Iyohaichish 119
119
119. Iyohaichish.
Arep.
1OUPEKA no ruhu otta okai,
Ehoba koro tuitak otta apkash utara anak ne anunuke ne.
2Shinuma koro ekambaktep shikkashima wa
Keutum ebitta ani Shinuma hunara utara anak ne anunuke ne ruwe ne.
3Ruwe un, nei utara anak ne oheugep shomo ikichi wa okai,
Shinuma kon ruhu otta apkash ruwe ne na.
4Chi utara shiarikiki no shikkashima kuni ne,
Aokai anak ne ipawetenge sange wa un kashpaotte nisa ruwe ne.
5Aa, E koro ekambakbe ashikkashimare kuni ne
E kon ruhu aashte wa an humi!
6Kuani anak ne obitta no okai E koro ikashpaotte eyaikoshiramshuiba yak anak ne,
Shomo ku yainikoroshma kusu ne na.
7Kuani anak ne E koro oupeka esanniyo-hi eyaihannokkara ita,
Oupeka keutum ani E koyaiiraige ash kusu ne na.
8Kuani E koro ekambakbe shikkashima kusu ne:
Aa, iteki ara en emaka wa en kore.
Bet.
9Peure ainu anak ne hemanda ani kon ruhu ashkannere kusu ne ruwe he an?
E koro itak an korachi koyairamatte ani aki kusu ne na.
10Kuani ramu-osshi wano E hunara ash nisa:
Neum poka, E koro ikashpaotte iteki ku ehaita kuni ne kara wa en kore.
11Kuani ika E epeka no wen-be ku ki kuni ne,
E koro itak ku keutum ta eumashnu wa an na.
12Aa Ehoba, Aokai anak ne anunuke ne:
E koro ekambakbe en epakashnu wa en kore.
13Kuani ku paro ani obitta no okai
E paro orowa no san aesanniyop assuru ashte ruwe ne.
14Obitta no okai aeoteknup ku enupetne korachi,
Kuani E koro ipawetenge oma ru enupetne nisa ruwe ne.
15Kuani E koro ipawetenge ku ramepakari,
Aige, E kon ruhu koyairamatte kusu ne na.
16Kuani yaikota E koro san irenga eyainupetnere kusu ne:
Samata, E koro itak shomo ku oira kusu ne na.
Gimeru.
17A en shiknure kuni ne, E koro uitek guru pirikare wa en kore;
Yakun, E koro itak ku shikkashima kusu he na.
18E koro tuitak ta okai iyokunnure ambe ku nukara kuni ne,
Ku goro shiki maka wa en kore.
19Moshiri kata payekai guru ku ne:
En otta iteki E koro ikashpaotte nuina wa en kore.
20Ramma E koro aesanniyop eyaikatekara gusu
Ku ramat anak ne pereke ruwe ne.
21E koro ikashpaotte otereke
Aiyoitakushi pakesara utara Aokai anak ne kopa-shirota nisa ruwe ne.
22Yainikoroshma ambe newa iyesapse-i en orowa no oyakta ande wa en kore;
E koro ekambakbe ku shikkashina nisa ruwe ne gusu ne na.
23Moshiri esapane utara rok wa en ohaigekara,
Awa, E koro uitek guru anak ne E koro ipawetenge ramepakari nisa ruwe ne na.
24E koro ekambakbe ne yakka ku enupetnep ne,
Nei ambe anak ne tura no ku ukoramkorohe ne ruwe ne na.
Daret.
25Ku ramat anak ne koponchi kotuk:
E koro itak an korachi en shiknure wa en kore.
26Kuani anak ne ku apkash ru sarare, aige, Aokai en ko-ese itak nisa;
Nekon ka newa, E koro ekambakbe en epakashnu wa en kore.
27E koro ipawetenge ruhu en eramande wa en kore:
Yakun, E koro aiyokunnure ikip ku ramepakari kusu ne na.
28Ku ramat shingi wa nin ruwe ne:
E koro itak an korachi en tumashnure wa en kore.
29En orowa no shungep oyakta ande wa,
Pirika irenga sange hine E koro tuitak en kore.
30Kuani anak ne son no an ruhu ku numge nisa:
E koro aesanniyo-hi en kotchaketa ku ande okere na.
31Kuani E koro ipawetenge shikkashima:
Aa Ehoba, nekon ka newa, iteki en yainikoroshmare wa en kore.
