Matthew 10
10
Jesus kaa itashumaat kaa niishushaapuyich uchischinuhamuwaakanh
Mark 3.13-19; 6.7-13; Luke 6.12-16; 9.1-6
1Jesus chii wiishaameu kaa niishushaapuyich uchischinuhamuwaakanh ekw kaa miyaat tipeyihchichewiniyuu chechii wiiwiitishihwaayich machiahchaahkwa, eyuu maak chechii miinuwaachihaayich aniyuu aweyuu nanaahkuu kaa itaaspineyitwaauh kaye kaa aahkusiitwaauh. 2Maau maak kaa ishinihkaasuyich aniyuu niishushaap Apastalh, Simon, eukuu Peter kaa ishinihkaataakanuut, ekw maak Peter ushiim Andrew, James ekw maak aniyuu wiichishaanh John, eukw uyuu Zebedee ukusisa, 3Philip, ekw maak Bartholomew, Thomas, ekw maak Matthew, an kaa chii maamuushtinahk Chisheuchimaau shuuliyaayuu, ekw maak James, Alphaeus ukusisa, ekw maak Thaddaeus, 4ekw maak Simon kaa ayimihewaatisiit kaa ishinihkaataakanuut, ekw maak Judas Iscariot, eukuu kaa wiyeshipachishtinaat Jesus.
5Ekw uchii niishushaap kaa chihchitishahukutwaau Jesus e itikutwaau, “Ekaawii ituhtekw anite iinuuch ekaa Jewa iinuuch kaa itiskaanesitwaau e ihtaatwaau kaye ekaawii ituhtekw anite ihtaawinh Samaria aschiihch kaa ihtakuhkwaauh. 6Mikw anite ituhtekw Israel aschiihch anite Jewa iinuuch kaa ihtaatwaau wesh mwehch maanishchaanishach e wanishinitwaau ishinaakusuuch. 7Nituu kacheskwekw e wiihtamekw shaash e peshunaakuhch kihchikiishikw chisheuchimaawin. 8Miinuwaachihaahkuch kaa aahkusitwaau, kaye wanishkaanaahkuch anichii kaa nipitwaau, miinuwaachihaahkuch chechii payehchisiitwaau anichii kaa maayaataniyich umichiiwiniyuu kaa ayaatwaau kaye wiiwiitishihwaahkuch machahchaahkuch. Sehchei chichii miikunaawaau uu suuhkaatisiiwin, namui maak chipaa uhchi chiishiihkaakunaawaau uu e ihtuutamekw. 9Ekaawii kaye waawaach niimishuuliyaawekw. 10Ekaawii ayaakw kaye niimuutaan, kaye ayuwaak chichekwaanimuwaauh e chichishkamekw, maak kaye maschisin maak siskahuun. Wesh e aapatisit awen chipaa miyaakanuu taan e ishi nuuhtepayit.”
11“Iskutak maak utihtamekwe utenaau maak ihtaawin, naanituwaapamaahkw awen e tepicheyihtaakusit chechii piihtakahiitaakw. An maak che ishpish ihtaayekw ekute anit ihtaakw paatish miin chistuhteyekwe. 12Iskutak maak e ati piihcheyekw an waaskaahiikan che waachiyemekuch chiyaameyihtamuwinihch ishi e shaweyimekuch. 13Anichii maak awenichii kaa ihtaatwaau anit waaskaahiikanihch naheyimitaakwenich, taapwe chika shaweyimaakanuuch ekw maak ekaa naheyimitaakwenich, namui chika uhchi shaweyimaakanuuch. 14Ekw maak utihtamekwe ihtaawin maak waaskaahiikan ekaa maak wii piihtakahiikuyekwe kaye ekaa wii nituhtaakuyekwe, nakatamukw an ihtaawin maak an waaskaahiikan ekw che pahpausiteshimuyekw. 15Chiwiihtamaatinaawaau, iskutak wiyaaskunicheu chiishikaache Chishemanituu uste chika chistimaacheyimeu aniyuu kaa machaatisiyich anit kaa ihtaayich Sodom ekw maak Gomorrah ishpishaat aniyuuh aweyuuh ekaa kaa naheyimitaakw.”
