2 Wa 8

Wa a fè renmèt madanm byen li yo

1Elize te pale ak madanm ki te manman #Jen 41.27; 2 Wa 4.35; Aje 1.11 ti gason li te fè tounen vivan sot nan lanmò a, li te di l pou li pati ansanm ak tout fanmi l al viv nan yon lòt peyi paske Senyè a te fè konnen talè konsa yon gwo grangou ta pral tonbe sou tout peyi a pou setan. 2Fanm #Rit 1.1 lan leve, li fè sa pwofèt la te ba li konsèy fè a. Li pati ansanm ak tout fanmi l al rete nan peyi Filisti a pandan sètan. 3Lè sètan yo fin pase, li tounen nan peyi Izrayèl, l'al jwenn wa a, li mande l pou yo renmèt li kay li ak jaden li. 4Li #2 Wa 4.12 jwenn wa a t'ap pale ak Gerazi, domestik pwofèt Bondye a, paske wa a te mande l pou l te vin rakonte l tout bèl bagay Elize te fè yo. 5Gerazi #2 Wa 4.35 t'ap rakonte wa a kijan Elize te fè pitit gason yon fanm leve sòti vivan nan lanmò lè madanm lan vin pale ak wa a pou kay li ak jaden l yo. Gerazi di wa a:

— Monwa, men madanm lan ansanm ak pitit gason Elize te fè leve sòti vivan nan lanmò a.

6Wa a mande madanm lan pou li rakonte l jan sa te pase. Lè madanm lan fini, wa a bay yonn nan chèf li yo lòd renmèt madanm lan tou sa ki te pou li ansanm ak tou sa jaden yo te rapòte depi jou li te kite peyi a rive jouk jou li tounen an.

Elize ak Azayèl

7Apre #1 Wa 20.1; 2 Wa 6.24 sa, Elize ale lavil Damas. Bennadad, wa peyi Siri a, te malad. Y'al di wa a pwofèt la te nan lavil la. 8Wa a #1 Sam 9.7; 1 Wa 19.15,17; 2 Wa 1.2 rele Azayèl, yonn nan chèf li yo, li di l konsa:

— Pote yon bagay fè pwofèt Bondye a kado. Lèfini, mande l pou l pale ak Senyè a pou konnen si m'ap leve anba maladi sa a.

9Se konsa Azayèl al wè Elize, li pran tout kalite bon bagay li jwenn lavil Damas, li chaje yo sou karant chamo pote bay Elize. Lè li rive devan Elize, li di l konsa:

— Pitit ou, Bennadad, wa peyi Siri a, voye m vin mande ou si l'ap leve anba maladi l la.

10Elize reponn:

— Senyè a fè m konnen l'ap mouri, men ou menm, al di l l'ap refè.

11Lè li fin di sa, Elize pran gade Azayèl nan je. Lè Azayèl wè sa, sa jennen l anpil. Elize rete konsa, dlo pran kouri nan je l. 12Azayèl #2 Wa 10.32; 13.3,7,22; 15.16; Eza 13.16; Oze 10.14; 13.16 mande l:

— Mèt, poukisa w'ap kriye a?

Elize reponn:

— Paske mwen gentan konnen tou sa ou pral fè pèp Izrayèl la pase. Ou pral met dife nan gwo fò yo, ou pral touye jenn gason l yo ak nepe, ou pral kraze pitit yo, ou pral louvri vant fanm ansent yo.

13Azayèl #1 Sam 17.43; 2 Sam 9.8; 1 Wa 19.15 mande l:

— Kisa mwen ye menm pou mwen ta rive fè tou sa? Yon chen gen plis pouvwa pase mwen.

Elize reponn li:

— Senyè a fè mwen konnen se ou ki pral wa peyi Siri.

14Azayèl kite Elize, li tounen al jwenn mèt li ki mande l:

— Sa Elize di ou?

Li reponn:

— Li di m li sèten w'ap refè.

