Levitik 14

Sèvis pou moun ki te gen maladi po

1Senyè a pale ak Moyiz, li di l konsa:

2— Men #Mat 8.2,4; Lik 17.14 regleman w'a bay pou yo swiv lè y'ap fè sèvis pou moun ki geri apre yo te gen move maladi po. Jou pou yo rekonèt moun lan geri a, y'a mennen l bay prèt la. 3Prèt la va pran l, l'a sòti ansanm avè l lòt bò limit kan kote moun rete a. L'a egzaminen l byen egzaminen, pou l wè si malad la geri vre. 4Prèt #Egz 12.22; Nonb 19.6; Eb 9.19 la va bay lòd pou yo pote pou moun ki te malad la de zwazo tou vivan epi ki bon pou moun k'ap fè sèvis pou Bondye, ansanm ak yon moso bwa sèd, yon moso twal kamwazi ak yon ti branch izòp. 5Apre sa, prèt la va bay lòd pou yo touye premye zwazo a anwo yon bòl an tè plen dlo fre. 6L'a pran lòt zwazo a tou vivan ansanm ak bwa sèd la, moso twal kamwazi a ak ti branch izòp la, l'a plonje yo nan san zwazo yo te touye anwo dlo fre a. 7Apre #Lev 16.22; 2 Wa 5.10,14; Eb 9.13 sa, l'a voye san an sèt fwa sou moun ki te gen move maladi po a epi l'a di moun lan nan kondisyon ankò pou fè sèvis Bondye. L'a lage zwazo vivan an pou l vole al fè wout li nan bwa. 8Moun #Lev 11.25; 13.6 ki te malad la va lave rad ki te sou li yo, l'a kale tèt li nèt, l'a benyen nan gwo dlo, epi l'a nan kondisyon pou fè sèvis Bondye ankò. Apre sa, l'a antre nan kan kote moun rete a, men li p'ap antre lakay li pandan sèt jou. 9Sou setyèm jou a, l'a kale tèt li ankò, l'a koupe tout bab li, tout plim je l ak tout plim ki sou tout rès kò li. L'a lave rad ki te sou li a, l'a lave kò l nan gwo dlo. Apre sa, l'a nan kondisyon pou l fè sèvis Bondye.

10Sou #Nonb 15.4; Mat 8.4 uityèm jou a, l'a pran de ti belye ki pa gen okenn enfimite ak yon ti fenmèl mouton ki gen ennan epi ki pa gen okenn enfimite. L'a pran tou de mamit farin melanje ak lwil oliv epi yon boutèy demi lit plen lwil oliv. 11Prèt k'ap fè sèvis la va mennen moun lan ansanm ak ofrann li yo devan Senyè a, jouk nan papòt Tant Randevou a. 12Rive #Egz 29.24; Lev 5.18; 6.6,7 la, prèt la va pran yonn nan ti belye yo, l'a ofri l ansanm ak demi lit lwil la bay Senyè a pou peye pou sa moun lan te fè ki mal. L'a balanse yo devan Senyè a tankou yon ofrann espesyal pou Senyè a. 13L'a #Lev 1.11; 4.24; 7.6,7 touye ti mouton an kote yo konn touye bèt yo ofri pou mande padon an osinon pou boule nèt la, nan kote yo mete apa pou sèvis Bondye a. L'a fè sa konsa paske bèt moun yo ofri pou peye pou sa yo fè ki mal la osinon pou mande Bondye padon an, se pou prèt la li ye. Se yon ofrann yo mete apa nèt pou Senyè a.

14Apre #Egz 29.20; Lev 8.23 sa, prèt la va pran ti gout nan san ti mouton an, l'a pase l sou pwent tete zòrèy dwat moun ki te malad la, sou gwo pous men dwat li ak sou gwo zòtèy pye dwat li. 15Prèt la va pran ti gout lwil nan boutèy la, l'a vide l nan pla men gòch li. 16L'a tranpe yon dwèt men dwat li nan lwil ki nan pla men gòch li a. Avèk dwèt la, l'a voye ti gout lwil sèt fwa devan lotèl Bondye a. 17L'a pran ti gout nan lwil ki nan pla men gòch li a, l'a mete l menm kote li te mete san ti mouton an, ki vle di sou pwent tete zòrèy dwat moun lan, sou gwo pous men dwat li ak sou gwo zòtèy pye dwat li. 18Lèfini, #Lev 4.26; 14.10 l'a vide rès lwil ki nan pla men l lan sou tèt moun lan. Se konsa prèt la va fè sèvis pou mande Bondye padon devan lotèl Senyè a.

