Matiu 3
3
Jɔɔn Kɔraawiizi Niisɔɔri wia
(Maak 1:1-8; Luuk 3:1-18; Jɔɔn 1:19-28)
1Denii saŋa bɛl n wa helle, baal bɛl izi di ba Juda hɛri. U sɔnnɛ faa Jɔɔn, ba kaa ra yiruu Kɔraawiizi Niisɔɔri. U ɔɔ du hɛribɔduma di ra sii, di ra ŋɔ, 2“Ií gil ii biine chɔgi dikuu ii wichɔgaa wia di gilaa ha, dikuubɛɛwiai, Kɔraawiizi Kora dii saŋa duglɔɔrɛ.” 3A Jɔɔn wiarɛ Kɔraawiizi dɔgtɛɛ Aizaaya faa bagli, di ŋɔ,
“Ba daŋ nuu nɛbɛl n na sii hɛribɔduma biini, di ra ŋɔ,
‘Yaa Dɔɔri ra bau. Ií ra ɛɛ sirya ú ra ba.
Ií ra ɛɛ wia á ra deŋli ni a ŋmɛnizi.’ ”#Aiza 40:3
4Jɔɔn la ɔɔ faa laali tagta bɛllɛ baŋ kpa nyugma huna suah, di kpa kurhɔna di kirsi. U diwee genii huuhni ni huuhnuu. 5Denii Jɛrusalɛm hina ni Juda hɛri hina ni banla n du Jɔɔdan muu nua la, ba maa lii di la u be 6di gaa sɛɛ chɔgri dikuu ba wichɔgaa wia, u ra sɔ baa Kɔraawiizi nii a muu biini.
7U na Jus hina nabɔnzi baŋhina banna yir Farisizi ni banla banna yir Sajusizi n na ba u be werge ú sɔ baa a nii. U ŋɔ ba be, “Hɛrikuna biizi! Anɛɛ n kali ia lugɔ ií ra chɔ, Kɔ́raawiizi baaŋ gilɛɛ waa fuuh ii ninɛi? 8Ií gil ii wiɛɛlaa ra bagli lugɔ ii biine chɔkkɔɔ dikuu ii wichɔgaa wia. 9Ií gilɛɛ ra chɔli iihinaa di ra ŋɔ dɔŋa be lugɔ ii ɛɛ Abraham naannaa. Ií gil n ŋɔ ii be lugɔ di Kɔraawiizi vii sɛɛwɔ, u daŋ vii wer kpa bia naa di birgi Abraham naanna.#Jɔɔn 8:33, 37 10Ii ɛɛwɔɔ lugɔ daazi Kɔraawiizi n kpa kpaŋfɔ di ɛɛ sirya ú chi a lunne maga di ŋmɛnnaa ha. Daa la maa nɔna n waa wer, u daŋ ŋmɛnuu ha di kpau ha niŋ biini, ú fuuh.
11Miŋwaa n kpa nii di ra sɔ ia naa, u gunna bagli lugɔ ii gillɔɔ ii biine chɔgi dikuu ii wichɔgaa wia, di gilaa ha. Ka unla n tɔ n har di ra ba la, u ɛɛ nabɔmaa n ni werge maa. Maa dɛg min niŋ lizi u gawa gba tɛu. Kɔraawiizi Dumnanii ni ninne waabuu wa kpa di ra du ii ni.#Wiɛɛ 1:5 12Ii kaa ɛɛu lugɔ mia ge Kɔraawiizi n ɛɛ sirya ú hɛl a zɔga ha, ka paa a bii du u kaporo biini, ka kpa zɔga lawaa di du niŋ la n waa dimaa dɔɔwɛ la biini, á fuuh.”
Yeesu Kɔraawiizi niisɔi wia
(Maak 1:9-11; Luuk 3:21-22)
13Denii Yeesu lii Galilii hɛri di ba Jɔɔn be Jɔɔdan muu la, di ra nyiŋŋi Jɔɔn sɔu Kɔraawiizi nii la. 14Jɔɔn a vɛɛ, di ra ŋɔ, “Minuu dɛkkɛ hin niŋ sɔŋ Kɔraawiizi nii, ka i ba n be ŋɔ ń sɔi a niiyɛi?”
15Ka Yeesu ŋɔ, “I daŋ sɔŋ a nii, dikuubɛɛwiai, a dɛkkɔ yaa n hiŋ winanaa ŋmɛnizi maa.” Uŋ wa ŋɔ guŋ, Jɔɔn sɔu a nii.
16Uŋ wa sɔu tuŋ, Yeesu lii nii la biini di binni chiŋ, di na baama n yaawɛ. Kakpaŋ, Kɔraawiizi Dumnanii ga de di tuu lugɔ komma di ba wa togni u nyuu.#Aiza 11:2-3 17Denii ba nuu loobii bɛl n lii chiŋ di ŋɔ, “N biinɔŋŋiirɛ keŋ. U wia parimbuu werge.”
Currently Selected:
Matiu 3: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
