GENESIS 48

Jakob nih Efraim leh Manaseh

Rangah Mal a Sâwm Mi

1Chu nûnah chun Josef chu a pa a damlo ti an simh. Churawhchun, a fapa panih Efraim le Manaseh chu a pa va zauh ding hen a kalpi na. 2Jakob chu a fapa Josef amah zauh ding hen a hawng ti an simh rawh chun, tâimâk chuh râm hen a ihkhun ah a to. 3Jakob nih Josef sinah, “Zeizawng tikho Pathian chu Kanaan ram Luz khua ah ka sinah a hawng a langh le, mal a ka sâwm. 4‘Fa tam tak ka nan pêk lai le, churawhchun na thlâk tla chu phun tam tak an hawng si lai; hi ram hi na thlâk le sinah kumleza an tâ siding hen kan pêk lai,’ ” hawng ka ti.

5Jakob nih a thusim chu a pehpar vima, “Josef, na fapa panih hi ram ka hawng lânah an suak mi chu ka tâ an si; Efraim leh Manaseh chu ka fapa Reuben leh Simeon hâwi an si. 6Fapa dang na nei ding mi lam chu kei rang ding asi lo; ro anna ting ding mi khawm Efraim leh Manaseh thawk asi lai. 7Hi hi na nu Rakel ruangah ka ti mi asi. Anih chu Kanaan ram ah a thi le, thungâi ka lung a fâk. Mesopotamia ram thawk hen kan hawng kîr liauah Efrat khua naih zâu ah, Efrat kalnâk lam vâu ah amah chu ka vûi rawh,” a ti. (Efrat chu tûliau Bethlehem khua asi.)

8Jakob nih Josef fa tla a muh le, “Hi tla hi âu fa tla me an si?” a ti.

9Josef nih a sâng le, “Hi tla hi keimah fa le, Pathian nih Aigupta ram ah hawng ka pêk mi an si,” a ti.

Jakob nih, “Mal ka sâwm na ding hen ka sinah hawngpi na,” a ti. 10Jakob chu a upa tuk ruangah khua fiang a muh lo le, fiang ker hen a liah lo. Josef nih a fa le chu a sinah a kalpi na, a kuah na le, a châwchawk na. 11Jakob nih Josef sinah, “An muh nawlh ding rêng ka ruat lo, tuah na fa le tla tiang Pathian nih hawng ka muhtir,” a ti. 12Josef nih a pa kârkalak mi a fa tla chu a lâk na le, a kûn le, a pa rangah mâi a mûk.

13Josef nih Efraim chu a pa kehlei ah, Manaseh chu a vawrhlei ah a siah na. 14Sikhawmsele, Jakob nih a bân chu a kalhkeh le, ngâksia dauh si khawmsele a vawrhlei chu Efraim lû tlûnah a thâng, a kehlei chu a upa dauh mi Manaseh lû tlûnah a thâng. 15Churawhchun, Josef chu mal a sâwm rawh:

“Ka pa Isak leh ka pu Abraham nih a rian an ṭuan piak mi

Pathian nih hi ngaksia tla hi malsâwm na seh!

Tusûn ni tiang ah hawng ka ruitu

Pathian nih malsâwm na seh!

16Vânmifial, ṭihnungkâi zawzawngah

hawng ka humtu nih malsâwm na seh!

Hi ngâksia tla lakah hin ka pu

Abraham leh Isak min chu um kumza seh!

fa tam tak leh thlâk tam tak nei na seh,” a ti.

17Josef nih a pa nih a kut vawrhlei Efraim lû tlûnah a thâng mi chu a muh le a lungsi lo; churawhchun Efraim lû lak mi a pa kut chu a lâk le, Manaseh lû ah a ṭhial. 18A pa sinah, “Mahlo pa, hi hi upa dauh mi asi, na vawrhlei kut thâng,” a ti.

19A pa nih a thusim chu a remti lo, “Ka theih asi, ka fapa, Manaseh thlâk khawm hi mi cherkhet an si awt asi. Sikhawmsele, a naupa hi a upa ngâk hen a lian dauh lai, a thlâk tla chu phun rokual tak an si lai.”

20Churawhchun, chu ni ah chun mal a sâwm na le, tihin a sim, “Israel tla nih malsâwmnâk an sim kip ah nan min an sim lai. ‘Pathian nih Efraim leh Manaseh hâwi hen an siam na seh,’ ” an ti lai. Churuangah chun Jakob nih Manaseh mâika ah Efraim a siah.

21Churawhchun, Jakob nih Josef sinah, “Na ka muh hâwi hen, ka thih a nâi rawh le, Pathian chu na sinah a um lâi le, an thlâk natu nan pu umnâk leiah an kîrtir nawlh na lai. 22Sekem chu na unau tla sinah silo hen nangmah sinah kan pêk le, ka chanhtiang leh ka nâmsâu hen Amor tla lakah mi ram ningno tak ka lâk mi asi,” a ti.

Currently Selected:

GENESIS 48: BCLBV

Highlight

Copy