GENESIS 17

Fêmtan chu Thudântuk

Singsiahnâk Asi

1Abram chu kum sâwmkua leh kum kua asi liauah LALPA chu a sinah â langh le, “Kei Pathian zeizawng tikho kasi. Ka thu ngâi le, thil dik ti kumza rawh. 2Na sinah thudân ka tuk lai le, thlâk tam tak ka nan pêk lai,” a ti. 3Abram chu tual tawngh khet hen a kûn; chun, 4Pathian nih, “Na sinah hi thudân hi ka tuk asi: Phun tam tak thlâktu siding hen ka nan tiamh. 5Na min chu Abram asi lai lo rawh, Abraham#17.5 ABRAHAM: Hebrai ah min umzia chu ‘Phun tam tak thlâktu’ tinâk asi. asi lai rawh, phun tam tak thlâktu ah ka nan siam rawh ruangah. 6Thlâk tam tak ka nan pêk lai le, an lakah zeimaw mi chu lalchem an si lai. Thlâk tam tak na nei lai le, phun tla an hawng si lai.

7“Zungzâl thudântuk hâwi hen na sinah leh na thlâk tla hi nûnah um ding mi sinah ka thutiam chu ka theihkumza lai. Na Pathian kasi lai le, na thlâk tla Pathian khawm kasi lai. 8Hi mun, ram dang mi hâwi a nan umnâk hi na sinah leh na thlâk tla sinah ka pêk lai. Kanaan ram zawzawng hi na thlâk le tla tâ asi kumza lai le, Kei chu an Pathian kasi lai,” a ti.

9Pathian nih Abraham sinah, “Nang leh na thlâk tla mâilei ah um ding mi tla nih ka thudântuk chu nan zûl vevê ding asi. 10Nang leh na thlâk tla nih nan lakah mipa fa fêmtan ding chu rem nan ti hep ding asi. 11-12Tu thawk hen mipa fa zawng chu ni riat ni ah, sal nan in ah a suak mi leh ram dang thawk hen nan châwk mi khawm an fêm nan tan khap na ding asi. Hi hi nannih leh keimah karah thudântuk asi ti theihnâk ah asi. 13Mi kip fêmtan an siding asi. Chu chu taksa leikâng thu ah zungzâl nan sinah thudântuk asi lai. 14Mipa fa fêmtan lo mi chu ka minung si lo mi ah ngaih asi lai. Ka thudântuk a zûl lo ruangah”, a ti.

15Pathian nih Abraham sinah, “Na nupi khawm tu thawk hen Sarai asi lai lo rawh le, a min ah Sari#17.15 SARI: Hebrai ah hi min umzia chu ‘’lalnu’’ tinâk asi. asi lai rawh. 16Amah chu mal ka sâwm lai le, amah thawk hen fapa ka nan pêk lai. Amah chu mal ka sâwm lai le, phun tla nu a hawng si lai, a thlâk tla lakah lalchem tla an hawng um lai,” a ti.

17Abraham chu a mêl tual tawngh khet hen a kûn le, a dawn dudup le, a nih a suak, “Mi kum zâ a tling nûnah fa nei kho asi awt ma le? Sari hi kum sâwmkua asi mi nih fa a nei kho awt ma?” a ti.

18Abraham nih, “Zei ruangah Ismael chu ka rotingtu asi awtlo zia?” ti hen Pathian a deih.

19Sikhawmsele, Pathian nih, “Silo. Na nupi Sari nih fapa a nan ring piak lai le, a min ah Isak#17.19 ISAK: Hebrai ah hi min umzia chu ‘A ni’ tinâk asi. na sak lai. A sinah leh a thlâk tla sinah thudân ka tuk mi chu ka theihkumza lai. Chu chu zungzâl thudântuk asi. 20Ismael thu ah na deihnâk khawm ka theih, churuang chun amah khawm mal ka sâwm lai le, fa tam tak leh thlâk tam tak ka pêk lai. Lal leinih pa ah ka siam lai le, a thlâk tla chu phun rokual tak ah ka siam lai. 21Sikhawmsele, na fapa Isak sinah thudân ka tuk mi chu ka theihkumza lai le, kumvei ah tu tik ding ah Sari nih a ring ding mi chu,” a ti. 22Pathian nih Abraham chu a sawnh dih rawh chun a kaltâk rawh.

23Chu ni lîlâ ah chun Abraham nih Pathian thu zûl hen, a fapa Ismael leh a insung khurah mipa dang zawzawng a insung khur ah sal a suak mi leh a châwk mi chu an fêm a tan piak na rawh. 24Abraham chu fêmtan asi liauah chun kum sâwmkua leh kum kua mi asi. 25A fapa Ismael lam chu kum leithum mi asi. 26An panih hen chu ni ah an fêm an tan le, 27Abraham sal tla zawzawng khawm.

Currently Selected:

GENESIS 17: BCLBV

Highlight

Copy