Matthew 11
11
John kaa siikahaahtaachet kaa nituu chischeyimaat Jesus
Luke 7.18-35
1Iskutak maak kaa chiishi wiishumaat Jesus aniyuu uchischinuhamuwaakanh, ekw kaa chistuhtet, kaa nituu chiskutamaachet kaye kaa kacheskwet anite aniyuuh kutak ihtaawinh anit peshuch kaa ihtakuniyikwaauh.
2John kaa siikahaahtaachet maak chii maakunaakanuu ekw kaa chipahwaakanuut chipahutuukamikuhch. ekute maak anite kaa pehtahk e tipaachimaakanuyich taan e ihtiyich Christ, ekw kaa itishahwaat niishu uchischinuhamuwaakanh anite e ihtaayich Jesus. 3Ekw kaa kakwechimaatwaau aniyuu Jesus, “Pechi wiihtamuunaan maa, eukw aa chiya Christ an che takushinikupane maak eshkw che ashuwaapamaauchihtipane kutak chechii takushihk.”
4Ekw Jesus kaa itaat, “Chiiwekw, che wiihtamuwekw John taan kaa ishi waapamiyekw e ishi ihtuutamaan kaye taan kaa ishi pehtamekw. 5Wiihtamuwaahkw maak e waapahtamiitwaauh aniyuu ekaa uhchii waapahtamiyich, e pimuhteyich aniyuu ekaa uhchii pimuhteyitwaauh, kaye maak e payehchisiitwaauh aniyuu kaa ayaayich kaa maayaataniyich umichiiwaaspinewiniyuu, e chii miinuwaachihaakanuyich. Kaye e pehtamiyich aniyuu ekaa uhchii pehtamiyich. Kaye e chii wanishkaanaakanuyich aniyuu kaa nipiitwaau. Kaye miywaachimuwiniyuu e waawiihtamuwaakanuyich kaa chistimaatisiyich aweyuuh. 6Shaweyihtaakusuu maak an awen ekaa che niyehtaaweyimikwe.” Ekun kaa itaat Jesus aniyuu Johna uchischinuhamuwaakaniyuuh.
7Iskutak maak kaa chistuhteyich Johna uchischinuhamuwaakaniyuuh, Jesus chii aayimuumeu John anite e mihchetinaanuyich e itwet, “Iskutak kaa nituwaapamekw John anite pakwaatiskamikaahch kaa kacheskwet, awen kaa iteyimekw che waapamekw. Mwehch mashkushii taan e itaashtihch mikw anite e ishiiwech e ishi naweyaashtihch ekun e iteyihtaakusit awen naashch e nihiishaakuuchimaakanuut. Ekun aa kaa iteyimekw John e iteyihtaakusit. 8Chekwaan maak wehchi nituwaapamekw. Awen kaa iteyimekw che waapamekw. Naapeu aa naashch e miywaashpisut. Anichii awenichii kaa miywaashpisutwaau chisheuchimaau uwaaskaahiikanimiihch ekute e ihtaatwaau. 9Chekwaan maak wehchii nituwaapamekw. Chichii iteyihtenaawaau aa uchischiwehiichesuu che waapamekw. Ehe, chiwiihtamaatinaawaau uste wiya John chii iteyihtaakusuu ishpishaat kutak uchischiwehiichesuuh. 10Eukw uu John kaa aayimuumaakanuut anite Chishemanituu utayimuwinihch kaa itashtech,
Nika niikaanitishihwaau awen chechii ayeskuwiihkahk aniyuu meskanaayuu anit che pimuhteut. 11Chiwiihtamaatinaawaau, tahtu awenichii kaa pimaatisiitwaau namui uste iteyihtaakusuuch taan e iteyihtaakusiyich John siikahaahtaacheu. Yaapach maak an taan maauch nuuhtaash kaa iteyihtaakusit kihchikiishikw chisheuchimaawinihch uste wiya chisteyihtaakusuu ishpishaat Johna. 12Kaa ishpish chihchipayihtaat maak John siikahaahtaacheu e kacheskwet, ute maak ishi anuhchiish, muush wii sasuuhcheyimutaakanuu kihchikiishikw chisheuchimaawin, kaye kaa aahkwaateyihtaakusitwaau awenichii naashch suuhk e maasihchetwaau wiyawaau e wii maakunamaasutwaau. 13Wesh misiwe aniyehkaanaanich uchischiwehiichesuuch chii wiihtamuch Chishemanituu uchisheuchimaawiniyuu che utihchipayiyich, ekun maak kaye kaa ishi pechi wiihtaakuhch anite ayimihewin wiishuweusinahiikanihch paatish kaa takushihk John. 14Uchii uchischiwehiichesuuch chii iteuch eshkw che takushiniyich Elijah, tiyaapwehtawewekwenich maak, uu John eukun an Elijah. Eukuu uchischiwehiicheu che takushinikupane. 15Wii nisituhtamukw maak taan kaa ishi pehtamekw.”