32E koro ikashpaotte oma ruhu otta ku hoyupu kusu ne,
Nei i orota Aokai ku goro sambe porore kusu ne na.
He.
33Aa Ehoba, E koro ekambakbe oma ruhu en epakashnu wa en kore;
Yakun, okese pakno nei ambe ku shikkashima kusu ne na.
34En wayashnure wa en kore, yakun, E koro tuitak ku shikkashima kusu ne;
Ruwe newa ramu-osshi wano nei ambe ku shikkashima ruwe ne kusu ne na
35E koro ikashpaotte oma ru otta en apkashte wa en kore;
Inambe gusu ne yakun, nei ambe ku enupetne ruwe ne gusu ne na.
36E koro ipawetenge orun ku keutum epekare wa,
Shomo yaikoshipuinere-hi otta hosari kuni ne kara wa en kore.
37Ku shikihi anak ne raka-isambe shomo nukara kuni ne kara wa en kore,
Orowa, E kon ruhu otta en shiknure wa en kore.
38E koishitoma wa an E koro uitek guru gusu E koro itak ashte wa en kore.
39Ku koishitoma yainikoroshma ambe en haitare wa en kore;
E koro aesanniyo ambe pirika ruwe ne gusu ne na.
40Ingarʼan, E koro ipawetenge ku eyaikatekara nisa;
E koro oupeka ambe gusu en shiknure wa en kore.
Wau.
41Aa Ehoba, en erampokiwen ne yakka ki wa en kore,
E koro itak an korachi en kashiobiuki poka ki wa en kore.
42Yak anak ne en wenkurashpa guru otta ese itak ku ki kusu ne;
E korʼitak ku eyaikopashte ruwe ne gusu ne na.
43Samata, E korʼitak ku paro wano iteki ara etaye wa en kore;
E koro aisanniyo-hi ku echipachipa ruwe ne gusu ne na.
44Nei no nei chiki, ramma kane otusashuishiri pakno
E koro tuitak ku shikkashima kusu ne na.
45Orowa, ku rengaine ku apkash kusu ne;
E koro ipawetenge ku hunara nisa ruwe ne gusu ne na.
46Orowa shui, Moshiri esapane utara kotchaketa E koro ekambakbe gusu ku ye,
Aige, shomo ku yainikoroshma kusu ne.
47Orowa, ku omap,
Gusu eyainupetnere ikashpaotte enupetne kusu ne.
48Ku omap E koro ikashpaotte orun ku tekehe ne yakka ku yange kusu ne;
Orowa, E koro ekambakbe eyaikoshiramshuiba ku ki kusu ne na.
Sain.
49Gusu chipachipa kuni ne kara
E koro uitek guru orun asange itak eshkarun wa en kore.
50Tambe anak ne ku yairamkoiki ita an en omaoma ambe ne:
E koro itak en shiknure nisa ruwe ne gusu ne na.
51Pakesara utara anak ne poron no en esapse nisa:
Yakka E tuitak shomo ku otereke nisa ruwe ne.
52Aa Ehoba, E koro fushko ne okai aesanniyo-hi ku eshkarun nisa,
Aige, ku yaiomaoma nisa ruwe ne.
53E koro tuitak emaka wen utara gusu
Kuani shiri kinrakara ruwe ne.
54Ku payekai chisei
E koro ekambakbe ku shinotcha ki nisa ruwe ne.
55Aa Ehoba, ʼanchikara ta E reihei ku eshkarun,
Aige, E koro tuitak ku shikkashima nisa ruwe ne.
56E koro ipawetenge ku shikkashima nisa ruwe ne wa gusu,
Tap okaibe ku kon ruwe ne na.
Chet.
57Ehoba anak ne ku korobe ne:
E koro itak ku shikkashima kusu ne sekoro ku ye nisa ruwe ne.
58Ramu-osshi wano E koro irenga ku koramkon nisa:
E koro itak an korachi pirika irenga sange wa en kore.
59Kuani ku apkash ruhu ku yainu nisa,
Aige, E koro ekambakbe orun ku chikiri hosarire nisa ruwe ne.
60Kuani E koro ikashpaotte shikkashima kuni ne,
Untere shomoki no yaikimatekka nisa ruwe ne.
61Wen utara koro tush en kokarase,
Koroka, E koro tuitak shomo ku oira nisa ruwe ne.
62E ki oupeka aesanniyo-hi gusu:
Kuani an noshiketa ku hopuni wa e koyaiiraige ash kusu ne na?