19Apre sa, prèt la va fè ofrann pou peye sa moun lan fè ki mal. L'a fè sèvis pou mande Bondye padon pou moun ki te malad la. L'a touye bèt pou yo boule nèt la. 20L'a mete l sou lotèl la ansanm ak farin ble melanje ak lwil la. Se konsa prèt la va fè sèvis pou mande padon pou moun lan, epi moun lan va nan kondisyon ankò pou l fè sèvis Bondye.

21Si #Lev 5.7; 14.12 moun lan pòv epi li pa gen anpil mwayen, l'a pote yon sèl ti mouton pou yo ofri pou peye pou sa moun lan te fè ki mal la. L'a pote twaka mamit farin sèlman melanje ak lwil oliv ak yon boutèy demi lit plen lwil. 22L'a #Lev 12.8; 15.14-15 pote de ti toutrèl tou osinon de ti pijon, jan mwayen li va penmèt li, yonn pou sèvi ofrann pou mande padon, lòt la pou boule nèt pou Senyè a.

23Sou #Lev 14.10-12 uityèm jou a, l'a pote yo bay prèt la devan pòt Tant Randevou a, pou prèt la fè sèvis pou mete l nan kondisyon pou li ka sèvi Senyè a ankò.

24Prèt la va pran ti mouton li ofri pou peye pou sa moun lan fè ki mal la ansanm ak boutèy lwil la, l'a balanse yo devan Senyè a tankou yon ofrann. 25Apre #Lev 14.14-18 sa, l'a touye ti mouton an, l'a pran ti gout nan san li l'a mete sou pwent tete zòrèy dwat moun ki te malad la, sou gwo pous men dwat li ak sou gwo zòtèy pye dwat li. 26Prèt la va vide ti gout lwil nan pla men gòch li, 27l'a tranpe yon dwèt men dwat li nan lwil ki nan pla men gòch li a. Avèk dwèt la, l'a voye lwil la sèt fwa devan lotèl Senyè a. 28Apre sa, l'a pran nan lwil ki nan men gòch li a, l'a mete l menm kote li te mete san ti mouton an, ki vle di sou pwent tete zòrèy dwat moun lan, sou gwo pous men dwat li a ak sou gwo zòtèy pye dwat li a. 29Lèfini, l'a vide rès lwil ki nan pla men gòch li a sou tèt moun lan. Se konsa la fè sèvis pou mande Bondye padon devan lotèl Senyè a. 30Apre #Lev 14.22 sa, l'a ofri toutrèl yo, osinon pijon yo, dapre sa mwayen moun lan te penmèt li, 31yonn pou mande padon pou peche, lòt la pou yo boule nèt ansanm ak ofrann farin ble a. Se konsa prèt la va fè sèvis pou mande Bondye padon pou moun lan.

32Men regleman pou yo swiv lè yon moun ki gen move maladi po pa gen dekwa pou l ofri tou sa li te dwe ofri pou sèvis ki pou mete l nan kondisyon pou fè sèvis Bondye ankò.

Salpèt nan kay

33Senyè a pale ak Moyiz ansanm ak Arawon, li di yo:

34— Lè #Jen 17.8; Det 32.49 n'a fin antre nan peyi Kanaran an, peyi m'ap ban nou pou rele nou pa nou an, si mwen voye salpèt #14.34: salpèt: Nan lang ebre a yo te sèvi ak menm mo a ni pou maladi po ni pou salpèt sou miray kay. sou yonn nan kay kote nou rete yo, men sa pou nou fè. 35Mèt kay la va al jwenn prèt la, l'a di l: Gen yon bagay tankou salpèt ki parèt sou miray kay mwen an. 36Prèt la va bay lòd pou yo mete tou sa ki nan kay la deyò anvan li vin egzaminen kay la. Konsa, tou sa ki te nan kay la ka toujou sèvi pou moun k'ap sèvi Bondye. Apre sa, prèt la va vini, l'a antre nan kay la pou egzaminen l.

