GENESIS 42

Josef Unau Tla Fâng Châwk

Ding hen Aigupta ah An Kal

1Jakob nih Aigupta ram ah fâng a um ti a theih le, a fapa tla sinah, “Zei rangah nan um salam ko? 2Aigupta ram ah fâng a um ti ka theih; sungvâng hen kan thih lonâk ding hen chunah chun va châwk u,” a ti na. 3Josef unau parâ chu Aigupta ram ah fâng châwk ding hen an kal rawh. 4Sikhawmsele, Jakob nih Josef naupa Benjamin chu an sinah a kaltir lo, a san chu vânduainâk a tawng sual lebang lai ti a ṭihṭanh ruangah.

5Kanaan ram ah khawm pâm a tlâ ruangah Jakob fa tla chu an unau rual hen fâng châwk ding hen an kal rawh. 6Josef, Aigupta ram ah governor nih chun laikulh mun kip thawk hen an hawng mi tla sinah fâng chu a zuar. Churawhchun, Josef unau tla khawm chu an hawng bâk le, a mâika ah an kûn le, an mâimûk. 7Josef nih a unau tla a muh na rawh chun a theih set na, sikhawmsele anmah theih na lo mi hâwi hen â umtir. Thin hê tak hen a sawnh na le, “Zei thawk hawng mi me nan si?” a ti.

“Fâng châwk ding hen Kanaan ram thawk hen kan hawng mi asi,” ti hen an sâng.

8Josef nih a unau tla chu a theih na khawmsele annih nih chun an theih lo thlo. 9Josef nih chun anmah tla thu ah mang a manh mi tla kha a theihkumza le an sinah, “Thlingthlâktu nan si, kan ram umzia zauhfiang ding hen hawng mi nan si,” a ti na.

10“Si rîlmâl lo pu,” ti hen an sâng. “Na to-aw tla hi fâng châwk ding hen kan hawng mi asi. 11Unau rual kan si, thlingthlâktu kan si lo pu, mi zumhkâi kan si,” an ti.

12Josef nih an sinah, “Si lai le a! Kan ram a siat a ṭhat zauh ding hen nan hawng mi ma kha a,” a ti na.

13Annih nih a sinah, “Pu, unau leinih kan si le, Kanaan ramah minung pakhat fa hep kan si, kan unau pakhat chu a thi le, a ngâksia chem mi chu kan pa sinah a um,” an ti.

14Josef nih a sâng le, “Ka sim mi hâwi taktê kha,” a ti. “Thlingthlâktu nan si chiammâm, 15hi hi kan nik na nâk asi lai, nan unau lakah a ngâksia chem mi nan hawngpi lo chun nan tlung kho rêng lai lo ti lalchem min sâl hen thu ka tiam asi. 16Nan lakah mi pakhat kal sele hawngpi seh. A dang tla vial chu nan thusim a dik leh diklo a fiang lânlo chu hinah tleih hen vêng nan si lai. Chu hâwi nan ti lo chun, lalchem nungnâk sâl hen thlingthlâktu nan si kan ti kho rêng na,” a ti na. 17Ni thum ding chu rêngin ah a khumh na.

18A ni thum ni ah Josef nih an sinah, “Kei chu Pathian ṭihtu kasi le, nan nungnâk hi a san kâng khat hen ka zuah lai. 19Mi dik nan si ti a fiangnâk ding chu minung pakhat rêngin ah khumh nan si lai le, midang vial chu nan dâwngsung le ṭâm le hâl rangah fâng nan châwk mi vûitun hi tlungpi u. 20Chun, nan unau lakah a ngâksia chem mi kha ka sinah nan hawng put ding asi. Chu lak chun thudik nan sim ti â theih lai le, kan thah na lai lo,” a ti na.

Chu chu rem an ti le, 21“Tuhin hi bang kan tuar mi tla hi kan nau tlûnah kan thilti diklo tla kan lakah a hawng tlung mi asi hi, anih nih a lawksawng liauah hawng kan ngiar ṭualmâl liau khawm ah ngaih-lo-lêm kan thlâk piak thlo. Churuang tak ma hi tuah nawknâk leh lawksawngnâk kan tawng mi hi,” ti hen anna ruah.

