Matiu 2
2
Nunzunna n lii wiifurii wia
1Uŋ lul Yeesu la, Bɛtlihɛm n du Juda hɛri labuu u luluu. Baal la n faa ɛɛ koori a saŋa hiŋ sɔnnɛ faa Hɛrɔd. Denii nunzunna baŋhina lii wiifurii hɛri bɛl di ba Jɛrusalɛm di waa pɛɛzi nɛra, 2“Ba lul bie la n niŋ ɛɛ Jus hina koori labuu. Lee u duɛi? U chinchiŋwilii lii yaa hɛrii yaa nau, di ba ya wa jaamuu.”
3Koori Hɛrɔd n wa nuu guŋ, a tir u ni Jɛrusalɛm hina maa. 4U chaali Kɔraawiizi Kizeehina Nabɔnzi ni Kɔraawiizi Hɔnzunna la maa, di pɛɛzi baa bɔr la ban niŋ faa lul Kristo la Kɔraawiizi n faa ŋɔwɛɛ lugɔ u daŋ ŋmɛnɛ ba la. 5Ba ŋɔ, “Bɛtlihɛm n du Juda hɛrii bá luluu. Kɔraawiizi dɔgtɛɛ faa sɛbi gunnɛ dau, di ŋɔ,
6‘Juda hɛri bola maa boljiga Bɛtlihɛm,
i dɔɔ sɔnnɛ Juda hɛri nabɔnzi be,
dikuubɛɛwiai, i binii ń lizi nabɔma bɛl
n niŋ waa binni n nɛra Izrɛl hina ni la wa lii.’ ”#Maik 5:2
7Denii koori la kaa suahzi yir nunzunna la, ba ba. U pɛɛzi baa nɛnnɛ ú zum saŋa la chinchiŋwilii la n faa liwɛɛ. 8Baŋ wa bagluu, u ŋɔ, “Ií la Bɛtlihɛm di ga pɛɛzi a bie wia nɛnnɛ. Di ii wa nau, ií jaa ba di wa ŋɔ n be. N gba ra nyiŋŋuu ń la ga jaamuu.”
9Uŋ wa ŋɔ guŋ tuŋ, nunzunna la lii di ra la. Banna la, chinchiŋwilii la baŋ faa nawɛɛ ba hɛri la, di u ge du de di ra vol, di tɔ ba see, ba hiŋuu guŋŋ u wa chi dia la a bie n duwɛɛ la nyuu. 10Nunzunna la n wa na chinchiŋwilii la, ba bɔra sɔɔni baa werge maa. 11Ba zuu dia la di na a bie, u ni u maa Mɛɛri la, di giŋŋi jaamuu, ka jaa pilli ba bunnizi di lizi saliŋ ni daahɛgsɔɔhsuma aŋhina banna yir firaŋkinsɛns ni mɛr tɛu.#Aiza 60:6 12Denii baŋ waa nyiŋŋi ba kpo, Kɔraawiizi ŋɔ ba be deeza biini dí ba gilɛɛ kaa la koori la be. Ba jaa kpa ŋmɛniduma bɛl di bir kpo.
Joosɛf ni Mɛɛri n chɔwɛɛ kaali Ijip hɛri wia
13Nunzunna la n wa kaalɛɛ tuŋ, Kɔraawiizi mɛlika bɛl ba Joosɛf be, u nau deeza biini. A mɛlika ŋɔ, “Izi kpa bie la ni u maa chɔ la Ijip hɛri di ga du de mɔɔ, ka ń kaa wa ŋɔ ií bir, dikuubɛɛwiai, Koori Hɛrɔd la daŋ waa nyiŋŋi bie la ú kpu.” 14Denii Joosɛf izi hamuŋa la ni di kpa bie la ni u maa kaali Ijip hɛri 15di ga du de guŋŋ haali koori la wa siu. Kɔraawiizi faa gillɔɔ u dɔgtɛɛ bɛl ŋɔ wii bɛl, “N yir n biibaallɛ u lii Ijip hɛri ba.”#Hozi 11:1 Awiarɛ wia naa wa ɛɛ la, Kɔraawiizi wiŋɔɔlii la wer ɛɛ wibii.
Bichalli kpui wia
16Denii Koori Hɛrɔd n faa wa zummɛ lugɔ nunzunna la daruubuu la, u baaŋ fuuh werge maa. U hum nɛra bá ga kpu biibaala la n du Bɛtlihɛm ni u kɛraa, banla n faa waa binni ahoro helle la. Uŋ faa pɛɛzi nunzunna la nɛnnɛ di zum chinchiŋwilii la liiri saŋa la wiarɛ, u kpu bannii naa ka gil banla n bini baa la. 17U wiɛɛlaa naabuu Kɔraawiizi faa gil u dɔgtɛɛ Jɛrɛmia feli bagli, di ŋɔ,
18“Ba nuu nɛbɛl loobiire Rama,
unna wii werge maa.
Rachɛllɛ ra wii dikuu u biizi wia,
ba laafuu ra huhzi,
dikuu u biizi la n waa hoo wia.”#Jɛrɛ 31:15
Joosɛf ni Mɛɛri n bittɛ ba Nazarɛf wia
19Denii koori la wa siu. Uŋ wa siuwɛ la, Kɔraawiizi mɛlika kaa ba Joosɛf be Ijip hɛri, u nau deeza biini. 20U ŋɔ, “Jaa izi kpa bie la ni u maa di bir la Izrɛl hɛri. Banla n faa ra nyiŋŋi bie la bá kpu la siuzɔɔrɛ filaŋkeŋ.”
21Awia, Joosɛf izi di kpa bie la ni u maa di kaa la Izrɛl hɛri. 22Ka uŋ wa nuuwɛ lugɔ Hɛrɔd bie Aakɛlaus kpa u mɛɛ gawaa, di di Juda hɛri kora la, u ɔm de laŋaa. Kɔraawiizi kaa ŋɔ u be deeza biini lugɔ ú gilɛɛ la de. U bir kaali Galilii hɛri 23di ga du bol bɛl banna yir Nazarɛf. Kɔraawiizi faa gillɔɔ u dɔgtɛɛzi ŋɔ, “Ba daŋ yiruu Nazarɛf hinuu.” Uŋ ga du Nazarɛf la, ba wiŋɔzi la wa ɛɛ wibii.
Currently Selected:
Matiu 2: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
