Hakamlar 7

7–BOB

Gidoʻn Midiyonlarni yakson qiladi

1Yerubbaal, yaʼni Gidoʻn, jamiki lashkari bilan barvaqt turib, qarorgohini Xaroʻd bulogʻining boʻyida joylashtirdi. Midiyonlarning qarorgohi esa ulardan shimolda, Moʻre tepaligining#7:1 Moʻre tepaligi — Xaroʻd bulogʻidan qariyb 8 kilometr shimolda joylashgan. yonidagi vodiyda joylashgan edi.

2Egamiz Gidoʻnga dedi: “Sening lashkaring juda koʻp boʻlgani uchun Midiyonlarni qoʻllaringga berolmayman. Aks holda, Isroil xalqi, Meni ulugʻlamay, gʻalabaga oʻz kuchimiz bilan erishdik, deb oʻziga bino qoʻyadi. 3Dushmandan qoʻrqqanlarga ijozat ber, Gilad togʻini#7:3 Gilad togʻi — odatda “Gilad” deb Iordan daryosining sharqida joylashgan oʻlkaga aytiladi, lekin bu oyatda Yizril vodiysi yaqinidagi, Iordan daryosining gʻarbida joylashgan yerlar nazarda tutilgan. Ehtimol, bu oʻrinda “Gilad” Gilbova togʻining yana bir nomi sifatida ishlatilgan. tark etib, uylariga qaytib ketsinlar.” Shunday qilib, odamlarning yigirma ikki mingtasi qaytib ketib, oʻn mingtasi qoldi.

4Keyin Egamiz Gidoʻnga dedi: “Qolgan lashkar ham koʻplik qiladi. Ularni suv boʻyiga olib tush, u yerda senga ularni ajratib beraman. Men senga, bunisi sen bilan boradi deganim sen bilan boradi, bunisi esa sen bilan bormaydi deganim sen bilan bormaydi.”

5Gidoʻn lashkarni suv boʻyiga olib tushdi. Egamiz unga dedi: “Suvni itga oʻxshab, yalab ichganlarning hammasini bir tarafga, choʻkkalab ichganlarni esa boshqa tarafga turgʻizib qoʻy.” 6Suvni hovuchlab yalaganlarning soni uch yuzta edi. Lashkarning qolganlari esa choʻkkalab suvni ichgandi. 7Egamiz Gidoʻnga dedi: “Suvni yalab ichgan uch yuzta odam bilan sizlarni ozod qilib, Midiyonlarni qoʻllaringga beraman. Qolganlarni qoʻyib yubor, uylariga qaytib ketaverishsin.” 8Gidoʻn uch yuzta odamdan boshqa hammasini uylariga qaytarib yubordi. Ammo ketganlarning oziq–ovqatiyu burgʻularini olib qoldi.

Midiyonlarning qarorgohi pastda, vodiyda joylashgan edi.

9Oʻsha kuni kechasi Egamiz Gidoʻnga dedi: “Tur, qarorgohga hujum qil. Men uni sening qoʻlingga berdim. 10Agar qoʻrqayotgan boʻlsang, Purax degan xizmatkoringni olib, qarorgohga tush. 11Midiyonlarning gapini eshitgach, yurak yutib qarorgohga hujum qilasan.” Gidoʻn Purax ismli xizmatkorini olib pastga, yov qarorgohining etagiga tushdi. 12Midiyonlar, Omolek xalqi va sharqdagi koʻchmanchilar vodiyda chigirtkaday#7:12 chigirtka — 6:5 izohiga qarang. gʻijillab yotardi. Ularning tuyalari esa dengiz qirgʻogʻidagi qumday son–sanoqsiz edi. 13Gidoʻn yov qarorgohiga yetib borganda, bir odam oʻzining birodariga tushini aytib berayotganini eshitib qoldi. Oʻsha odam shunday hikoya qilayotgan edi:

— Men bir tush koʻrdim. Tushimda arpadan pishirilgan qandaydir bir non Midiyon qarorgohiga yumalab kelib, chodirga urilibdi. Chodir esa agʻdarilib tushibdi.

