Matthew 20
20
Shuuminaahtikw nihtaauchihchikan aschiihch kaa aapatisitwaau
1“Maau e ishinaakuhch kihchikiishikw chisheuchimaawin. Chii ihtaau peyakwaau uchimaau e tipiyeusiit shuuminaahtikw nihtaauchihchikan aschiiyuu. Peyakwaau maak wiipach e chechishepaayaayich chii wiiwiyuu e nituu naanituweyimaat aweyuuh chechii utaaskunaat, chechii aapatisiyich anite ushuuminaahtikw nihtaauchihchikan aschiihch. 2Chii iteu kiipaa an uchimaau che chiishiihkuwaat aniyuu kaa utaaskunaat, peyakw chiishikaau maak e ishpish aapatisiyich peyakw shuuliyaanaapiskwa che ishpish chiishiihkawaat. Chii niskumuyuu maak ekw kaa itishahwaat chechii aapatisiyich anite shuuminaahtikw nihtaauchihchikan aschiihch. 3Ekw miin kaa chistuhtet wiyesh peyakushteu e ispayiyich e chechishepaayaayich, kaa waapamaat anite naapeu mikw e naaniipuyich ekaa wiyesh itaapatisiyich anite kaa chii nishtuwiitwaau awenichii. 4Ekw kaa itaat, namui aa kaye chiyawaau chiwii aapatisinaawaau anite nishuuminaahtikw nihtaauchihchikan aschiihch. Misiwe wesh chika miyu chiishiihkaatinaawaau atushkuyekwe. Ekw maak kaa ituhteyich chechii nituu aapatisiyich anite unihtaauchihchikan aschiihch.”
5“Yaapihtaachiishikaayich maak, ekw maak miin nishtu e ispayiyich e chiishkwaapihtaachiishikaayich, miin chii ituhteu an uchimaau anite kaa chii nishtuwiyich aweyuu miin kutak aweyuu chechii utaaskunaat. Yaapach kiipaa ekun kaa itaat, che miyu chiishiihkuwaat. 6Chekaat maak niyaayin chii ispayiyiche ekw miin kaa ituhtet anite kaa chii nishtuwiyich aweyuu miin maak chii waapameu naapeu anite e naaniipuyich, ekw kaa itaat, ‘Chekwaan wehch mikw naaniipuuyekw utah iskan chiishikaau ekaa chekwaan ihtuutamekw.’ ”
7“Ekw kaa itikut, ‘Namui awen eshkw nuuhchi utaaskunikunaan.’ Ekw kaa itaat, ‘Kaye chiyawaau maataan nituu aapatisikw anite nishuuminaahtikw nihtaauchihchikan aschiihch.’ ”
8“Iskutak maak wetaakusiyich, an uchimaau chii iteu aniyuu kaa naanaakachihaayich aniyuu kaa aapatisiitwaauh, ‘Wiisaamach anichii kaa aapachihiikwaau, misiwe che kachiishiihkuutwaau aniyuu kaa aapatisitwaau. Niishtam anichii maahchishtai kaa utaaskunaakanuutwaau chiishiihkuuch, ekw miin anichii kutakach taan mikw kaa ati itiskaatutwaau e utaaskunaakanuutwaau, che ati utihtahuutwaau anichii niishtam kaa utaaskunaakanuutwaau. Eukw uchii niishtam kaa utaaskunaakanuutwaau maahchishtai che chiishiihkuutwaau.’ ”