63E koishitoma obitta no okai utara newa,.
E koro ipawetenge shikkashima utara utarasam ku ne ruwe ne.
64Aa Ehoba, moshiri anak ne E koro rampoken ani eshik ruwe ne.
E koro ekambakbe en epakashnu wa en kore.
Tet.
65Aa Ehoba, E koro itak an korachi,
Aokai anak ne E koro uitek guru orun pirika irenga sange nisa ruwe ne.
66Okaibe pirika no en esanniyore wa en eramande wa en kore;
E koro ikashpaotte Aokai en eishokore nisa ruwe ne gusu ne na.
67A en shirikirapte etokota kuani ru turainu nisa;
Koroka, tane anak ne E koro itak ku shikkashima ruwe ne.
68Aokai anak ne pirika wa, pirikap ki ruwe ne.
E koro ekambakbe en epakashnu wa en koi e.
69Pakesara utara anak ne en epeka no shunge oshke nisa:
Ramu-osshi wano e koro ipawetenge ku shikkashima kusu ne na.
70Nei utara koro keutum anak ne shum korachi mimush;
Koroka, kuani anak ne e koro tuitak enupetne kusu ne na.
71Ani a en shirikirap ambe anak ne kuani gusu pirika ruwe ne;
Nei ambe anak E koro ekambakbe ku eyaihannokkara kuni gusu an ambe ne na.
72E paro sange tuitak anak ne kuani gusu
Shiri inne kongani newa shirokani kasu no pirika ruwe ne na.
Yod.
73E koro tekehe en kara wa en ashte nisa:
E koro ikashpaotte ku eyaihannokkara kuni ne oramush keutum en kore.
74E koishitoma utara anak ne en nukara wa yaikopuntek kusu ne;
E koro itak gusu ku chipachipa nisa ruwe ne gusu ne na.
75Aa Ehoba, E koro aesanniyo-hi anak ne oupekap ne sekoro ku eraman,
76Nekon ka newa, E koro uitek guru orun san E korʼitak nei no,
Omap-an-ramuhauge kore hine en omaoma wa en kore.
77A en shiknure kuni ne ramuhauge wa en erampokiwen wa en kore:
E koro tuitak ku enupetne ruwe ne gusu ne na.
78Pakesara utara yainikoroshmare wa en kore, nei utara shunge wa en hokushte nisa ruwe ne gusu ne na.
Kuani anak ne E koro ipawetenge ku ramepakari kusu ne.
79E koishitoma utara en orun hosarire,
Yakun, E koro ekambakbe eraman ruwe ne kusu ne na.
80Shomo ku yainikoroshma kuni ne,
E koro ekambakbe orun ku keutum eramushinnere wa en kore.
Kap.
81E koro kashiobiuki-hi ku kon rusui wa ku ramurai ruwe ne:
E koro itak ku chipachipa ruwe ne.
82Hembara Aokai anak ne en omaoma kusu ne ya? sekoro ku ye rapoketa,
E koro itak gusu ku shikihi nin ruwe ne.
83Kuani anak ne shupuya ta an kapu-pukuru nei no ku an;
Yakka, E koro ekambakbe shomo ku oira ruwe ne.
84E koro uitek guru toho hembakbe an a?
Hembara Aokai anak ne en epokba utara esanniyo wa panakte ruwe he an?
85Kuani gusu pakesara utara shui ohori nisa,
Nei utara anak ne E ki tuitak nei no shomo ki utara ne ruwe ne.
86Obitta no okai E koro ikashpaotte anak ne son no ambe ne:
Nei utara shunge wa en epokba ruwe ne; nekon a poka en kaohiuki wa en kore.
87Naanihungo nei utara moshiri ka wa en isamka;
Koroka, kuani E koro ipawetenge shomo ku emaka nisa ruwe ne.
88E koro omap-an-ramuhauge-hi an korachi en shiknure wa en kore;
Yak anak ne E paro sange ipawetenge ku shikka-shima kusu ne na.
Ramed.
89Aa Ehoba, otusashuishiri pakno,
E koro itak kando otta aashte wa an na.
90E koro sonep anak ne otusashuishiri pakno okai ainu ikiri otta an:
Aokai anak ne moshiri ashte, aige, an ruwe ne.
91E esanniyop korachi tanto ne yakka nei ambe okai;
Obitta no okaibe E koro uitek guru korobe ne ruwe ne gusu ne na.