14— Bu aniq Isroil xalqidan boʻlgan Yoʻsh oʻgʻli Gidoʻnning qilichidir! — dedi birodari. — Xudo Midiyonlarni barcha lashkarlari bilan uning qoʻliga bergan ekan–da!

15Gidoʻn tush taʼbirini eshitgach, Xudoga sajda qildi. Orqaga — Isroil xalqining qarorgohiga qaytib: “Qani, ketdik! Egamiz Midiyon lashkarlarini qoʻlimizga berdi”, — dedi. 16Keyin uch yuzta odamni uch qismga boʻlib, har birining qoʻliga bittadan burgʻu va boʻsh koʻzadan berdi. Koʻzalarning ichida esa bittadan mashʼala bor edi. 17Gidoʻn lashkariga shunday dedi:

— Yov qarorgohiga yaqinlashganimda meni yaxshilab kuzatib turinglar. Men nima qilsam, sizlar ham shuni qilinglar. 18Qarorgohni oʻrab olinglar. Men yonimdagilar bilan burgʻu chalganimda, sizlar ham burgʻu chalib, ovozingiz boricha: “Egamiz va Gidoʻn uchun olgʻa!” deb baqiringlar.

19Yarim tunda, dushman qarorgohida soqchilar endi almashib boʻlgan paytda, Gidoʻn yonidagi yuzta odam bilan qarorgohga yaqinlashdi. Ular burgʻu chalib, qoʻllaridagi koʻzalarni charsillatib sindirdilar. 20Lashkarning qolgan ikki qismi ham burgʻu chalib, koʻzalarni sindirdi. Hammalari oʻng qoʻllarida burgʻu, chap qoʻllarida mashʼala ushlagancha: “Egamiz va Gidoʻn uchun olgʻa!” — deb qichqirdilar. 21Gidoʻn odamlarining har biri qarorgoh atrofidagi oʻz joyida turardi. Qarorgohdagilar esa sarosima ichida, baqirib qochishardi. 22Gidoʻnning uch yuzta odami burgʻu chalganda, dushman qarorgohidagi lashkarlar bir–birini oʻldira boshladilar. Bu Egamizning qudrati tufayli sodir boʻldi. Soʻng Midiyon lashkarlari Zariro tomon yugurib, to Bayt–Shittaxgacha, Tabbot yaqinidagi Ovil–Maxla shahrining#7:22 …Bayt–Shittax…Ovil–Maxla shahri… — bu shaharlar Iordan daryosining sharq tomonida joylashgan. chegarasigacha qochishdi. 23Shunda Gidoʻn Midiyonlarni taʼqib qilish uchun Naftali, Osher va Manashe qabilalarining odamlarini chaqirtirdi.

24U butun Efrayim qirlari boʻylab choparlar joʻnatib dedi: “Pastga tushib Midiyonlarga qarshi jang qilinglar. Iordan daryosining va Bayt–Borogacha boʻlgan barcha suv oqimlarining kechuv joylarini qoʻlga olib, Midiyonlarning oʻtishiga yoʻl qoʻymanglar.” Efrayim odamlarining hammasi toʻplanib, Iordan daryosining va Bayt–Borogacha boʻlgan barcha suv oqimlarining kechuv joylarini egallab oldilar. 25Ular Midiyonlarning ikkita lashkarboshisi Oriv va Zayovni#7:25 Oriv va Zayov — ibroniychada Oriv ismining maʼnosi — quzgʻun, Zayov ismining maʼnosi — boʻri. Midiyon xalqi, ovchilar kabi, Isroil xalqini quvib, ularni talon–taroj qilardi. Iordanning sharqiy qirgʻogʻigacha taʼqib qilib, qoʻlga olishdi. Orivni bir qoyaning oldida, Zayovni esa uzum siqish chuqurining#7:25 uzum siqish chuquri — 6:11 izohiga qarang. oldida oʻldirishdi. Keyinchalik bu joylar Oriv qoyasi va Zayov chuquri deb ataladigan boʻldi. Soʻng Midiyonlarni taʼqib qilishda davom etib, Oriv va Zayovning boshlarini Gidoʻnga olib borishdi.

Currently Selected:

Hakamlar 7: O‘zbMK

Highlight

Copy