1 Samyèl 6
6
Bwat Kontra a tounen Izrayèl
1Bwat Kontra Senyè a te gentan pase sèt mwa nan peyi Filisti a. 2Moun #Egz 7.11; Det 18.10,14; Da 2.2; 5.7 Filisti yo fè rele prèt yo ak divinò yo. Yo mande yo:
— Kisa pou n fè ak Bwat Kontra Senyè a? Ki jan pou n fè pou n voye l tounen nan plas li?
3Yo #Lev 5.15,16 reponn:
— Si n'ap voye Bwat Kontra Bondye pèp Izrayèl la tounen, nou pa ka voye l konsa san anyen. Se pou nou voye kichòy ki va sèvi pou peye pou sa nou fè a. Si nou fè l konsa, nou tout n'a geri, epi n'a konnen poukisa li t'ap plede frape nou konsa.
4Pèp #Joz 13.3; 1 Sam 5.6,9,12; 6.17,18 la mande yo:
— Ki kalite bagay pou nou bay ki ka sèvi pou peye sa nou fè a?
Yo di yo:
— Senk bouton lò ak ti estati sourit fèt ak lò, yonn pou chak chèf moun Filisti yo, paske se menm maladi a ki te tonbe ni sou nou ni sou senk chèf nou yo. 5N'a #Joz 7.19; 1 Sam 5.3,4,6,7,9,11,12 fè bouton lò yo pou yo sanble ak bouton ki te leve sou nou yo. Konsa tou, n'a fè senk sourit eskilti sourit lò, y'a pòtre sourit k'ap plede ravaje peyi a. Epi n'a rekonèt Bondye pèp Izrayèl la se yon Bondye ki gen pouvwa. Lè sa a, nou kwè l'a sispann frape nou, nou menm, bondye nou yo ak peyi nou an. 6Poukisa #Egz 8.15,32; 12.31; 14.17 pou n'ap fè tèt di tankou farawon an ak moun peyi Lejip yo? Eske lè Bondye te konmanse manyen ak yo, yo pat kite moun yo al fè wout yo? 7Nou #Nonb 19.2; Det 21.3; 2 Sam 6.3 pral pare yon kabwa tou nèf ak de manman bèf ki gen pitit dèyè yo epi ki pa janm sèvi pou fè okenn travay anvan sa. N'a mare yo nan kabwa a, men n'a fè ti bèf dèyè manman yo tounen lakay. 8N'a #Lev 5.15,16; 1 Sam 6.4 pran Bwat Kontra Senyè a, n'a mete l sou kabwa a. N'a pran sa n'ap bay pou sèvi pou peye pou sa nou fè a, n'a mete yo nan yon ti bwat sou kote l. N'a mete kabwa a sou wout la, n'a kite l ale pou kont li. 9N'a #1 Sam 6.3 rete ap gade l ale. Si nou wè l pran chemen moute lavil Bèt-Chemèch, n'a konnen se Bondye pèp Izrayèl la ki te voye tout malè sa yo sou nou. Men si li pran yon lòt wout, lè sa a n'a konnen malè sa yo pat sòti nan li. Se te devenn pa nou.
10Moun yo fè sa yo te di yo fè a. Yo pran de manman bèf ki te gen pitit dèyè yo, yo mare yo nan kabwa a, men yo kenbe ti bèf ki te dèyè manman yo lakay. 11Yo mete Bwat Kontra a sou kabwèt la ansanm ak ti bwat ki te gen sourit lò yo ak pòtre bouton yo. 12Bèf yo pran wout lavil Bèt-Chemèch dirèk dirèk. Y'al tou dwat devan yo. Sou tout wout la, bèf yo t'ap rele. Senk chèf moun Filisti yo t'ap mache dèyè yo jouk yo rive sou baliz lavil Bèt-Chemèch.
13Moun lavil Bèt-Chemèch yo t'ap ranmase ble nan plenn lan. Lè yo leve je yo, yo wè Bwat Kontra a, yo pran rele sitèlman yo te kontan. 14Kabwa a #2 Sam 24.22 rive nan jaden Jozye a nan peyi Bèt-Chemèch epi li rete. Te gen yon gwo wòch bò la. Moun yo demoute kabwa a, yo fann tout bwa yo, yo touye bèf yo, epi yo boule yo nèt pou Senyè a. 15Apre sa, moun Levi yo desann Bwat Kontra Senyè a ansanm ak ti bwat ki te gen bagay an lò yo. Yo mete yo sou gwo wòch la. Jou sa a, moun lavil Bèt-Chemèch yo ofri lòt bèt tou pou boule nèt nan dife ansanm ak lòt ofrann pou Senyè a. 16Lè senk chèf moun Filisti yo wè sa, yo tounen lavil Ekwon menm jou a.
17Moun #Joz 13.3; 1 Sam 6.3,8 Filisti yo te voye senk bouton lò bay Senyè a pou sa te sèvi pou peye pou sa yo te fè a: yonn pou Asdòd, yonn pou Gaza, yonn pou Achkalon, yonn pou Gat, yonn pou Ekwon. 18Yo te voye senk ti sourit lò tou, yonn pou chak vil kote moun filisti yo t'ap kòmande, kit se vil ki gen ranpa, kit se sa ki pa genyen. Gwo wòch #6.18: Gwo wòch: Se konsa yo bay li nan yon ansyen vèsyon grèk. Men tèks ebre a bay Gwo ravin. kote yo te mete Bwat Kontra Senyè a nan mitan jaden Jozye a, bò vil Bèt-Chemèch la, kanpe la jouk koulyeya, tankou yon mak pou fè chonje sa ki te rive lè sa a.
19Apre #Egz 19.21; Nonb 4.15,20; 2 Sam 6.7 sa, Senyè a te touye kèk moun nan moun lavil Bèt-Chemèch yo paske yo te al voye je yo wè sa ki anndan Bwat Kontra a. Li touye swasanndis ladan yo. #6.19: swasanndis ladan yo: Tèks ebre a menm bay swasanndis nan senkantmil (50.000) moun ki te la yo. Pèp la te nan gwo lapenn, paske Senyè a te fè gwo malè sa a sou yo.
Bwat Kontra a Kiriyat-Jearim
20Lè #Joz 24.19; 2 Sam 6.9; Sòm 76.7; Eza 33.14; Mal 3.2 sa a, moun lavil Bèt-Chemèch yo di:
— Ki moun ki ka kanpe devan Senyè a, Bondye sa a ki yon Bondye apa? Ki bò pou n voye Bwat Kontra a ale pou l pa rete lakay nou?
21Yo #1 Kwo 13.5,6 pran kèk mesaje, yo voye yo ale bò kote moun lavil Kiriyat-Jearim, yo di yo konsa:
— Moun Filisti yo voye Bwat Kontra Senyè a tounen. Vin pran l mennen lakay nou.
Currently Selected:
1 Samyèl 6: HAT98
Highlight
Share
Copy
Want to have your highlights saved across all your devices? Sign up or sign in
Haitian Creole DC Bible © Societé Biblique Haïtienne, 1998.
