibaly amyn Eutuka napi nai thawndeang leaungrei thaibeng pa-kho y ateh nai, i kamhm ngam ryry; naibaly Pawla leu thui nai kra parai lawh nai deaungkho y ni ly i kamhm kham pajau y nai yhm sambeu thomreira i dengdairei tla i, veu akhui. 10Na i py Pawla satla kathiu iy mymy i tlang tleaung y ambeu naimy tapawm i, “Paleung si u y han, paleung vui leh y leang rai mang,” napi. 11Naibaly mymy ly kalau teang iy, tako theng baw nai cha iy kra parai nai khutawi vi pa-rei mymychi teng y atiti leu thui i, leh veng bo. 12Naibaly nichi ly thawndeang ai ly kangheng la i, paleung awmnem ala nai awmnem y alam na.

Troas i dengdairei Mileti mang y

13Naibaly kaichi ly paleaung y chei man i, Assi avang y tapai ai nai theu, hu y ly Pawla ai atang hai ai nai tau nai; mymy ly kheu mang tako ai tau nai deaungkho y hunai kamta leu adeu rym nai bo. 14Naibaly mymy ly Assi avang y kaichi hawi avum khala y ly atang hai i, Mitulini avang y tym bi. 15Naibaly hu i dengdairei paleaung mang chei bi i, khawn mang y ly Kia tlawn kataw y tym; naibaly khawn pa-nyh y ly Sami tlawn y tym i, Trokulion avang y ajeng: naibaly khawn pa-thom y ly Mileti avang y tym bi. 16Naibaly Pawla ly Asia pri y awm kra ai nai ngai y nai deaungkho y, Ephesi avang ai ly paleaung mang katlen ai nai tau angchi yb nai bo; mymy ly pajau baly Jerusalem y pentikost kani kai ai nai tau i, chei awn nai bo.

Pawla my Ephesi palau takhra kamkawm miteaung kehchi ai leu kahawi pavum nai

17Naibaly Mileti avang i dengdairei ly Ephesi avang y khumi pato i, mymy teng y palau takhra kamkawm miteaung kehchi ai palau hai. 18Naibaly nichi ly mymy teng y tym baly mymy ly nichi teng y. “Asia pri y kai chiu angchei nai kani dengdairei kai nangchi teng y awm nai sala ryrei ly kai i awm nai sai nangchi pany mang; 19leu anui y hawi, meikatui tla nai hawi, Judachi my ang bawm ai tau nai deaungkho y atiti ngari kai i tlang tleaung y tym nai patang nai tarawi y Areng i kalop kasa nai ly; 20huna nai chawn ai nai leu thui ai nai ly kai nanghi teng y ati sai py avaw y leang, khumi humchi theung y hawi, yhm tleirei y kai i patiu reng nai ly. 21Judachi hawi Krikchi teng y py Tameuh mang y uikhei nai leu hawi, achi i Areng Isu Krista mang y ym ai nai leu kang thai hai reng nai ly. 22Naibaly khen cham, vai ly kai i paleung y chei y nai awm pajau y nai kapany nai deaungkho y, Jerusalem y kachei ai he, hu y ly kai i tlang tleaung y atiti tym ai nai ngierei kapany y leang rai; 23kawm naira hawi, ngari patang ai naira my anglaw ai mang, nanai Phailo Kachai my meingtym tleirei y ang thai hai, huni harei kapany khyh. 24Na i py kai i angpreng acham ai nai lam motawn angym ai nai hawi, Tameuh i pahenra Satang Kahawi pany hai ai nai, kai Areng Isu teng i krykeung kalop nga nai sa be ai nai ly kai i hengra tama ai nai kamawn y leang.

25“Naibaly khen cham, nangchi theung y kaimy Tameuh i peang nai satang thui nai aleaung aleaung reng nai ly, nangchi bawibawi ly kai i meimai niu ali y leang bo, nanai kai pany bo. 26Hunai deaungkho y kai ly khumi bawibawi i thi y lawi bo, nanai vaini ly kang thai hai bo. 27Ati mana nai mo nabaly Tameuh i kangai bawibawi ly nangchi teng y avaw y naimy kang thui pi nai bo. 28Tameuh i palau takhra kamkawm, mymy i thi y van nai ai ly pacho ai nai amkym u, kanghuchi ai py typ u; Phailo Kachai my ly nichi tleaung y nangchi ai peang nai keung y ang khai nai bo. 29Kai chei nai bo y ly kasui kasichi ly nangchi theung y ang kun ai i, kanghu ai ly ang khai ai nai ny y leang, nanai kai pany. 30Nangmychi theung i khumi kypkyp py abangnaichi ai nichi teng y abi hai ai nai thui thli nai awm ai mang. 31Hunai deaungkho y atyp u, saneng thomrei sala y vum kanithun kai meikatui tla nai tarawi y anawn y naimy khumi leaung leaungrei ai kang pachei nai ly pany u jo ba.

32“Vai ly Tameuh hawi mymy i pahengra leu y kang au hai bo, huni ly nangchi ai ang veang hai pajau i, khai takhra naichi theung y ly kamtym ang nga hai teang mang. 33Ami i muku tangka mo ateaung mo kai paleung no y leang bo. 34Hini kiu ly kaimy hawi kai i ahawichi i aly ngai nai nga reng nai sai ly nangchi kypkyp my pany mang. 35Ati cheaungkhang kai i sa naira ngierei y ly kang patei reng ly, hunai kamta sa akawm u nai tarawi y ham y naichi ai sabawm ai nai tla; naibaly Areng Isu kypkyp my ly, ‘Atiti nga nai tleaung y atiti pei nai taham hawi keh,’ nanai thui nai ly nangchi pany jo ai nai tla,” napi.

36Naibaly huna nai leu thui pajau i kheukhu di iy, nichi bawibawi ai vanrei chiu sa hai. 37Naibaly nichi bawibawi vo u lengleang i, Pawla ai takawi iy mymy ai pachawm pachawm u; 38mymy i meimai niu ali y ai nai leu thui naira y paleung mawn keh nai ne. Naibaly mymy ai paleaung y tym pa-rei pavum bo.

Currently Selected:

AMTAW 20: KCL02

Highlight

Copy