92Kuani anak ne E koro tuitak shomo enupetne yak anak ne,
Yairamhekomo wa ku isam kusu ne na.
93Samma pakno E koro ipawetenge shomo ku oira kusu ne;
Nei ambe ani aokai anak ne en shiknure nisa ruwe ne gusu ne na.
94Kuani anak ne E korobe ne, en kaobiuki wa en kore;
E koro ipawetenge ku hunara nisa ruwe ne gusu ne na.
95En isamka kuni ne wen utara anak ne en ehuye nisa;
Aine, kuani anak ne E koro ekambakbe ramepakari kusu ne na.
96Obitta no okai aeramushinne ambe okese-i ku nukan nisa;
E koro ikashpaotte shi no sap ruwe ne na.
Mem.
97Aa E koro tuitak ku omap humi!
Tokap ebitta nei ambe ku ramepakari ruwe ne.
98E koro ikashpaotte anak ne en epokba utara kasu no en wayashnure nisa ruwe ne,
Ramma nei ambe en otta an ruwe ne na.
99Obitta no okai en epakashnu utara kasu no ku wayashnu ruwe ne;
E koro ipawetenge ku ramepakari ruwe ne gusu ne na.
100Pa poro utara kasu no ku oramush ruwe ne,
E koro ipawetenge ku shikkashima ilisa ruwe ne gusu ne na.
101E koro tuitak ku shikkashima kuni ne,
Obitta no okai wen ruhu otta shomo ku chikiri ku apkashte nisa ruwe ne na.
102E koro aesanniyo-hi shomo ku eshishi;
Aokai en epakashnu nisa ruwe ne gusu ne na.
103Ku parumbe gusu E koro itak hemanda shisak humi!
Ku paro otta soyai ninge kasu no ne.
104E koro ipawetenge ankushkerai ku wayashnu ne:
Tambe gusu obitta no okai wen-buri ku etunne ruwe ne na.
Nun.
105E koro itak anak ne ku chikiri gusu an ratchako ne,
Ku apkash ru gusu an pekere ne ruwe ne,
106E koro oupeka aesanniyo-hi ku shikkashima kusu ne sekoro,
Shiyuppa no ku ekambakte wa ramuoshitchiu nisa ruwe ne.
107Kuani poro no shirikirap wa an:
Aa Ehoba, E korʼitak an korachi en shiknure wa en kore.
108Aa Ehoba, nekon ka newa, ku paroho wano rengaine asange ayangep uk hemhem ki,
E koro aesanniyo-hi en epakashnu hemhem ki wa en kore.
109Ku ramat anak ne ramma kane ku teke ta an;
Yakka E koro tuitak shomo ku oira ruwe ne.
110Wen utara anak ne kuani gusu akbe yokore;
Yakka, E koro ipawetenge shomo ku ehaita ruwe ne na.
111Ramma pakno eikeshkorobe gusu E koro ipawetenge ku uina;
Nei ambe anak ne ku koro keutum nupetnere ruwe ne gusu ne na.
112E koro ekambakbe shikkashima kuni ne keutum ku atte,
Otusashuishiri pakno, ramma pakno poka nei no ku ki kusu ne na.
Samek.
113Tu keutum o guru ku etunne ruwe ne;
Koroka, E koro tuitak ku omap ruwe ne na.
114Aokai anak ne ku numne ushike ne, ku koro kikhumbe E ne:
E korʼitak gusu ku chipachipa ruwe ne.
115Ku goro Kamui ikashpaotte ku shikkashima eashkai kuni ne:
Wen-buri ikichi utara, en orowa no oyake un paye yan.
116Ku shiknu kuni gusu, E korʼitak an korachi en nitata wa en kore;
Orowa, ku chipachipa kuni ambe gusu iteki en yainikoroshmare wa en kore.
117En nitata wa en kore, yakun a en kashiobiuki kusu ne,
Aige, ramma kani E koro ekambakbe ku esanniyo kusu ne na.
118E koro ekambakbe ohaita obitta no okai utara
Aokai anak ne nanu isamka ruwe ne;
Nei utara koro shunge anak ne raka sakbe ne ruwe ne gusu ne na.
119Aokai anak ne moshiri kata an obitta no okai wen utara kani turu korachi isamka ruwe ne:
Tambe gusu E koro ekambakbe ku omap ruwe ne.
