GENESIS 37

Josef leh a Unau Tla

1Jakob chu a pa umnâk Kanaan ram ah a um vima le, 2hi bang tla hi Jakob dâwngsung thâwngthâng asi:

Josef chu kum leisarih asi ah a û le hen, dawrâ leh kêl an zauhkhenh, chu a unau tla chu a pa nupisûn Zilpah leh Bilhah nih an ring mi fa tla an si. Josef nih a unau tla thâwngthâng chu a pa sinah a sia leikâng hen a sim.

3Jakob nih Josef chu a tar nûnah a nei mi asi ruangah a dang zawng ngâk hen a dâwt khun. Amah rangah kawrfual ṭialh mi a siam piak. 4A unau tla nih Josef chu anmah tla ngâk hen a dâwt mi an theih le, an unaupa chu an hua rawh; kawmh hen thuruatpi ding khawm an duh lo.

5Zân khat chu Josef nih mang a nei le, a mang thu chu a unau tla a simh na le, a lân ngâk hen an hua dauh. 6Hi hâwi hen a sim, “Ka mang manh thu hi ngâinik u. 7Kan ektê hen fâng kan têl le, phâisen ah kan um hep, ka fângtêl chu a hawng a tung le, a dîr dan. Nan fângtêl nih a kulh dak le, mâi an mûk chiau,” a ti.

8A unau tla nih, “Kan tlûnah lal siding na ruat mu?” an ti. Mang a nei mi leh a thusim ruangah an hua khun rawh.

9Josef nih mang dang a nei nawlh le, a unau tla sinah, “Mang dang ka nei fâwn, chu lak chun nî, thlâ leh ârfi leikhat tla nih an hawng ka mâimûk mi ka muh,” a ti.

10A pa rangah a mang chu a simh le, a pa nih a fâi le, “Chubang chu zei mang mesi? Na nu leh na unau leh kei nih a nan mâimûk ding hen ma na ruat?” a ti. 11Josef chu a unau tla nih thungâi an nahsuah le, a pa lam nih chun zei zia me asi aw ti hen a thinlung ah a kil ziar.

Josef chu Zuar hen a Um le, Aigupta

Ram ah an Kalpi rawh

12Ni khat chu Josef unau tla chu Sekem ah an pa ranrual vêng ding hen an kal. 13Chun, Jakob nih Josef sinah, ‘Sekem ah na unau le nih ranrual an vêngnâk ah va kal le, ka nan duh’ a ti.

Josef nih “Ka tîm ko,” ti hen a sâng.

14A pa nih a sinah, “Na unau leh an dam mawh, ranrual tla an him ma va zauh le, hawng kîr nawlh le hawng ka simh,” a ti. Hebron Vakuam thawk hen a pa nih a fial rawh. Josef chu Sekem a va tleng le, 15chu ram ah chun a vâi le, minung pakhat nih a muh le, a sinah, “Zei me na hâwl?” a ti.

16“Ka unau tla an ranrual an vêng mi ka hâwl na mi,” a ti. “Zeiah an um na hawng ka simh kho lai ma?” ti hen a deih.

17Chu minung nih chun, “An kal ving rawh. Dothan ah an kal ti ka theih,” a ti. Churawhchun, Josef chu a unau le dung leiah a kal bâk le, Dothan ah a va muh na rawh.

18A râltlâng hen an muh le, anmah mun a tlung lânah, thah ding hen anna thluk. 19“Mangnei pa a hawng khi, 20tuah hawng ule, kan thah lai le, a ruak chu tikhurchawh a kang mi lakah kan lawnh ving lai; ramsa nih a thah kan ti khonâk ding hen, chu tikah a mang zei hâwi asi rêng kan theih kho lai,” an ti.

21Reuben nih a theih le, Josef chu sanh a tum. “Thah ding asi loh,” a ti. 22Hi ramkaro ah hi tikhurchawh a kang mi lakah kan lawnh lai le, nganfâk chu pêk lah u,” a ti. Hi hi amah chu ruangsuah hen a pa sinah kîrtir nawlh ding a tum mi asi. 23Josef chu a unau tla sinah a va tlung rawh chun, a kawrdawh fual ṭialh mi chu an thlêk piak dip. 24An tlêih le, tikhurchawh a kang mi lakah an thlâk rawh.

25Buh an ei liau chirah, Ismael murui, Gilead ram thawk hen Aigupta ram ah kal ding mi an muh sawm. An sangâwngsâu tla chu rimthâw leh thing thlîng turpâng an phurhtir na. 26Juda nih a unau tla sinah, “Kan unau kan thah hen pheh zei me kan rangah dingchangnâk a um lai? 27Ismael tla sinah lam zuar ving ding hi. Churawhchun, nganfâk khawm kan pêk lai lo le, kan unaupa khawm asi, kan taksa leh kan thisen khawm asi,” a ti. A unau dang tla nih rem an ti. 28Chun Midian mi sâwlehtu an hawng le, Josef chu tikhurchawh lakah mi an suah le, tangka kul hen Aigupta ram ah kal ding mi Ismael tla sinah an zuar rawh.

29Reuben chu tikhurchawh leiah a va kîr le, Josef chu a muh lo rawh, a lung a fâk tuk le, a nipuan a thlêk. 30A unau tla sinah a va kal le, “Kan nau chu a umlo rawh! Zeitin ka ti lai rawh?” a ti.

31Churawhchun, kêl an thah le, Josef kawrdawh chu kêl thî lakah an nîm. 32Kawrdawh chu an pa sinah an kalpi le, “Hi hi kan tawng le, na fapa Josef kawrdawh ma si?” an ti.

33An pa nih kawrdawh chu fiang tak hen a theih le, “Mah ma hi, amah kawrdawh tatak ma hi! Ramsa nih ka fapa Josef chu a thah le, a sâm dip asi lai ma hi!” a ti. 34Jakob chu a lung a fâk tuktarâi le, a puan a thlêk le, salâ â aih. Sâwt tak hen a fapa chu a ulh. 35A fapa leh a fanu tla chu thlangamh ding hen an hawng le, khawmsele an thlangamh kho lo. “Ka fapa zûnphurh lungfâk bû hen thlân mual ah ka liam awt,” a ti. A fapa Josef zûn chu a phurh vima.

36Chu liau chun, Aigupta ram ah Midian tla nih Josef chu Potiphar, lal milian pakhat, a mun vêngtu lian chem sinah an zuar rawh.

Currently Selected:

GENESIS 37: BCLBV

Highlight

Copy