EXODUS 6

1LALPA nih Mosi sinah, “Tuah lalchem sinah thil ka ti ding mi chu na muh lai. Ka mi le tla suaktir ngelchel ding hen ka nâwr awt. A ram ah mi chu ka nartir ngelchel awt,” a ti.

Pathian Nih Mosi A Kawh

2Pathian nih Mosi sinah, “Kei LALPA kasi; 3Abraham, Isak leh Jakob sinah Pathian zeizawng tikho si hen ka langh le, sikhawmsele, LALPA keimah min hen thenhlimh tak hen chun an sinah ka theihtir lo. 4Ramdang mi tla hâwi hen an umnâk Kanaan ram pêk ding mi lak khawm ah an sinah thudântuknâk ka siam. 5Tuah Israel rûm leh âinâk ka theih le, Aigupta mi nih sal ah an siam na mi khawm, ka thutiam khawm ka theihkumza. 6Churuangah Israel fa tla chu ‘Kei, LALPA nih ruang ka suah na ding mi leh Aigupta sal an sinâk lakah mi ka suah na awt mi chu simh na. An tlûnah rêpnâk ṭihnungkâi tak hawng tlung ding hen ka bân chak ka phar lai le, ruang ka suah na lai. 7Ka minung ah kan siam na lai le, Kei nan Pathian kasi lai. Aigupta sal nan si mi ka nan suah na tikah chun, Kei, LALPA nan Pathian kasi mi nan ka theih lai rawh. 8Abraham, Isak leh Jakob sinah ka tiamh thlir mi ram ah ka nan kalpi na lai le; Kei, LALPA nih nanmah tâ si rawh ding hen ka nan pêk na lai,” a ti. 9Mosi nih Israel tla chu chu thu a va simh na le, sikhawmsele, sal rêpnâk an tuar mi ruangah an thinlung â râwk le, an ngâilo.

10Churawhchun, LALPA nih Mosi sinah, 11Aigupta lalchem sinah va kal le, a ram ah mi Israel tla suaktir na ding hen simh,” a ti.

12Sikhawmsele, Mosi nih a sâng le, “Israel tla men ka thu an ngâi duh lo mi, zeitin lalchem nih a ngâi duh lai? Thusimtu nau tak kasi mi,” a ti.

13LALPA nih Mosi leh Aron chu thu a pêk na le, “Israel mi tla leh Aigupta lalchem chu nanmah hi Aigupta ram ah mi Israel tla suakpitu ding ah ruat nan si mi hi simh na u,” a ti.

Mosi Leh Aron

Dâwngsung Singsiahnâk

14Reuben, Jakob fapa tîr nih fapa pali a nei: Hanok, Pallu, Hezron, leh Karmi; anmah phun thlâktu tla min an put mi tla chu an si. 15Simeon nih fapa paruk a nei: Jemuel, Jamin, Ohad, Jakin, Zohar leh Kanaan nunau fapa Shaul; chu tla chu an thlâktu min puttu tla chu an si. 16Levi nih fapa pathum a nei: Gerson, Kohat leh Merari; chu tla chu an thlâktu tla min puttu tla an si. Levi chu kum 137 ding upa hen a dam. 17Gerson nih fapa panih a nei: Libni leh Simei; chun thlâk tam tak an nei; 18Kohat nih fapa pali a nei: Amram, Izhar, Hebron leh Uziel. Kohat chu kum 133 tluk upa hen a dam. 19Merari nih fapa panih a nei: Mahli leh Mushi, hi tla hi Levi phun leh an thlâk tla chu an si.

20Amram nih a pa farnu Jokebed a umpi le, Mosi leh Aron ringtu asi. Amram chu kum 137 ding upa hen a dam asi. 21Izhar nih fapa pathum a nei: Korah, Nepheg leh Zikri, 22Uziel nih fapa pathum a nei: Misael, Elzaphan leh Sithri tla an si.

23Aron nih Eliseba a umpi le, Aminadab fanu Nason farnu; anih nih Nadab, Abihu, Eleazar leh Ithamar a ring na. 24Korah nih fapa pathum a nei: Asir, Elkanah leh Abiasap; chu chu Korah phun thlâktu tla anna ṭhêk mi tla chu an si. 25Eleazar Aron fapa nih Putiel fanu a umpi le, Phinehas a ring. Levi chi thlâktu tla lukhâi dauh an si.

26Aron leh Mosi chu LALPA nih, “Israel phun Aigupta ram ah mi suakpi na u,” a ti na mi chu an si. 27Chu tla chu Aigupta lalchem rangah Israel mi tla suaktir na titu tla chu an si.

Aron Leh Mosi Sinah LALPA Thupêk

28LALPA nih Aigupta ram ah Mosi sinah thu a sim liauah, 29“Kei, LALPA chu kasi, ka nan simh mi zawzawng hi Aigupta lalchem sinah va sim,” a ti.

30Sikhawmsele, Mosi nih a sâng le, “Thusimtu nâu tak kasi ti na theih, zeitin lalchem nih ka thu a ngâi lai?” a ti.

Currently Selected:

EXODUS 6: BCLBV

Highlight

Copy