120E koishitoma gusu ku kam anak ne tusushke ruwe ne;
Orowa, E koro aesanniyo-hi gusu ku ishitoma ruwe ne.
Ain.
121Kuani anak ne esanniyo wa oupekap ki nisa:
En keshke utara gusu iteki en ande wa en kore.
122E koro uitek guru pirikare gusu koro iyuturu oma guru yaikara wa en kore:
Orowa, pakesara utara iteki en keshke kuni ne kara wa en kore.
123E koro kashiobiuki-hi gusu hemhem,
E koro oupeka itak gusu hemhem ku shikihi nin ruwe ne.
124E koro rampoken an korachi E koro uitek guru otta ki,
Orowa, E koro ekambakbe en epakashnu wa en kore.
125E koro uitek guru ku ne, oramush keutum en kore;
Yakun, E koro ekambakbe ku eraman ruwe ne kusu ne na
126Tane Ehoba monraige kuni paki ne;
Nei utara E koro tuitak raka sakte nisa ruwe ne.
127Tambe gusu, kongani kasu no, ruwe newa, pirika no aturu-sakte kongani kasu no,
E koro ikashpaotte ku omap ruwe ne.
128Tambe gusu nep ne yakka epeka no an obitta no okai E koro ipawetenge oupeka ambe ne sekoro ku esanniyo;
Orowa, nep okai wen-buri ne yakka ku etunne ruwe ne na.
Pe.
129E sange ipawetenge anak ne iyokunnurep ne;
Tambe gusu, ku ramat anak ne nei okaibe shikkashima ruwe ne.
130E koro itak sarare-i anak ne pekereka shiriki;
Wayasap utara wayashnure ruwe ne.
131Ku parakayashte wa tashmak-tashmak ku ki nisa;
E koro ikashpaotte ku eyaikatekara nisa ruwe ne gusu ne na.
132E kon reihei ko-omap utara orun Aokai ki nisa ruwe ne korachi,
En orun hosari hine pirika irenga sange wa en kore.
133Ku goro chikiri E korʼitak orun omande wa en kore;
Orowa nep irarape ne yakka iteki en esapanere kuni ne kara wa en kore.
134Ainu keshke-i orowa no en kikiraye wa en kore:
Yakun, E koro ipawetenge ku shikkashima kusu ne na.
135E koro uitek guru otta E nanuhu here atte wa en kore;
Orowa, E koro ekambakbe en epakashnu wa en kore.
136Nei utara E koro tuitak shikkashima shomoki ruwe ne gusu,
Ku shikihi pet korachi nupe yaikorange ruwe ne.
Tsade.
137Aa Ehoba, Aokai anak ne oupeka ne,
Esanniyo E ki chiki oupeka no E ki ruwe ne.
138Aokai shi no sonep ki wa
Oupeka no E koro ekambakbe kashpaotte nisa ruwe ne.
139En keshke utara E koro itak oira nisa ruwe ne gusu,
Seisek mau keutum ku koro wa ku yai-isamka ki ruwe ne.
140E koro itak anak ne shi no aturu-sakbe ne,
Tambe gusu E koro uitek guru nei ambe omap ruwe ne.
141Kuani anak ne ponbe ne wa aeankeshbe ne:
Yakka, E koro ipawetenge shomo ku oira ruwe ne.
142E koro oupeka-i anak ne otusashuishiri pakno an oupeka ambe ne,
Orowa, E koro tuitak anak ne sonep ne ruwe ne.
143Ku yairamhekomo wa yairamshitnere ruwe ne:
Yakka, E koro ikashpaotte ku enupetne ruwe ne na.
144E sange ipawetenge otusashuishiri pakno oupekap ne:
En wayashnure wa en kore, yakun ku shiknu kusu ne na.
Kop.
145Ramu-osshi wano E konishuk, awa, Aa Ehoba, ene orun ese wa en kore.
Kuani E koro ekambakbe ku shikkashima kusu ne na.
146E orun ku konishuk, awa, en kaobiuki wa en kore,
Yakun, E koro ekambakbe ku koitaknu kusu ne.
147Aro kunnei nisat ta hawe ku ashte nisa:
E koro itak gusu ku chipachipa nisa.
148E koro itak ku ramepakari kuni gusu,
Ku shikihi anak ne makke wa an ruwe ne.
149E koro omap an-ramuhauge-i sange wa ku hawe nu wa en kore:
Aa Ehoba, Aokai esanniyo-hi nei no en shiknure wa en kore.
