Lik 2

Nesans Jezi

(Matye 1.18-25)

1Lè sa a, Seza Ogis te bay lòd pou yo fè resansman tout moun nan peyi l'ap gouvènen yo. 2Premye resansman an te fèt nan tan Kiriniyis t'ap gouvènen peyi Siri. 3Tout moun te al fè pran non yo nan lavil kote fanmi yo te sòti.

4Jozèf te rete Galile nan bouk Nazarèt. Men paske li te moun nan fanmi ras David, li moute, l'ale nan Jide, nan Betleyèm, vil David. 5Jozèf #Lik 1.27 ta pral fè yo pran non l ansanm ak non Mari, fyanse li, ki te ansent. 6Antan yo te la, jou pou Mari te akouche a rive. 7Li #Mat 1.25 fè premye pitit li a, yon ti gason. Mari vlope pitit la nan kouchèt, li mete l kouche nan yon kay kote yo bay bèt manje, paske pat gen plas pou yo nan lotèl la.

Zanj yo parèt devan gadò mouton yo

8Nan menm zòn sa a, te gen gadò mouton ki t'ap pase nwit la deyò ap veye mouton yo. 9Lè sa a, yon zanj Bondye parèt devan yo, bèl limyè Bondye a klere tout kote yo te ye a. Yo te pè anpil. 10Men zanj lan di yo konsa:

— Pa pè. Mwen vin anonse nou yon bonnouvèl ki pral fè tout pèp la kontan anpil. 11Jòdi a, nan lavil David la, nou gen yon Sovè ki fenk fèt: se Kris la, Senyè a. 12Men ki siy k'ap fè nou rekonèt li: n'a jwenn yon tibebe vlope nan kouchèt ki kouche nan yon ganmèl kote yo bay bèt manje.

13Menm #Da 7.10 lè a, yon foul lòt zanj nan syèl la vin jwenn zanj lan. Yo t'ap fè lwanj Bondye, yo t'ap di konsa:

14Lwanj #Lik 19.38; Eza 57.19; Ef 2.14,17 pou Bondye nan syèl la,

kè poze pou tout moun sou latè ki byen dispoze.

Gadò mouton yo ale Betleyèm

15Zanj yo kite gadò mouton yo, yo tounen al nan syèl la. Lè sa a, gadò mouton yo yonn di lòt:

— Ann al jouk Betleyèm, ann al wè sa ki rive, sa Bondye fè nou konnen an.

16Yo prese ale, yo jwenn Mari ak Jozèf, ansanm ak ti pitit la kouche kote yo bay bèt manje a. 17Lè #Lik 2.10-12 yo wè l, yo tanmen rakonte sa zanj lan te di yo sou pitit la. 18Tout moun ki t'ap koute yo te sezi tande sa yo t'ap rakonte a. 19Mari #Lik 2.51 menm te kenbe tout pawòl sa yo nan kè l, li t'ap repase yo nan tèt li. 20Apre sa, gadò mouton yo al fè wout yo. Yo t'ap di jan Bondye gen pouvwa, yo t'ap fè lwanj li, paske tou sa yo te tande ak tou sa yo te wè a te dakò ak sa zanj lan te fè yo konnen.

Yo bay Jezi non

21Wit #Lik 1.31,59; Lev 12.3 jou apre, se te dat pou yo te sikonsi pitit la. Yo rele l Jezi dapre non zanj lan te bay anvan menm manman l te vin ansent li.

Yo prezante Jezi nan tanp lan

22Apre #Lev 12.1-8 sa, jou a te rive pou Jozèf ak Mari te al fè sèvis pou yo ka mete Mari nan kondisyon fè sèvis Bondye dapre lalwa Moyiz. Lè sa a, yo pote tipitit la lavil Jerizalèm pou mete l apa pou Bondye, 23dapre #Egz 13.2,12,15 sa ki ekri nan lalwa Bondye a: Konsakre tout premye pitit gason yo bay Mèt la. 24Yo #Lev 5.11; 12.8 te ofri tou yon pè toutrèl osinon de jenn pijon pou yo touye pou Bondye, jan yo bay lòd fè sa nan lalwa Bondye a.

25Lè #Eza 40.1; 49.13 sa a, te gen yon nonm nan Jerizalèm yo te rele Simeyon. Nonm sa a te mache dwat devan Bondye, li te respekte Bondye anpil, li t'ap tann konsa moun Bondye t'ap voye pou delivre pèp Izrayèl la. Sentespri Bondye a te avèk li. 26Li te fè l konnen li pa t'ap mouri san l pa wè Kris la, moun Bondye te chwazi pou l voye a. 27Lespri Bondye a pouse Simeyon ale nan tanp lan. Lè Jozèf ak Mari pote tipitit la pou yo fè sa lalwa mande pou li a, 28Simeyon pran tipitit la nan bra l, li di Bondye mèsi. Li di:

29Kounyeya, Mèt, #Jen 46.30 ou kenbe pawòl ou;

ou mèt kite sèvitè ou la mouri ak kè poze.