16“Nika aayimuumaauch iinuuch anuhchiish mekwaach kaa pimaatisiitwaau taan e iteyihtaakusitwaau. Muyaam awaashach ekaa chii nanihiiwehiitutwaau taan e ishi metuwetwaau ekun e ihtitwaau. 17E tepwaatitutwaau, e itwetwaau, ‘Nichii wii ishi metuwenaan e niipuunaanuuhch, e chistuhcheyaahch e ihtiyaahch, namui maak kuuhchi niiminaawaau, kaye nichii nikamunaan e chistimaastaakuhkwaau nikamuwinh namui maak kuuhchi maatuunaawaau.’ 18Iskutak maak John kaa takushihk namui meshikum uhchi utinam miichimiyuu, namui kaye uhchi minihkweu shuuminaapuuyuu, ekw maak kaa itaakanuut machiahchaahkwa e piihchishkaakut. 19Ekw maak Iinuu Ukusisa chii miichisuu kaye chii minihkweu, chii itweyuuh maak aweyuuh, ‘Kanawaapamaahkw maa uu naapeu, taapwe kaa ukaasichimit kaye taapwe wiihchipeu, e uwiichewaakanit umachaatisiyuuh, kaye aniyuuh nitamukw kaa ihtitwaau kaa maamuushtinamiitwaauh chisheuchimaau shuuliyaayuu.’ Mikw maak taan e ishi pimaatisiit awen ekut e nuukuniyich taan e ishi kachehtaaweyihtahk.”
Anihiih ihtaawinh ati ekaa kaa taapweyimaakanuut Jesus
Luke 10.13-15
20Anite maak aniyuu ihtaawinh Jesus maauch kaa ihtuutahk maamishkaach ihtuwinh anichii maak iinuuch kaa ihtaatwaau anit aniyuu ihtaawiniyuu yaapach namui uhchi kweskaatisiyuuch. Namui maak uhchi manaachimeu e itaat, 21“Chiyawaau kaa ihtaayekw anit ihtaawinihch Chorazin kaa ishinihkaatech nuwach chika machipayinaawaau, kaye chiyawaau Bethsaida kaa ihtaayekw eukun mwehch che ishi machipayekw kaye chiyawaau. Wesh aniyuu maamishkaach chekwaayuu kaa ishi ihtuutamaakuyekw chii ihtuutaakanuwaakupanenh anite weshkach Tyre kaye Sidon kaa ishinihkaatekwaauh ihtaawinh shaash weshkach chipaa kweskaatisiyuuch wiyawaau anichii iinuuch. Ekw maak e wii nuukuhtaatwaau e ishpish mihchiiwesitwaau umachihtwaawinawaauh chipaa piskweyekapuuch e kaawekaniyikwaau machunisha, anite maak ishkwaaschisehch chipaa apuuch. 22Chiwiihtamaatinaawaau iskutak utihchipayihche wiyaaskunicheu chiishikaau, Chishemanituu chika waweshiheu aniyuu Tyre kaye Sidon kaa chii ihtaayich. Chiyawaau maak etituu chika waweshihiikunaawaau. 23Ekw maak chiyawaau anit Capernaum kaa ihtaayekw naashch taapwe chitaspeyimunaawaau anite kihchikiishikuhch chechii ishi utinikuyekw. Namui maak, machishkutehch chika ishi niihchiwepinikunaawaau. Maamishkaach chekwaayuu chii ishi ihtuutaakanuu anite chitihtaawiniwaahch yaapach maak namui chuuhchi kweskaatisiinaawaau ekw maak aniyuu maamishkaach chekwaayuu kaa ishi ihtuutamaakuyekw, chii ihtuutaakanuwaakupanenh anite Sodom ihtaawinihch chipaa kweskaatisiyuuch anichii anit kaa ihtaatwaau ekw maak anuhchiish eshkw chipaa ihtakun an ihtaawin. 24Chiwiihtamaatinaawaau maak iskutak utihchipayihche e wiyaaskunicheu chiishikaach, chiyawaau uste aakwaayaach chika ishi wiyaaskunikunaawaau ishpishaat anichii iinuuch Sodom kaa ihtaatwaau aat aniyuu e chii ishpish machaatisiitwaau.”
Jesus kaa wiishaamaat aweyuuh chechii nituwaapamikut
Luke 10.21, 22
25Ekut maak Jesus kaa ayimihaat e itwet, “Nuuhtaawii, chinanaaskumitin e chii waapahtiitwaau anichii awenichii ekaa uhchi chiskutamuwaakanuutwaau aniyuuh chekwaayuuh kaa kaatuutwaau kaa kachehtaaweyihtahkwaau. 26Ehe, Nuuhtaawii chinanaaskumitin wesh eukun uu kaa ishi naheyihtaman.”
27Ekw Jesus iskutak kaa chiish ayimihaat chii iteu, “Nuuhtaawii misiwe chekwaayuu nichii miikw chechii nanaakatuweyihtamuch. Wesh namui awen chischeyimeu aweyuu aniyuu Ukusisimaau, mikw Uhtaawiimaau chischeyimeu. Kaye maak namui awen chischeyimeu aweyuu Uhtaawiimaau, mikw Ukusisimaau chischeyimeu, kaye mikw wiya Ukusisimaau chika wiyaapameu aweyuuh aniyuuh chechii chischeyimaayich Uhtaawiimaau.”
28“Pechi naashikw misiwe chiyawaau kaa mistaapatisiyekw kaye kaa pwaauteyekw, chika miitinaawaau chechii ayuwepiyekw. 29Pushchishkamutiisukw nimiiskwaapan, pechi chischinuwaapamukw maak, wesh nitayuuspaatisiin niya kaye nitipihteyimun nitehiihch. Kaye maak chika chii ayiwepuuch chitahchaahkuwaauch. 30Wesh wehtan nimiiskwaapan e aapatahch e pimuhtataakanuuhch chekwaan kaye maak yaahkan chekwaan e pimuhtataakanuuhch.”
Currently Selected:
Matthew 11: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