9“Anichii maak naapeuch niyaayin kaa ispayiyich kaa utaaskunaakanuutwaau eukunich niishtam kaa chiishiihkuwaakanuutwaau. Peyakw shuuliyaanaapiskwa chii miyaakanuuch. Ekun maak kaa ishpish chiishiihkuwaakanuutwaau misiwe anichii kaa utaaskunaakanuutwaau aniyuu kaa chiishikaayich, kaye anichii niishtam kaa utaaskunaakanuutwaau. 10Iskutak maak anichii niishtam kaa utaaskunaakanuutwaau kaa chiishiihkawaakanuutwaau, chii iteyihtamuch wiyawaau etituu mistahii che chiishiihkuwaakanuutwaau, mikw maak yaapach peyakw shuuliyaanaapiskwa chii ishpish chiishiihkuwaakanuuch kaye wiyawaau. 11Chii utineuch kiipaa aniyuu shuuliyaanaapiskwa kaa miyaakanuutwaau, namui mikw naashch uhchiwii mamiyuusinahweuch taan kaa ishi ayimitutuwaatwaau aniyuu kaa tipiyeusiyich aniyuu nihtaauchihchikan aschiiyuu. 12Chii iteuch, ‘Anichii maahchishtai kaa utaaskunaakanuutwaau chechii aapatisitwaau mikw peyakw tipahiikan chii aapatisuuch, niyaan maak wii iskan chiishikaau nichii aapatisinaan aat mekwaach anit kaa chishitech yaapach maak peyakunihch misiwe e ishpish chiishiihkuuyaahch.’ ”
13“An maak kaa tipiyeusiit aniyuu nihtaauchihchikan aschiiyuu chii iteu aniyuu peyakw, ‘Niwiichewaakan, namui chichimutamaatin, wesh chichii ititin peyakw shuuliyaanaapiskw che ishpish chiishiihkaataan peyakw chiishikaau ishpish aapachihiitaane. Chichii niskumun maak. 14Shaash chichii tipahamaatin. ekute maak. Wesh uu kaa utaaskunitakuch misiwe taapituu chichii wii ishpish chiishiihkaatinaawaau. 15Namui aa chichischeyihten mikw waa ihtuutamaan nishuuliyaam chechii ihtuutamaan. Namui aa chinaheyihtamihiitin e miyuhtwaayaan.’ ”
16Ekw Jesus kaa ati itwet, “Eukw maak che uhchi utaahch ishi pachishtinaakanuutwaau anichii niikaanihch kaa itahiisutwaau ekw anichii maahchishtai kaa ishi pachishtinisutwaau niikaanaanihch chikaa ishi pachishtinaakanuuch.”
Jesus miin kaa aayimuutahk che nipit
Mark 10.32-34; Luke 18.31-34
17Mekwaach maak Jesus Jerusalemihch e ituhtet chii pischehtaheu aniyuu kaa niishushaapuyich uchischinuhamuwaakan anite pahkaan chechii ihtaawaakupanenich, ekw kaa itaat aniyuu e ati pimuhtetwaau, 18“Nituhtamukw maa,” chii iteu, “Jerusalemihch chitituhtenaanuu, ekute ute che maakunaakanuut Iinuu Ukusisa anite chechii ishi pachishtinaakanuut kaa niikaanapiyitwaauh ayimiheuchimaauh e ihtaayich kaye wiishuwewiniyuu kaa chiskutamaacheyitwaauh e ihtaayich chechii wiyaaskunikut. Eukw uchii che itashuwetwaau chechii nipahaakanuyich. 19Ekw maak miin anite aniyuu ekaa Jewa kaa itiskaanesiyich e ihtaayich che ituhtahaatwaau chechii maayeyimaakanuyich kaye chechii pishishtehwaakanuyich kaye chechii chiistaaskuhwaakanuyich. Mikw maak chii nishtu chiishikaayiche kaau chika wanishkaau.”
Taan kaa ishi kakwechimaat peyakw ukaawiimaau Jesus chechii ihtuutamaakut
Mark 10.35-45
20Zebedee maak wiichiskweu chii pechi wiicheweu ukusisa, kaa pechi nituwaapamaatwaau Jesus ekw an iskweu kaa ati uchihchiihkunipayishtuwaat Jesus e wii nituweyihtamuwaat chekwaayuu.
21Ekw Jesus kaa itaat, “Chekwaan netuweyihtaman.” Chii itikuu maak, “Uchii taapishkun nikusach chechii wiitapimiskwaau iskutak chisheuchimaawiyine, peyakw anite chinihiiwinihch chechii apit ekw an kutak anite chinimihchiiwinihch.”