Taan che ishi aayimuhutwaau anichii che chischinuhamuwaakanitutaakutwaau Jesus
Mark 13.9-13; Luke 21.12-17
16“Nituhtamukw, chichihchitishahuutinaawaau mwehch maanishchaanishach e itishahwaakanuutwaau anite e mihchetiyich mahiihkanh e ihtaayich. Yaakwaau ihtikw mwehch chinepukw e ishi yaakwaau ihtit, kaye maak yuuspisiikw mwehch umiimiiu e ishpish yuuspisiit. 17Ayaakwaamiikw maak, wesh chika ihtaauch awenichii che maakunitaakuch ekw anite kaa niikaanishkaacheyich e ihtaayich che ituhtahiitaakuch chechii wiyaaskunikuyekw. Kaye maak anite utayimiheukamikuwaahch ekute che papasistehukuyekw. 18Chika ituhtahiikunaawaau tipeyihchichesuuch kaye chisheuchimaauch e ihtaatwaau chechii uhchishkuukaapuushtawekuch an uhchi e nuushuushkuwiyekw. Chika nitaweyihtaakusinaawaau kuiskw chechii ishi aayimuumiyekw anit uhchishkuu e ihtaatwaau kaye uhchishkuu anichii ekaa Jewa kaa itiskaanesitwaau. 19Iskutak maak piihtakahiikuyekwe anite, ekaawii aayimeyihtamukw taan nihaau che itweyekw, wesh iskutak utihchipayihche an che ihtuutaakuyekw chika miikunaawaau taan che ishi ayimiyekw. 20Wesh an che ishi ayimiyekw, namayeu chiyawaau an chitayimuwinawaau mikw maak an che itweyekw Ahchaahkw Chuuhtaawiinuu e ihtaat kaa uhchiit eukw an che miitaakw taan nihaau che itwewekw.”
21“Naapeuch chika pachishtineuch wiichishaanawaau chechii nipahaakanuyich kaye uhtaawiimaauch ekun che ihtuutuwaatwaau utawaashiimuwaau, kaye awaashach chika ihtuutaweuch uniichihiikuwaau chechii nipahaakanuyich. 22Misiwe awenichii chika uhkaatikuwaauch e nuushuushkuwiyekw. An maak awen ekaa che nuuhtipuuniyikwe e pechi nuushuushkuut eukw an che pimaachihaakanuut. 23Nanehkaachihiikuyekwe peyakw ihtaawin, ushimukw ekw anite kutach ihtaawin che ituhteyekw. Chiwiihtamaatinaawaau, namui eshkw misiwe chika uhchi ishi waawiihtenaawaau miywaachimuwin anite aniyuu ihtaawin Israelihch kaa ihtakuhkwaauh, shaash che takushihk Iinuu Ukusisa.”
24“Namui uste chisteyihtaakusuu kaa chiskutamuwaakanuut taan e iteyihtaakusiyich aniyuu kaa chiskutamaakut. Kaye aapachihaakan namui wiya uste iteyihtaakusuu e iteyihtaakusiyich uchimaam. 25Chipaa miyeyihtam maak an kaa chiskutamuwaakanuut, iteyihtaakusit e iteyihtaakusiyich aniyuu kaa chiskutamaakut, kaye an aapachihaakan iteyihtaakusit e iteyihtaakusiyich uchimaam. Niya maak aat e uchimaawiyaan chischisikw maa taan kaa ishi maayeyimitwaau e chii itwetwaau an machiahchaahkw uchimaau Beelzebul e aawiyaan. Chiyawaau maak etituu chika maayeyimikuwaauch.”