150Wen-buri noshpa wa paye utara anak ne karange no araki korʼan;
E koro tuitak orowa no ehangeko no okai ruwe ne.
151Aa Ehoba, Aokai ehange no an;
Obitta no okai E koro ikashpaotte anak ne sonep ne ruwe ne.
152Aokai anak ne otusashuishiri pakno E koro ekambakbe ashte nisa ruwe ne sekoro,
Fushkotoi wano ku eraman ruwe ne na.
Resh.
153Ku yairamchuptek ambe esanniyo wa en kashiobiuki wa en kore;
E koro tuitak shomo ku oira ruwe ne gusu ne na.
154En gusu en shirine ye wa en kikiraye wa en kore:
E koro itak an korachi en shiknure wa en kore.
155Kashiobiuki ambe anak ne wen utara orowa no ehangeko no an ruwe ne;
Nei utara E koro ekambakbe shomo hunara ruwe ne gusu ne na.
156Aa Ehoba, E koro ramuhauge an rampoken anak ne poro ruwe ne:
E koro aesanniyo-hi nei no en shiknure wa en kore.
157En keshke utara newa en epokba utara anak ne inne ruwe ne;
Yakka E sange ipawetenge shomo ku ehaita ruwe ne.
158Kuani nei kokandama ki utara ku nukara wa yairamoknatara ruwe ne;
Nei utara E koro itak shomo shikkashima ruwe ne gusu ne na.
159Hemanda kuani E koro ipawetenge ko-omap ya esanniyo wa en kore;
Aa Ehoba, E koro omap-an-ramubauge-hi an korachi en shiknure wa en kore.
160E koro itak aesanniyo chiki sonep ne;
Orowa, pishno no okai E koro oupeka aesanniyo ambe anak ne otusashuishiri pakno an shiriki ruwe ne.
Shin.
161Ikkewe sakno moshiri esapane utara en keshke nisa;
Koroka, ku keutum anak ne E koro itak koishitoma wa an ruwe ne na.
162Poron no okaibe pa guru korachi,
E koro itak ku enupetne ruwe ne.
163Kuani anak ne shungep etunne wa kowen ruwe ne;
Aige, E koro tuitak ku omap shiriki.
164Shine to ta arawan-shuine E koiramye ash,
E koro oupeka aesanniyo ambe an ruwe ne gusu ne na.
165E koro tuitak ko-omap utara anak ne poro itomo irenga kon ruwe ne;
Aige, nei utara gusu ureepetchiu ika isam ruwe ne na.
166Aa Ehoba, E koro kashiobiuki-hi gusu ku chipachipa nisa;
Awa, E koro tuitak ku shikkashima nisa ruwe ne.
167Ku ramat anak ne E koro ekambakbe shikkashima nisa;
Orowa, shi no shiarikiki no nei ambe ko-omap nisa ruwe ne na.
168E koro ekambakbe newa ipawetenge ku shikkashima nisa;
Obitta no okai ku apkash-i E kotchaketa okai ruwe ne gusu ne na.
Tau.
169Aa Ehoba, ku ashte hawe E kotchaketa ek kuni ne kara wa en kore:
E koro itak an korachi en wayashnure wa en kore.
170Ku ki koramkoro itak E kotchaketa ek kuni ne kara wa en kore:
E koro itak an korachi en kashiobiuki wa en kore.
171Ku papush wano iramyep sangere wa en kore;
Aokai anak ne E koro ekambakbe en epakashnu ruwe ne gusu ne na.
172E koro itak gusu ku parumbe shinotcha kire wa en kore;
Obitta no okai E koro ikashpaotte oupekap ne ruwe ne gusu ne na.
173E koro tekehe en kaobiuki kuni gusu etokookire wa en kore;
E koro ipawetenge ku numge nisa ruwe ne gusu ne na.
174Aa Ehoba, E koro kashiobiuki-hi gusu ku eyaikatakara nisa;
Aige, E tuitak ku enupetne shiriki.
175Ku ramat shiknure, yakun E koiramye ash kusu ne;
Orowa, E koro aesanniyo ambe en kashiobiukire wa en kore.
176Bu turainu hitsuji nei no kuani ru turainu nisa ruwe ne; E koro uitek guru hunara wa en kore;
E koro ipawetenge shomo ku oira ruwe ne gusu ne na.
Currently Selected:
Iyohaichish 119: AINU
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society 1897, 2018