22Reuben nih, “Kan nau rangah nganfâk pêk lo ding kan ti na mi nan ngâilo mi chu. A thihnâk lehrûl chu kan tlûnah a tlâ rawh ma hi,” a ti. 23An thusim tla chu Josef nih a theih ko, sikhawmsele hawlh lehtu mang hen a sinah thu an sim ruangah an unaupa nih theihlo ding hen an ruat. 24Josef nih a kaltâk na le, a va ṭap. Hawlh kho ding hen â ruat rawh chun, an sinah a hawng nawlh le, Simeon chu a tleih le, an mâika ah rêng a khimh.

Josef Unau tla chu Kanaan Ram

Leiah An Tlung Rawh

25Chun, Josef nih thu a pêk na le, a unau tla vûitun lakah fâng râwn piak seng na hen an tangka khawm an vûitun chiauah râwn piak na ding hen, an lampi ah ei zareh khawm pêk na ding a ti na. Chu hâwi hen an ti rawh. 26Chun, annih nih chun an fâng chu an sanatung tla an phurhtir na le, an kal rawh. 27Zân ah an riaknâk ah minung pakhat nih a sanatung râwl pêk ding hen a vûitun a sût le, vûitun ah mi fâng tlûnah tangka a muh. 28“Ka tangka hawng ka khirh ving hi,” ti hen a unau tla a simh na. “Hi ka vûitun lakah hin hi!” a ti le, an thinlung chu veikhat ko ah a lâu khit le, “Pathian nih hi hâwi hen hawng kan ti aw?” ti hen lâu bû hen anna sâwn.

29Kanaan ram ah an pa Jakob sinah an va tlung rawh chun, an lakah thil a tlung mi zawzawng an simh: 30“Aigupta ram mi governor nih chun kan lakah thungâi a thin a hê le, an ram thlingthlâktu ah hawng kan puh. 31‘Thlingthlâktu kan silo, mi zumhkâi kan si,̕ ti hen kan sâng. 32‘Unau leinih kan si, minung pakhat fa hep kan si. Kan nau pakhat a thi, a ngâksia chem mi chu Kanaan ram ah kan pa sinah a um,̕ kan ti. 33Chu minung nih a hawng kan sâng le, ‘Hi hi mi zumhkâi si le silo theihnâk asi lai: nan lakah mi pakhat chu ka sinah a um ding asi; a dang vial nih fâng hi nan dâwngsungkhur rangah phurh ule, tlung u. 34Nan unau lakah a ngâksia chem mi ka sinah hawng put ule, chu tikah thlingthlâktu nan silo mi leh mi dik nan si zia ka theih kho lai. Nan nau kan pêk nawlh na lai le, hi ram ah nan um lai le, saw nan leh lai,̕ ” a hawng kan ti.

35Chun, an vûitun chu an bungh le, mikip nih an vûitun lakah tangka an tawng; chu tangka chu an muh rawh chun an pa Jakob hen thungâi an lâu. 36An pa nih an sinah, “Fa lo hen siah ding nan ka awt mu? Josef tâ nih a vei rawh, Simeon khawm a um lo rawh, tuah Benjamin lâk ding nan awt fâwn; tuar marua rerêng kasi ko,” a ti.

37Reuben nih a pa sinah, “Benjamin na sinah ka hawng kîrpi lo bâk chun, ka fapa panih na thah kho lai, keimah kut lakah ap le, ka hawng kîrpi nawlh ngelchel lai,” a ti.

38Sikhawmsele, Jakob nih, “Ka fapa lam chu nan kalpi kho ding asi lo, a upa tâ nih a thi rawh, amah tê lâwng a dam mi, lampi ah tawnglo ai tawng kho. Kei tâ nih ka tar rawh, lawksawng hen nan hawng ka thah awt,” a ti.

Currently Selected:

GENESIS 42: BCLBV

Highlight

Copy