22Ekw Jesus kaa itaat aniyuu ukusiyuu, “Namui chichischeyihtenaawaau an chekwaan kaa ishi nitutamaayekw. Chika chii ihtinaawaau aa chechii minihkweyekw taan e ishi ihtakuhch niminihkwaakanihch menihkweyaan anuhchiish. Chika chii ihtinaawaau aa chechii siikahaahtaakuyekw muyaam niya taan che ishi siikahaahtaakuyaan.” Ekw kaa itikut, “Ehe, nika chii ihtinaan.”
23Ekw Jesus kaa itaat, “Ehe, taapwe, an che ishi minihkweyaan ekun kaye chiyawaau che ishi minihkweyekw, chika peyakuhtaanaanuu an minihkwaakan. Kaye an siikahaahtaachewin che siikahaahtaakuyaan eukun an kaye chiyawaau che siikahaahtaakuyekw. Mikw maak namui niya nika chii wiyeyimaau awen che wiitapimit anite nihiiwinihch maak anite nimihchiiwinihch. Wesh wiya Nuuhtaawii chii wiyaapameu aniyuu aweyuu anite che apiyich.”
24Iskutak maak anichii kutakach mitaahtu chischinuhamuwaakanich piyehtahkwaau uyuu, chii chishuwaahiikuuch aniyuu niishu kaa wiichishaanihtuwiyich. 25Jesus kaa wiishaamaat misiwe ekw kaa itaat, “Chichischeyimaawaauch anichii kaa niikaanishkuwaatwaau ekaa Jewa kaa itiskaanesiyich taan waa ishi katipeyimaatwaau aniyuuh iinuuh. Kaye wiyawaau maak e ihtaayich aniyuuh naakaanishkaakutwaau. 26Mikw maak ekaawii chika uhchi ishinaakusinaawaau chiyawaau. An awen anit e tashiyekw netaweyihtamukwe chihchiwe chechii iteyihtaakusit ekush chika ihtuutam chechii atushkaataakw. 27Ekw an awen kaa wii niikaanapihiisut eukuu misiwe e tashiyekw che utaapachihaakaniyekw. 28Mwehch Iinuu Ukusisa namui uhchi pechi takushin chechii atushkuwaakanuut, chii takushin chechii atushkuwaat iinuuh. Kaye maak chii takushin chechii pachishtinahk upimaatiisiwin miiskuch mihchetu aweyuuh chechii aapihkunaakanuyich.”
Jesus kaa miinuwaachihaat niishu naapeuh ekaa uhchii waapahtamiyich
Mark 10.46-52; Luke 18.35-43
29Aniyuu maak e ati nakatahkwaau Jericho Jesus ekw maak uchischinuhamuwaakan, mihchetu aweyuu chii nuushuushkaakuuch. 30Niishu maak naapeuch ekaa waapahtahkwaau anite yaaiskanuu e apitwaau chii pehtamuch e iinaanuyich Jesus e pimuhteyich, ekw kaa tepwetwaau e itwetwaau, “Chiya David kaa ukusiitutaask, namui aa chichistimaasinuunaan.”
31Anichii maak iinuuch waaskaa anit kaa ihtaatwaau chii chistahamuweuch aniyuu naapeuh, e itaatwaau, “Ekaa maa chistukw.” Ekw mikw etituu suuhk kaa tepwetwaau anichii naapeuch e itwetwaau, “David kaa ukusiituutaask, namui aa chichistimaasinuunaan.”
32Jesus maak chii chipihchikaapuu, kaa wiishaamaat aniyuu naapeuh, kaa itaat, “Chekwaan netaweyihtamekw chechii ihtuutamaatakuch.”
33Chii iteuch maak, “Utipeyihchikeu, ihtuutuunaan maa chechii waapahtamaahch.”
34Jesus maak chii chistimaacheyimeu, kaa taahtinamuwaat uschiishikuyuu, tiiwehch maak chii waapahtamiyuu, ekw kaa ati nuushuushkaakut.
Currently Selected:
Matthew 20: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