Awen an chipaa kushtaakanuu
Luke 12.2-7
26“Mikw maak ekaawii kushtaahkuch awenichii. Wesh an chekwaan ekaa kaa nuukuhch chika nuukuhtaakanuu anite e waashtech. Misiwe chekwaan chiimuut kaa ihtuutaakanuuhch chika chischeyihtaakun. 27An taan e ishi wiihtamaatakuch e tipiskaach wiihtamuhkw mekwaach e chiishikaach. Kaye an taan kaa ishi chiimuut wiihtamaakuyekw wiihtamuwaahkuch misiwe awenichii chechii chischeyihtahkwaau. 28Ekaawii kushtaahkuch awenichii kaa nipahaatwaau aweyuuh. Chika chii nipaheuch aweyuu kaye chika chii wanaachihtaauch miiyuuyuu mikw maak namui chika chii wanaachiheuch ahchaahkwa. Chishemanituu maak eukw kushpaniishtuwaahkw an chechii wanaachihtaat miiyuuyuu kaye ahchaahkwa chechii wanaachihaat machishkutehch. 29Mikw peyakw shuuliyaanaapiskw itachihtaakusuuch niishu piyeshiishach. Namui maak waachipeyakw kata uhchi pahchishinuuch mushtaskamihch ekaa che chischeyihtahk Kuuhtaawaau. 30Kaye chiyawaau maak waawaach chistikwaaniyaapiiwaauh misiwe chii achihtaakanuu e tahtwaapekahkwaauh. 31Ekaawii maak kushtaachikw wesh chiyawaau uste chititeyimikuwaau Chishemanituu ishpishaat mihchetu piyeshiishah e iteyimaat.”
E waawiihtamekw e chischeyimekw Jesus Christ
Luke 12.8, 9
32“Awen wiihtamuwaate kutak aweyuu e taapweyimit, kaye niya nika wiihtamuwaayuuh Nuuhtaawii kihchikiishikuhch kaa ihtaayich e chischeyimak. 33Ekw maak awen e itaat aweyuu ekaa taapweyimit nika itaau kaye niya Nuuhtaawii kihchikiishikuhch kaa ihtaat, namui nichischeyimaau.”
Jesus namui uhchi takushinuu muush chechii miyupayinaanuyich
Luke 12.51-53; 14.26, 27
34“Ekaawii iteyihtamukw e chii takushiniyaan utah aschiihch chechii petaayaan chiyaameyihtamuwin. Namui nuuhchi takushin chechii petaayaan chiyaameyihtamuwin, nichii takushin ekaa chechii nihiiskaatunaanuuhch.
35Nichii takushin ekaa chechii naheyimaat naapeu uhtaawiih, kaye ukaawiimaau ekaa chechii naheyimikut utaanisa, kaye iskweu ekaa chechii naheyimikut unihaakaniskwem. 36Aniyuu niyaanitam aweyuu kaa wiichimikut awen eukw aniyuu maauch che uhkaatikut.”
37“Awen uste uhtaawiih maak ukaawiih saachihaate ishpishaat niya, namui tepicheyihtaakusuu chechii pechi nuushuushkuut. Kaye awen uste saachihaate ukusisa maak utaanisa ishpishaat niya, namui tepicheyihtaakusuu chechii pechi nuushuushkuut. 38An awen ekaa kaa wii pimuhtahaat utaashiteyaahtikum namui tepicheyihtaakusuu chechii uchischinuhamuwaakaniyaan. 39An awen kaa wii kanuweyihtahk upimaatisiiwin mikw wiya e wii naniheyihtamihiisut kata wanihtaau ekw maak an awen kaa wanihtaat upimaatisiiwin niya uhchi kata miskam.”
An awen kaa miyuuhkuwaat Chishemanituu utaapachihaakaniyuuh chika miskam utipahamaakusiiwin
Mark 9.41
40“Awen e piihtakahiitaakw nipiihtakahiikw kaye niya, e piihtakahiit maak utineu aniyuu aweyuu kaa pechi itishahuyich. 41An maak awen kaa piihtakahaat uchischiwehiichesuuh aniyuu uhchi e uchischiwehiichesuyich, aniyuu che ishi tipahamuwaakanuyich uyuu uchischiwehiicheuh ekun kaye wiya mwehch che ishi tipahamuwaakanuut. Kaye maak awen kaa piihtakahaat e kuiskutaatisiyich naapeu, aniyuu uhchi e kuiskutaatisiyich, aniyuu e ishi tipahamuwaakanuyich ekun mwehch kaye wiya che ishi tipahamuwaakanuut. 42Chiwiihtamaatinaawaau, aat mikw minihaate awen e tahchikamiyich nipiiyuu uyuu peyakw apishtawaasha aniyuu uhchi e pechi nuushuushkuyich, chiwiihtamaatinaawaau cheshtinaash chika miskam utipahamaakusiiwin.”
Currently Selected:
Matthew 10: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
