GENESIS 9
9
Noa Sinah Pathian Thudântuk
1Pathian nih Noa leh a fa tla chu mal a sâwm na le, “Fa tam tak nei ule, nan thlâk tla nih tual tlûn zawzawng khat hen luah na seh. 2Ran zawzawng, vâ tla, ngâ tla nangmah ṭih hen um na seh. Na thuneihnâk tangah siah hep an si. 3Tu chu thlâi hâwi hen na ei kho na lai; na buh rangah a ektê hen ka nan pêk. 4Na ei lo ding mi pakhat chu sa a thî telh mi asi. Nungnâk chu thisen thawk hen mi asi ruangah na ei ding asi lo. 5Âuzawng nih mi a thah chun rêp asi lai. Ramsa zeital nih minung a thah chun thihnâk hen kei khawm nih ka rêp lai. 6Minung chu Pathian hâwi hen siam mi asi le, churuang chun âuzawng minung a thah chun amah hâwi minung lîlâ nih a thah bâk lai. 7“Fa tam tak na nei ding asi, churawhchun na thlâk tla tual tlûn zawzawngah an um lai.”
8Pathian nih Noa leh a fa tla sinah, 9“Tu chun nangmah leh na thlâk tla sinah thudân ka tuk rawh le, 10thil nung zawzawng vâ tla, ramsa tla, na sinah lawng thawk hen an suak mi zawzawng tla hen. 11Hi thu hen na sinah thudân ka tuk asi: Buanso nih thil nung zawzawng chu a veih rerêng lai lo rawh; buanso nih tual a râwk rêng lai lo rawh. 12Nang leh thil nung zawzawng tla sinah thudân ka tuk mi hi zungzâl singsiahnâk ding asi lai. 13Sûm lakah ka chumchâ ka siah asi. Chu chu laikulh ah ka thudântuk singsiahnâk asi lai. 14Zeiliau zawng ah vân khi sûm hen ka khattir hen chumchâ a hawng lang chun, 15nang leh ramsa zawzawng sinah thu ka tiamh mi chu thil nung zawzawng veih an si awtlo rawh ti ka theihkumza lai. 16Sûm lakah chumchâ a hawng lang chun kei leh thil nung zawng karah zungzâl thudântuk asi ti ka muh hen ka theihkumza lai. 17Chu chu thil nung zawzawng sinah thu ka tiam mi singsiahnâk asi,” a ti.
Noa leh A Fapa Tla
18Noa fapa tla lawng thawk hen an suak mi tla chu Sem, Ham leh Japhet an si. (Ham chu Kanaan pa asi.) 19Hi Noa fapa pathum tla hi tual tlûnah mi zawzawng thlâktu an si.
20Noa, phâisen nâwntu chu grep phuntu masa chem asi. 21Uain a din le a rî, a nipuan tla a lît le, a puanin ah takkaro hen a it. 22Kanaan pa Ham nih a pa takkaro hen a um mi a muh le, a suak le, a unau panih a va simh na. 23Chun, Sem leh Japhet nih puan an lâk le, an liang ah an tleih. Dunglei sît hen an kal le, puanin sungah mi an pa chu an va vurh. An pa takkaro hen um mi chu muh lo ding hen an mêl chu khatlei kângah anna her ving. 24Noa chu uain a rî mi a hawng fîm rawh chun a fapa a niang chem mi nih a lakah a thilti chu a theih le,
25“Kanaan chu siatbarh hen um seh! A unau tla sinah sal ah a um lai.
26LALPA, Sem Pathian chu sawr hen um seh!
Kanaan chu Sem sal asi lai.
27Japhet chu Pathian nih pungtir seh!
Sem mi le tla sinah a thlâk tla chu um na seh!
Kanaan chu Japhet sal si seh!” a ti.
28Noa chu buanso a tlung nûnah kum 350 a dam le, 29kum 950 asi ah a thi.
Currently Selected:
GENESIS 9: BCLBV
Highlight
Share
Copy
Want to have your highlights saved across all your devices? Sign up or sign in
Bawm Common Language Bible © Bangladesh Bible Society, 2004. All rights reserved.