15Men nan denmen, Azayèl pran yon dra, li plonje li nan dlo, li mete li bouche figi wa a epi wa a tou mouri toufe. Azayèl moute wa sou fotèy peyi Siri a nan plas Bennadad.

Joram, wa peyi Jida

(2 Kwonik 21)

16Wa #2 Wa 1.17; 3.1; Mat 1.8 Joram, pitit gason Akab la, t'ap mache sou senkan depi li t'ap gouvènen peyi Izrayèl lè Joram, pitit gason Jozafa ki te wa peyi Jida a, moute wa nan plas papa l. 17Li #2 Kwo 21.5-10 te gen tranndezan lè li moute wa. Li gouvènen nan lavil Jerizalèm pandan witan. 18Li te marye ak yon pitit fi Akab. Tankou lòt moun fanmi Akab yo, li mache pye pou pye dèyè wa peyi Izrayèl yo. Li fè sa ki mal nan je Senyè a. 19Men, #2 Sam 7.12,13; 21.17; 1 Wa 11.36; 15.4 Senyè a pat vle detwi peyi Jida a, paske li te pwomèt David, sèvitè l la, t'ap toujou gen yon moun nan ras li pou gouvènen peyi a devan Senyè a.

20Sou #1 Wa 22.47; 2 Wa 3.9 reny wa Joram, moun peyi Edon yo pran lezam kont moun peyi Jida yo. Yo pran libète granmoun yo. Yo nonmen yon wa pou gouvènen yo. 21Se konsa Joram sòti ak tout cha lagè li yo, li mache sou lavil Zayi. Lame moun Edon yo sènen l. Pandan lannwit, li menm ak chèf cha lagè li yo, yo leve yo atake moun Edon yo ki te sènen yo, yo pase sòti nan mitan yo, yo chape. Tout sòlda yo gaye al lakay yo. 22Se #Jen 27.40; Joz 10.29,30 depi lè sa a, peyi Edon an sòti anba lòd peyi Jida, yo granmoun lakay yo. Se menm lè a tou moun lavil Libna yo pran libète granmoun yo tou.

23N'a jwenn rès istwa Joram ak tou sa li te fè ekri nan liv Istwa wa peyi Jida yo. 24Lè #2 Kwo 21.17,20 Joram #2 Kwo 22.1-6 mouri, yo antere l nan kavo zansèt li yo nan lavil David la. Apre sa, se Okozyas, pitit li a, ki moute wa nan plas li.

Okozyas, wa peyi Jida

(2 Kwonik 22.1-6)

25Wa #2 Wa 9.29 Joram, pitit Akab la, t'ap mache sou douzan depi li t'ap gouvènen peyi Izrayèl lè Okozyas, pitit Joram, moute wa sou fòtèy peyi Jida a. 26Li te gen venndezan. Li gouvènen nan lavil Jerizalèm pandan ennan. Manman l te rele Atali. Se te pitit fi Akab, pitit pitit fi Omri, tou de wa peyi Izrayèl. 27Okozyas mache pye pou pye dèyè moun fanmi Akab yo. Li te marye nan fanmi wa Akab. Li fè sa ki mal nan je Senyè a tankou yo.

28Wa #1 Wa 22.3 Okozyas mete tèt ansanm ak wa Joram, pitit Akab, pou y'al atake Azayèl, wa peyi Siri a. Lame yo kontre yonn ak lòt bò lavil Ramòt nan peyi Galarad. Sòlda peyi Siri yo blese Joram nan batay la. 29Joram #2 Wa 9.15,16 tounen lavil Jizreyèl pou l te refè anba kou sòlda peyi Siri yo te ba li lavi Ramòt lè li t'ap goumen ak Azayèl, wa peyi Siri a. Okozyas, pitit Joram, wa peyi Jida a, desann lavil Jizreyèl al wè wa Joram, pitit Akab la, paske Joram te malad.

Currently Selected:

2 Wa 8: HAT98

Highlight

Copy