GENESIS 45

Josef a Unau Sinah Â Phuangnâk

1Josef chu a to-aw tla mâika ah â sûm kho lo rawh le, an ektê hen pindan ah mi suak ding hen thu a pêk na. A sinah âukhawm an um lo liauah a unau tla sinah Josef nih âu asi ti â phuang rawh. 2Hâu suah hen a ṭap le, Aigupta mi tla nih an theih le, a thâwngthâng chu lal umnâk ah an va sim. 3Josef nih a unau tla sinah, “Kei hi Josef kasi, ka pa chu a dam ko rih bei ne?” a ti. Sikhawmsele, a unau tla chu an lâu tuktarâi le, an sâng kho lo. 4Churawhchun, Josef nih an sinah, “Hawng ka naih dauh u,” a ti. An va naih le, an sinah, “Kei chu nan unaupa Josef, Aigupta ram ah nan zuar mi kha kasi. 5Tuah nanmah lehlam nan ka zuar ruangah a phurung lah ule, nanmah lânah Pathian nih mipi nungnâk tla hum ding hen hawng ka fial mi asi hi. 6Tu hin pâm chu ram lakah kum nih cho asi rih, mâilei ah kum nga a um rih; chu karah chun fângât leh phâisen nâwn khawm a um lai loh. 7Pathian nih nanmah leh nan thlâk tla thibang rangah humtu leh lampi chê siamtu ding hen hawng ka fial masa asi. 8Churuangah hinah hawng ka fialtu hi nanmah nan si lo le, Pathian asi. Lalchem nih a rianṭuantu sâng chem ah hawng ka siah. A ram pumpi ah thuneihnâk hawng ka pêk le, Aigupta ram pumpi ah lâirêltu kasi.

9“Tuah mawhsareh hen ka pa sinah va tlung ule, ‘Na fapa Josef chu Aigupta ram lâirêltu ah Pathian nih a ruat rawh; sâwtlotê ah ka sinah hawng tuan seh a nan ti, ti hen simh u,’ a ti. 10Gosen ram ah nan um lai le, keimah naih ah, nang, na fa tla, na dawrâ tla, na kêl tla, na ranrual leh nan thilneih zawzawng hen. 11Gosen ram ah nan um chun kan zauhkhenh kho na lai, pâm chu kum nga a um awt rih, nan dâwngsung leh nan neih tla an sungvâng lonâk ding hen” a ti.

12Josef ber nih, “Tuah nan ektê hen, nang Benjamin khawm nih Josef tak kasi ti nan ka theih rawh. 13Hinah Aigupta ram ah ka thiltikhonâk a sâng zia leh thil zeizawng nan muh mi tla ka pa rangah simh u. Amah khawm khulrang hen hinah hawngpi u’ a ti.

14Chun, a naupa Benjamin chu a kuah le a ṭap rawh; a hawng kuah rawh chun Benjamin khawm a ṭap bâk. 15Chun ṭap bû hen a unau tla khawm a kuah na le a châwkchawk na rawh. Chu nûnah chun a unau tla hen thu an ruat.

16Josef unau tla an hawng ti lalchem nih a theih rawh chun a to-aw tla hen thungâi anna lâwm rawh. 17Lalchem nih Josef sinah, “Na unau tla chu an ran timhtuah sele Kanaan ram ah kîrtir na rawh. 18An pa leh an dâwngsung tla va dawng na sele, hinah hawng kîr na seh. Aigupta ram sungah mun ṭha chem ka pêk na lai le, an duh nûnah a lei khawm umnâk an tawng lai. 19An nupi le, an fa tla, an pa leh a sinah um mi putnâk ding hen Aigupta ram ah kari tla hi put ding hen simh na. 20An dunglei ah an thil an ri an mâk mi tla ruangah lungfâk lah na seh; Aigupta ram zawzawngah thil ṭha chem chu an tâ asi lai,” a ti.

21Jakob fa le nih chun an simh na mi hâwi hen an ti rawh. Josef nih lalchem thupêk hâwi hen kari tla chu a pêk na le, lampi ah an ei ding tla khawm a pêk na. 22Nipuan thleng khawm a pêk chiau na, sikhawmsele, Benjamin lam chu tangka zathum leh nipuan thleng panga a pêk. 23Josef nih a pa rangah Aigupta thil ṭha chem mi sanatung parâ phurh leh fâng sanatung parâ phurh, lampi ah an ei ding sang leh buh tla hen a kuat. 24A unau tla chu a fial na le, anna thawh awt liauah an sinah, “Lampi ah zeikhawm a êl lah u,” a ti na.

25Aigupta ram chu an kaltâk rawh le, Kanaan ram ah an pa sinah an va tlung rawh. 26An pa sinah, “Josef chu a dam ko rih! Aigupta ram lâirêltu asi!” ti hen an simh. Jakob chu a â thlo, a lung rerêng na lo.

27Josef nih an sinah thu a chah na mi an simh mi zawzawng leh Aigupta ram ah amah chuannâk ding kari tla a hawng kuat mi chu a muh le, a thinlung a fiang pup rawh. 28Jakob nih, “Ka fapa Josef chu a dam ko rih ngâk ma chu,” a ti. “Tuah ka ti ding chem chu ka thih lânah amah chu va muh ding chu asi ko rawh,” a ti.

Currently Selected:

GENESIS 45: BCLBV

Highlight

Copy