37L'a egzaminen tout miray yo. Si li wè gen kèk kote ki manje nan miray la, epi ki gen ti koulè vèt osinon wouj, 38prèt la va sòti nan kay la, l'a fèmen l akle pou sèt jou. 39Sou setyèm jou a, prèt la va tounen, l'a egzaminen miray kay la ankò. Si li wè tach la gaye sou miray kay la, 40prèt la va bay lòd pou yo wete wòch kote yo te jwenn salpèt la, y'a voye wòch yo jete yon kote andeyò lavil la, kote yo mete bagay ki pa ka sèvi pou sèvis Bondye. 41Apre sa, l'a fè yo grate tout anndan kay la, epi y'a jete tout vye kras mòtye yo te grate a andeyò lavil la, menm kote yo mete bagay ki pa ka sèvi nan sèvis Bondye. 42Y'a pran lòt wòch ranplase wòch yo te wete yo epi y'a rekrepi kay la.

43Si salpèt la parèt ankò apre yo fin wete wòch malad yo, apre yo fin grate kay la epi yo rekrepi l, 44prèt #Lev 13.51 la va tounen vin gade. Si li wè salpèt la gaye nan kay la, l'a konnen kay la gen yon move maladi sou miray li. Moun k'ap sèvi Bondye pa ka rete ladan l.

45Lè sa a, y'a demoli kay la nèt epi y'a pran wòch, bwa, mòtye ki te nan kay la, y'a voye yo jete andeyò lavil la, kote yo mete bagay ki pa ka sèvi pou sèvis Bondye. 46Tout moun ki te antre anndan kay la lè kay la te fèmen an p'ap nan kondisyon pou sèvi Bondye jouk aswè rive. 47Tout moun ki te kouche osinon ki te manje anndan kay la va gen pou lave rad ki te sou yo.

48Lè prèt la vin gade a, si li te jwenn salpèt la disparèt nèt apre yo te fin rekrepi kay la, prèt la va fè konnen kay la nan bon kondisyon ankò pou moun k'ap sèvi Bondye ka rete ladan l, paske salpèt la disparèt nèt. 49Apre #Lev 14.4-6 sa, prèt la va fè sèvis pou wete peche nan kay la. L'a pran de zwazo, kèk moso bwa sèd, yon moso twal kamwazi ak yon ti branch izòp. 50L'a touye yonn nan ti zwazo yo anwo yon bòl an tè plen dlo fre. 51Apre sa, l'a pran bwa sèd la, ti branch izòp la, moso twal kamwazi a ansanm ak lòt zwazo ki vivan an, l'a plonje yo nan san premye zwazo a ki melanje ak dlo fre a. Apre sa, l'a voye san an sèt fwa sou kay la. 52Se konsa prèt la va fè sèvis pou wete peche nan kay la, avèk san zwazo a, dlo fre a, zwazo vivan an, bwa sèd la, ti branch izòp la, epi moso twal kamwazi a. 53Apre #Lev 14.7,19,20 sa, l'a lage ti zwazo vivan an pou l vole al fè wout li nan bwa andeyò lavil la. Se konsa l'a fè sèvis pou mande Bondye padon pou kay la epi kay la va nan bon kondisyon pou moun k'ap sèvi Bondye ka rete ladan l ankò.

54Men #Lev 13.30 regleman pou nou swiv lè yon moun gen move maladi po osinon pyas, 55lè #Lev 13.47; 14.34 kanni tonbe sou rad osinon lè salpèt parèt nan yon kay, 56lè #Lev 13.2 yon moun gen yon kote sou po l ki anfle osinon lè li gen yon bouton ou ankò yon tach ki parèt sou po l. 57Se #Lev 10.10,11; Det 24.8 konsa n'a konnen lè yon bagay nan bon kondisyon osinon lè li pa nan bon kondisyon pou moun k'ap sèvi Bondye.

Se tout regleman yo sa pou move maladi po.

Currently Selected:

Levitik 14: HAT98

Highlight

Copy