30Paske #Eza 40.5; 52.10 mwen wè ak je mwen moun ou voye pou delivre nou an.

31Ou pare l mete devan tout pèp yo.

32Se #Eza 42.6; 49.6 yon limyè ki pou fè tout pèp yo konnen ou;

se va yon lwanj pou Izrayèl pèp ou a.

Simeyon ap bay mesay sou Jezi

33Papa ak manman Jezi te sezi tande sa Simeyon t'ap di sou pitit yo a konsa. 34Simeyon #Eza 8.14; Mat 21.42; 1 Kor 1.23; 1 Pyè 2.8 rele benediksyon Bondye sou yo, li di Mari, manman Jezi:

— Bondye chwazi pitit sa a. L'ap lakòz anpil moun nan pèp Izrayèl la tonbe. Men, l'ap fè anpil moun nan pèp la jwenn delivrans tou. Li pral yon siy pou Bondye, men moun p'ap vle wè li. 35Se konsa l'ap devwale tout lide k'ap travay nan fon kè anpil moun. Kanta pou ou menm, Mari, doulè gen pou fann kè ou tankou yon nepe.

Àn ap bay mesay sou Jezi

36Te gen yon fanm ki te pwofèt la a tou. Li te rele Ana, pitit fi Fanwèl, nan branch fanmi Azè. Li te fin granmoun. Li te viv setan ak nonm li te marye depi li te jennfi a. 37Apre #1 Tim 5.5 sa, li te rete vèv. Lè sa a, li te gen katrevenkatran, li pat janm kite tanp lan. Li t'ap sèvi Bondye lajounen kou lannwit: tout tan li t'ap fè jèn, li t'ap lapriyè. 38Menm #Eza 52.9 lè sa a tou, li vin rive, li t'ap di Bondye mèsi. Li t'ap pale sou Jezi bay tout moun ki t'ap tann Bondye vin delivre lavil Jerizalèm.

Jozèf ak Mari tounen Nazarèt ansanm ak Jezi

39Lè yo fin fè tou sa lalwa Bondye te mande yo fè a, Jozèf ak Mari tounen ansanm avèk tipitit la nan peyi yo, lavil Nazarèt nan Galile. 40Pitit #Lik 1.80; 2.52 la menm t'ap grandi, li t'ap devlope. Li te gen kont lespri l, epi favè Bondye te avèk li.

Jezi nan tanp lan

41Chak #Egz 23.14-17 ane, pou fèt Pak, manman ak papa Jezi te konn ale Jerizalèm. 42Lè Jezi vin gen douzan, yo moute Jerizalèm al nan fèt la jan yo te toujou fè. 43Lè #Egz 12.18 jou fèt yo fin pase, moun yo t'ap retounen lakay yo. Pitit la menm rete Jerizalèm san papa li ak manman li pa konn sa. 44Yo te kwè li te avèk lòt moun ki t'ap vwayaje ansanm ak yo. Yo gentan fè yon jounen ap mache. Se lè sa a, yo pran chache li pami fanmi yo ak zanmi yo. 45Men yo pa jwenn li. Yo tounen Jerizalèm al chache li. 46Apre twa jou, yo jwenn li nan tanp lan, chita nan mitan dirèktè yo. Li t'ap koute yo, li t'ap poze yo kèsyon tou. 47Tout moun ki t'ap tande l te sezi pou jan l te gen lespri, ak jan l t'ap reponn yo. 48Lè papa l ak manman l wè l, yo pat manke sezi. Manman li di l konsa:

— Pitit mwen, poukisa ou fè nou sa? Se pa ti chache papa ou avè m nou pa chache ou. Ou fè kè n kase.

49Jezi #Jan 2.16 di yo:

— Poukisa pou n'ap chache m konsa? Nou pat konnen fòk mwen okipe zafè papa mwen?

50Men yo pat konprann sa l t'ap di yo.

51Apre #Lik 2.19 sa, li desann ak yo, li tounen Nazarèt. Li te soumèt devan yo. Manman l menm te kenbe tout bagay sa yo nan kè li. 52Jezi #1 Sam 2.26; Pwo 3.4 t'ap devlope, li te vin gen plis lespri toujou, li t'ap aji yon jan ki te fè ni Bondye ni lèzòm plezi.

Currently Selected:

Lik 2: HAT98

Highlight

Copy